Pilot (Breaking Bad)

Nyu-Meksikonun qıpqızmar səhrasında külək qəhvəyi şalvarı yolun qırağınadək qovur. Əyni-başı soyunulmuş, bircə alt paltarında qalmış və qaz maskası taxmış kişi RV-ni ziqzaqvari sürür. Qabaq oturacaqda başqa bir kişi də qaz maskasında huşsuz vəziyyətdə uzanıb. Arxada tökülmüş mayenin içində iki meyit o yan-bu yana diyirlənir, birinin əlindəki tapança da özü kimi sürüşür. RV xəndəyə yuvarlananda sürücü özünü çölə atıb yan güzgüdən sallanmış köynəyi əyninə keçirir. Videokamera ilə tapançanı qamarlayıb özünü Volter Vayt kimi təqdim edir və arvad-uşağına müəmmalı vida mesajı yazdığı videoçəkiliş aparır. Uzaqlardan sirenaların səsi eşidilir. Volt əlində silah yola düşüb sirenaların yaxınlaşmasını güdür.

Üç həftə əvvəl əlli yaşını qeyd edən Volt, Albukerkedəki sadə məişətli evinin sakitliyində səhər açılmamış yuxudan ayılır; kimya üzrə Nobel mükafatına layiq bilinmiş elmi işlərinin xatirəsini yaşadan lövhəyə baxdıqca idmanla məşğul olur. Səhər süfrəsində həyat yoldaşı Skaylerin bişirdiyi qayğanağın üstündə bekondan yaradılmış "50" rəqəmi qarşısında peyda olur. Serebral iflicli balaca Voltla deyib-gülür, könüllərini xoş edirlər. Oğlunu "Cey Pi Uin" məktəbinə ötürən Volt, burada özü də kimya müəllimi işləyir. Dərs prosesində maraqsız şagirdlərinə kimyanın təkcə maddələrin deyil, eyni zamanda dəyişikliklərin də öyrənilməsi olduğunu başa salır.

Məktəbdən sonra Volt, çarəsizlikdən avtoyuma məntəqəsində kassirlik işinə düşür. İşçi azlığından müdiri Boqdan onu maşınları təmizləmək vəzifəsinə keçirir. Çöməlib kabrioleti təmizləyən vaxtı, maşının sahibi, məktəbdəki o tərbiyəsiz şagirdlə sevgilisi onu başdan-ayağa süzüb istehza edirlər.

Axşamüstü evə yollananda Skaylerin təşkil etdiyi sürpriz doğum günü məclisinin üstünə çıxır. Qonaqların içində Skaylerin bacısı Mari Şreyderin zarafatcıl əri, DEA agenti Henk də var. Henk vaxtın yetişdiyini bilib tələm-tələsik televizoru açır - narkotik laboratoriyasının üstünün açılması barədə reportajda özüylə aparılan müsahibəyə tamaşa edirlər. Dilerlərdən götürülən pulun miqdarı Voltu mat qoyur, Henk də yeddi yüz min dollar tapıldığını bildirir. Henk Voltu növbəti əməliyyatlarının birinə dəvət edir. Bu məqamda Skayler Mariylə hamiləlik barədə dərdləşir.

Ertəsi gün avtoyuyucuda işləyərkən birdən-birə özündən gedən Voltu təcili yardım düz xəstəxanaya aparır. Həkim soyuqqanlılıqla Volta xəbər verir ki, müalicəsi mümkün olmayan ağciyər xərçənginə tutulub, ən yaxşı halda bir-iki ili qalıb. Avtoyuyucuya dönəndə Boqdan yenidən maşınları silməyi tapşıranda Voltun beyninə qan vurur. Ağzına gələni deyə-deyə avtoyuyucudan çıxıb əsəbi halda uzaqlaşır.

Henkin təklifini məmnuniyyətlə qarşılayan Volt, onunla və əməkdaşı Stiven Qomeslə birgə əməliyyata yollanır. Henklə Qomes "Kapitan Kuk" ayaması ilə tanınan yerli narkotik dilerinin metamfetamin laboratoriyasına basqın edərkən, Volt onların cipində oturub gözləməli olur. Bu vaxt gözlərinə inanmır - keçmiş şagirdi Cessi Pinkman qonşu evin ikinci mərtəbəsindən qaçır. Bir anlıq göz-gözə gəlirlər, dərhal da bir-birlərini tanıyırlar. Cessi maşınla aradan çıxarkən, Voltun başına durur ki, Henklə Qomesin axtardığı diler elə budur. Həmin axşam Volt Cessinin evinə üz tutur, onu şantaj edərək metamfetamin işində əlbir olmağa məcbur edir - Volt kimya biliyini, Cessi də narkotik alverindəki təcrübəsini ortaya qoymalıdır.

