Parıltı emojisi (✨) – kiçik ulduzlarla əhatə olunmuş böyük bir ulduzdan ibarət emoji. Anime və manqalarda parıltını göstərmək üçün yaransa da, əsasən mətndəki bir hissəni vurğulamaq üçün istifadə olunur. 2021-ci ildə "Twitter"də ən çox istifadə olunan üçüncü emoji idi. 2020-ci illərdən etibarən bir çox proqram təminatı şirkəti süni intellekti bildirmək üçün bu emojidən istifadə edir.
Emojipediyanın məlumatına əsasən parıltı emojisi ilk dəfə 1990-cı illərin sonunda Yaponiyanın mobil operatorları "SoftBank", "Docomo" və "au" tərəfindən istifadə olunmuşdur.[1] Emoji 2010-cu ildə Unicode 6.0-a və 2015-ci ildə Emoji 1.0-a əlavə olunmuşdur.[2]
Bəzi platformalarda emoji çoxrəngli olduğu halda, bəzi platformalarda bir rənglə verilmişdir. "Twitter" və "Microsoft"un parıltı emojiləri çoxrənglidən təkrəngliyə keçmişdir. "Samsung"un parıltı emojisinin köhnə versiyasında arxa planda gecə səması var idi.[2]
Parıltı emojisi əvvəlcə anime və manqalardakı parıltıları bildirmək üçün yaradılmışdır. Belə ki, anime və manqalarda parıltı gözəlliyi, xoşbəxtliyi və heyranlığı bildirir. Kontekstdən asılı olaraq parıltı emojisinin fərqli mənaları ola bilər. 2010-cu illərin sonunda və təxminən 2020-ci ildə emoji mətndə verilmiş bir hissəni vurğulamaq üçün istifadə olunmağa başlamışdır. Məsələn, "Mən sadəcə olaraq ✨dünyadan köçəcəm✨". Bu, sarkazm, ironiya və insanları lağa qoymaq üçün istifadə olunur.[1] Parıltı emojisi mətndəki ulduzları bildirmək, təmizliyə işarə etmək və ya sekstinq zamanı "orqazm"ı bildirmək üçün istifadə oluna bilər.[3]
2021-ci ilin sentyabrında Emojipediyanın verdiyi məlumata əsasən parıltı emojisi dünyada ən çox istifadə olunan üçüncü emoji elan olunmuşdur. Belə ki, tvitlərin 1%-ində bu emoji var idi.[1]
2020-ci illərin əvvəlində parıltı emojisi süni intellekti bildirmək üçün istifadə olunan ikonaya çevrilmişdir. "Google", "OpenAI", "Samsung", "Microsoft", "Adobe", "Spotify", "Wordpress" və "Zoom" kimi şirkətlər emojidən süni intellekti bildirmək üçün istifadə edən şirkətlərdir.[4][5][6] 2024-cü ilin avqustuna aid məlumata əsasən proqram təminatı üzrə əsas 10 şirkətdən 7-si parıltı emojisindən süni intellektlə istifadə edir. "OpenAI" emojisinin 4 fərqli versiyasından istifadə edir, çünki ChatGPT-inin fərqli versiyaları mövcuddur. Əsas versiyaya görə şirkətlər süni intellekti "sehr" kimi bazara çıxarmaq üçün parıltı emojisindən istifadə edirlər.[7][8] Digər versiyaya görə süni intellektin hər kəs tərəfindən istifadə oluna bilən sadə bir şey olduğunu vurğulamaq üçün bu emoji seçilmişdir.[5]
2024-cü ildə bəzi şirkətlər emojidəki iki kiçik ulduzu yığışdırmağa və böyük ulduzu saxlamağa başlamışdırlar. Məsələn, "Google"un "Gemini" çatbotunda bir ulduz var.[5]
- ↑ 1 2 3 "It's Not Just You. The Sparkles Emoji is ✨Everywhere✨". Emojipedia. 1 October 2021. İstifadə tarixi: 4 mart 2025.
- ↑ 1 2 "Sparkles". Emojipedia. İstifadə tarixi: 4 mart 2025.
- ↑ "✨ Sparkles emoji". Dictionary.com. 20 July 2018. İstifadə tarixi: 4 mart 2025.
- ↑ "How ✨ became the unofficial AI emoji". Quartz. 1 December 2023. İstifadə tarixi: 4 mart 2025.
- ↑ 1 2 3 "How the Sparkles Emoji Became the Symbol of Our AI Future". The Wall Street Journal. 17 August 2024. İstifadə tarixi: 4 mart 2025.
- ↑ "How the sparkles emoji took over AI". Fast Company. 17 February 2024. İstifadə tarixi: 4 mart 2025.
- ↑ "Has Artificial Intelligence Co-opted the Sparkle Emoji?". Bloomberg News. 10 July 2024. İstifadə tarixi: 4 mart 2025.
- ↑ "Why the sparkle emoji became the symbol of AI". The Globe and Mail. 28 December 2024. İstifadə tarixi: 4 mart 2025.