Ser Piter Riçard Karuana (15 oktyabr 1956) — Cəbəllütariqli siyasətçi, vəkil, Cəbəllütariqin sabiq Baş naziri (1996-2011), Cəbəllütariq Sosial Demokratlarının keçmiş lideri (1991-2013).[1]
Karuana Cəbəllütariqdə anadan olmuş, Malta-İtalyan əsillidir. O, təhsilini əvvəlcə Cəbəllütariqdəki "Xristian Qardaşlar" məktəbində almış, daha sonra "Qreys Dieu Manor" məktəbində və müstəqil Ratkliff Kollecində oxumuşdur. Karuana daha sonra isə London Universitetinin Kraliça Meri Kollecində təhsilini davam etdirmişdir.
Baş nazir vəzifəsinə başlamazdan əvvəl o, Triay hüquq firmasının tərəfdaşı olmuşdur. O, yerli vəkil Cozef Triayın qızı Kristina ilə evlidir.[2] Onların yeddi övladı var: Maykl, Corcina, Nikola, Filippa, Patrik, Timoti və Ceyms. Karuananın boş vaxt fəaliyyətləri arasında qolf, siyasi və cari məsələlərə maraq yer alır.
Baş nazir seçilmədən əvvəl onun siyasi karyerası davamlı inkişaf etmişdir. 1990-cı ildə Karuana Cəbəllütariq Sosial Demokratları Partiyasına üzv olmuşdur. Bir il sonra o, partiyanın lideri seçilmiş və 1991-ci ilin mayında Cəbəllütariqin ilk rəqabətli əlavə seçkisində qalib gələrək Milli Məclisə üzv seçilmişdir. 1992-ci ilin yanvarında Karuana partiyasını rəsmi müxalifət mövqeyinə gətirmiş, Milli Məclisdə yeddi mandat qazanmışdır. Nəhayət, 1996-cı ilin mayında o, partiyasını qələbəyə apararaq Cəbəllütariqin Baş naziri olmuşdur.
1991-2012-ci illərdə onun rəhbərlik etdiyi CSD partiyası hər hansı suverenliyin İspaniyaya verilməsinə qəti şəkildə qarşıdır, lakin təhlükəsiz dialoqun tərəfdarıdır.[3] Baş nazir kimi Karuana Birləşmiş Krallıq və İspaniya arasındakı ikitərəfli danışıqlarda, UK nümayəndə heyətinin tərkibində iştirak etməyi ardıcıl olaraq rədd etmişdir, çünki Cəbəllütariqlilərin maraqlarının qorunmadığını və Cəbəllütariqin nəzarətində olmayan danışıqlara legitimlik vermək istəmədiyini düşünürdü.
2002-ci ildə Karuana təklif olunan birgə suverenlik sazişi ilə bağlı referendum keçirtdi və nəticədə bu sazişin ləğv edilməsinə səbəb oldu.
2004-cü ilin dekabrında, Cəbəllütariq hökumətinin Birləşmiş Krallıq və İspaniya ilə bərabər tərəf olaraq iştirak etdiyi üçtərəfli danışıqlar prinsipi nəhayət tanındı ki, bu, əsasən onun fəaliyyəti sayəsində mümkün olmuşdur. Bu, Kordoba Sazişi ilə nəticələndi və Cəbəllütariq ilə İspaniya arasında birbaşa uçuşların açılması kimi əlaqələrin yaxşılaşmasına gətirib çıxardı; uçuşlar sonradan tələb çatışmazlığı səbəbindən dayandırıldı. Həmçinin, İspaniya nəhayət Cəbəllütariqin beynəlxalq telefon kodunu tanıdı, beləliklə uzun müddət davam edən mübahisəyə son qoyuldu.
2007-ci ilin noyabrında Karuana dördüncü dəfə Baş nazir vəzifəsinə seçildi. Onun rəhbərliyi altında Cəbəllütariq Sosial Demokratları 2011-ci ilin dekabrında keçirilən ümumi seçkilərdə rəqibi olan Cəbəllütariq Sosialist Əmək Partiyası ilə Cəbəllütariq Liberal Partiyasının koalisiyasına yalnız 1,2% fərqlə uduzdular. 2013-cü il 9 yanvar tarixində Karuana açıqladı ki, ayın sonunda partiya rəhbərliyindən, eləcə də müxalifət lideri vəzifəsindən istefa verəcəkdir.[4]
Karuana 1998-ci ildə Cəbəllütariq üzrə Kraliçanın müşaviri təyin edilmişdir.[1] 2003-cü ildə isə Kastro Dükü Karlo tərəfindən Müqəddəs Yəhya Konstantin Ordeninin Böyük Xilaskar Şövalyəsi ilə təltif edilmişdir.[5] O, həmçinin 2013-cü ilin Cəbəllütariq üçün xidmətlərinə görə Müqəddəs Mixail və Müqəddəs Georgi Ordeninin Komandiri tituluna layiq görülmüşdür.[6]
- ↑ 1 2 "Legal news". The Daily Telegraph. London. 14 April 2011. p. 30.
- ↑ Are we going to fight the Armada again?, The Daily Telegraph, 22 March 2002
- ↑ Government of Gibraltar – Political Development
- ↑ "Caruana to Step Down".
- ↑ "Members of the Sacred Military Constantinian Order of Saint George". Sacred Military Constantinian Order of Saint George – Delegation for Great Britain and Ireland. 28 January 2013. Retrieved 7 July 2013.
- ↑ "No. 60534". The London Gazette (Supplement). 15 June 2013. p. 3.