Səhəri gün Volt məktəbdən kimya avadanlıqlarını mənimsəyir və bank hesabından bütün məbləği çıxarır ki, Cessi onların səyyar metamfetamin emalatxanasına çevriləcək köhnə RV əldə edə bilsin. Nə yazıq ki, Cessi pulun əksər hissəsini striptiz klubda sovurur ("Más").

Ticarət mərkəzində geyim baxan zaman oğlu Cunioru fiziki məhdudiyyətinə görə ələ salırlar. Volt Skaylerə müdaxilə etməməyi tapşırıb ayrılır. Bir azdan geri dönən Volt başçılıq edən zorbanın dizinə zərbə endirərək, baldırını sıxır. Ardınca onu təkbətək hesab çəkməyə səsləyir, zorbalar da qorxub aradan çıxırlar.

Bir gün keçir. Volt ilə Cessi RV-lərini səhranın bir künc-bucağında saxlayır. Cessinin məzəsinə gəlir ki, Volt alt paltarında dayanıb - kimyəvi qoxular sinməsin deyə üst-başını maşının güzgüsündən sallandırıb. İlk metamfetamin bişirmələri zamanı Voltun düzəltdiyi məhsulun kimyəvi saflığı Cessinin ağlını başından alır. O, nümunəni tanışı Emilio Koyamanın qohumu, orta həcmli narkotik alverçisi Kreyzi-8-ə göstərir. Henkin əməliyyatında tutulub, zaminə buraxılan Emilio, Cessinin onu ələ verdiyini fikirləşir. Kreyzi-8 ilə Emilio Cessini RV-yə gətirən kimi, Kreyzi-8 Voltdan onunçün işləmək təklifini irəli sürür. Amma cavab gözləməmiş Emilio onu əməliyyatdan xatırlayır. Voltu məxfi polis bilib hədələməyə başlayır. Cessi aradan çıxmaq istəyəndə ayağı ilişib başını daşa vurur, özündən gedir. Volt canını qurtarmaq xətrinə metamfetamin formulunu açıqlayacağına söz verir.

Emilio Cessini kəndirlə sarıyır, sonrasında Kreyzi-8-lə bərabər Voltun kimya təcrübəsini maraqla seyr edirlər. Volt inqredientləri hazırlayan vaxt Emilionun beyni dumanlanır, siqaretini pəncərədən bayıra tullayır, kol-kosun arasında alov dilimləri qalxır. İçəridə iki nəfərin nəzarəti altında Volt qırmızı fosforu qaynar su ilə qarışdırır, göz qamaşdıran alov və öldürücü buxar ətrafa yayılır, özü isə RV-dən kənara sıçrayır. Kreyzi-8 və Emilio RV-nin qapısından Voltun başının üstündən güllə yağdırırlar, ancaq qazın təsirindən özlərini itirib yerə sərilir. Volt birdən-birə kolluqdakı yanğını görür, söndürməyə çalışır, amma əlindən bir şey gəlmir. Qaz maskasını taxır, Cessiyə də geydirərək onu sərnişin oturacağında yerləşdirir, dəhşət içində yola düzəlir, hekayənin əvvəlində göstərilən səhnəyə keçid alınır.

Sirenaların uğultusu yaxınlaşdıqca, Volt özünü vurmaq istəyir, amma tapançanın təhlükəsizlik kilidi açılmadığını fərq edir. Qulağına dolan səslərin polis maşını deyil, kolluqdakı yanğına gedən yanğınsöndürənlərin səsi olduğunu başa düşəndə rahatlaşır. Gözünün altı qaralmış Cessi özünə gəlib bayıra çıxanda, Volt silahı kürəyinin arxasında saxlayır. Metamfetamini ilk dəfə bişirdiyi gün onu əldən salıb, amma içində bir qığılcım da alışıb. Evə gələndə Skaylerin təşviş dolu suallarına cavab verməyib, indiyə qədər olmadığı kimi, ehtiraslı davranışları ilə qadını çaş-baş qoyur.

• amc.com/shows/breaking-bad/season-1/episode-01-pilot — "Pilot" rəsmi saytı^{[ölü keçid]} at the official Breaking Bad site