Polşa Ordu Muzeyi

Muzeyin yaranma tarixi 22 aprel 1920-ci ildə Polşa Respublikasının rəhbəri Marşal Yuzef Pilsudskinin imzaladığı fərmanla başlayıb. Bu fərmanla muzey "şöhrət məbədi və ölməz cəngəvərlik ruhunun xəzinəsi" kimi təsis edilmişdir. Muzeyin ilk direktoru polkovnik Bronislav Gembarjevski olmuşdur. Rəsmi açılış Varşavada, Podvale 15 ünvanında yerləşən binada keçirilmişdir.

1933-1934 cü illərdə Muzey Aleje Yerozolimski (indiki adıyla Aleje Jerozolimski) ünvanına köçürülmüşdür. İkinci Dünya müharibəsi zamanı muzeyin kolleksiyası təxminən 60,000 eksponatdan ibarət idi. Muzeyin həyətində hərbi texnika sərgisi var idi.^[2]

Alman işğalı dövründə kolleksiyanın bir hissəsi talan edilmiş və Almaniyaya aparılmış, muzeyin binası isə anbara çevrilmişdir.

1946-ci ildə müharibədən sonra muzey yenidən açılmış və ictimaiyyətə təqdim edilmişdir. Rekonstruksiya işləri nəticəsində təxminən 40.000 eksponat bərpa edilmişdir. 2023- cü ildə yeni bina rəsmi olaraq açılmış və "Polşa Silahlı Qüvvələrinin 1000 illik Şöhrəti" adlı sərgi ilə fəaliyyətə başlamışdır.

Muzeyin əsas məqsədi Polşanın hərbi tarixini qorumaq, öyrənmək və gələcək nəsillərə çatdırmaqdır. Kolleksiya X- cu əsrdən İkinci Dünya Müharibəsinə qədər Polşanın min illik hərbi tarixini əks etdirir. Hazırda muzeydə 300.000-dən çox eksponat mövcuddur.

Eksponatlar arasında qədim zirehlər, silahlar uniformalar, orden və medallar həmçinin tanklar, təyyarələr və digər hərbi texnika nümunələri vardır. Muzeyin yeni binası 2023-cü ildə, müasir texnologiyalarla təchiz edilmiş və tarixi formaları əks etdirən arxitektura ilə inşa edilmişdir. ^[3] Burada sərgi zalları, multimedia və konfrans otaqları, həmçinin eksponatların saxlanması üçün anbarlar mövcuddur. Muzey Polşanın hərbi irsini qorumaq və təbliğ etmək üçün mühüm bir mərkəz olaraq fəaliyyət göstərir.