Parks and Recreation

Parks and Recreation — Qreq Deniels və Maykl Şurun ərsəyə gətirdiyi (qısaca "Parks and Rec") ABŞ siyasi satirik sitkomu. NBC telekanalında 2009-cu il aprelin 9-dan 2015-ci il fevralın 24-dək yeddi mövsüm ərzində 125 bölümlə yayımlanmışdır. 2020-ci ilin aprelində xüsusi buraxılışla tamaşaçıları ilə görüşmüşdür. Serialın mərkəzində İndiana ştatının qondarma Pouni (Pawnee) şəhərinin park idarəsində orta səviyyəli məmur vəzifəsində çalışan nikbin Lesli Noup obrazı dayanır. Baş rolu Emi Poler canlandırmışdır.

Parks and Recreation
ing. Parks and Recreation
Janr	sitkom
Prodüser	Emi Poler[d]
Rollarda	Emi Poler[d] Əziz Ənsari[d] Kris Prett Rəşidə Cons Nik Offerman[d] Obri Plaza Pol Şnayder[d] Adam Skott[d] Retta[d]
İstehsalçı ölkə	ABŞ[1][2]
Dil	ingilis dili[3][1]
Rəng	rəngli[d]
Davametmə müddəti	22 dəq.
IMDb	ID1266020
nbc.com/parks-and-recrea…
Vikianbarda əlaqəli mediafayllar

Əsas aktyor heyətində Rəşidə Cons (Enn Perkins), Əziz Ənsari (Tom Haverford), Nik Offerman (Ron Suonson), Obri Plaza (Eypril Ladqeyt), Kris Prett (Endi Duayer), Adam Skott (Ben Uayatt) yer almışdır. Həmçinin Pol Şnayder (Mark Brendanaviç), Rob Lou (Kris Treqer), Cim Oheyr (Qerri "Cerri" Qerqiç), Retta (Donna Miql) və Billi Aykner (Kreyq Middlbruks) serialın dolğun obrazlar qalereyasını tamamlamışdır.

Serialın yaradıcı heyəti material toplayarkən Kaliforniya ştatının siyasi ab-havasını incəliklərinədək öyrənmiş, şəhər planlaşdırması üzrə mütəxəssislərlə, hökumət nümayəndələri ilə görüşlər keçirmişdir. Birinci mövsümdən sonra Lesli Noup obrazı köklü dəyişikliyə uğramış – tamaşaçıların tənqidi rəylərinə əsasən, əvvəllər yüngülxasiyyət, düşüncəsiz görünən personaj yeni xarakter qazanmışdır. Müəlliflər qlobal maliyyə böhranından təsirlənərək Pouni şəhərinin idarəetmə sistemindəki çətinlikləri ekrana gətirmiş, bununla da cəmiyyətdəki real problemləri əks etdirmişlər. Serialın növbəti hissələrində Con Makkeyn, Mişel Obama, Co Bayden kimi nüfuzlu siyasətçilər kiçik səhnələrdə rol almışlar.

"Parks and Recreation" NBC telekanalının cümə axşamları praym-taym saatlarında yayımlanan "Comedy Night Done Right" proqramında özünəməxsus yer tutmuşdur. Serialın ilk mövsümü müxtəlif rəylər almışdır – tənqidçilər onu Deniels və Şurun prodüserliyi ilə çəkilmiş digər situasiya komediyası "Ofis" ilə müqayisə etmişlər. Konsepsiyasında və formatında edilən dəyişikliklərdən sonra ikinci mövsümdən başlayaraq serial geniş tamaşaçı rəğbəti qazanmışdır. Yayımlandığı müddət ərzində layihə çoxsaylı mükafatlara layiq görülmüşdür: on dörd dəfə "Praymtaym Emmi" mükafatına (iki dəfə "Ən yaxşı komediya serialı" nominasiyasında), "Qızıl Qlobus" mükafatına ("Ən yaxşı televiziya serialı – musiqili və ya komediya" nominasiyasında) namizəd olmuşdur, Emi Poler isə "Qızıl Qlobus" mükafatını qazanmışdır. Serial həmçinin "Peabody" mükafatına sahib olmuşdur.

"Time" jurnalı 2012-ci ilin yekunlarına həsr olunmuş buraxılışında "Parks and Recreation"ı ilin bir nömrəli televiziya serialı adlandırmışdır. 2013-cü ildə dalbadal dördüncü dəfə namizəd göstərildiyi "Komediya janrında müstəsna nailiyyətlərə görə" nominasiyasında "Television Critics Association Award" mükafatını əldə etmişdir.