Orxan Əzim

Orxan Əzim 1986-cı il oktyabrın 28-də Bakı şəhərində anadan olub. 1993–2004-cü illərdə A. Məhərrəmov adına 95 saylı tam orta məktəbdə təhsil alıb. Ali təhsilini 2004–2008-ci illərdə Azərbaycan Dövlət Mədəniyyət və İncəsənət Universitetinin Rejissorluq fakültəsində, "Televiziya rejissoru" ixtisası üzrə alıb.

2001-ci ildən fotoqrafiya ilə maraqlanmağa başlayıb. 2007-ci ildən ixtisası üzrə Azərbaycan Televiziyasında rejissor assistenti olaraq işə başlayıb.^[1] 2012-ci ildən peşəkar fotoqrafiya ilə məşğuldur. Azərbaycanın və dünyanın bir çox yerlərinə səfər edərək daha çox insan hekayələri, təbiət və sosial mövzuları işıqlandırıb. İndiyədək bir sıra beynəlxalq sərgidə iştirak edib. 2021-ci ildən Azərbaycan Fotoqraflar Birliyinin üzvüdür.

2016-cı ildə Çernobıl faciəsinin otuz illiyi ərəfəsində Pripyat şəhərinə ezam olunub. Burada lentə aldığı fotolar ictimaiyyətin marağına səbəb olub.^[2][3][4]

2017-ci ildə İraqa ezam olunub. Nəcəf, Kərbəla və Kufə şəhərlərində çəkiliş edib. Ərbəin yürüşündə azərbaycanlı zəvvarların ziyarətini lentə alıb.^[5][6]

2019-cu ildə "Nəsimi ili" çərçivəsində Mədəniyyət Nazirliyinin dəstəyi ilə Suriyanın Hələb şəhərinə ezam olunub. Burada müharibədən sonrakı həyatı və İmadəddin Nəsiminin məzarını lentə alıb. Nəsiminin məzarından olan fotoreportajı mediada maraqla qarşılanıb.^{[7][8][9][10][11]}

2021-ci ildə işğaldan azad edilmiş Ağdam rayonunda səfərdə olarkən Yusifcanlı kəndində iki bacının aralarında səngər qazılmış məzarlarını lentə alıb. Bu kadrlar xarici media orqanlarında əks-səda yaradıb.^[12][13][14]

2021-ci ildə işğaldan azad olunmuş Şuşa həbsxanasından fotosessiya edib.^[15][16]

2022-ci ildə Astara rayonunun Diqo kəndindən "Təhsilin Diqo səviyyəsi" başlığı altında hazırladığı fotoreportajla ucqar kəndlərin təhsil probleminə işıq tutub və geniş müzakirələrə səbəb olub.^[17] Fotoreportajdan sonra Təhsil Nazirliyi məsələylə bağlı açıqlama yayıb və 2022-ci ildə tikintisi planlaşdırılan məktəblər arasına Diqo kənd məktəbinin də adının əlavə olunduğunu qeyd edib.^[18][19]

2014-cü ildə "Köç" adlı fərdi fotosərgisi keçirilib.^[20][21]

2016-cı ildə müəllifi olduğu Çernobıl qəzasının nəticələrini əks etdirən fotoşəkillərindən ibarət qəzanın otuz illiyinə həsr edilmiş sərgisi baş tutub.^[22][23][24] Sərgi 2019-cu ildə yenidən keçirilib.^{[25][26][27][28]}

2019-cu ildə "İtirilmiş şəhər və Nəsiminin məzarı" adlı fotosərgisi təşkil olunub.^{[29][30][31][32][33]}

2021-ci ildə Türkiyənin Bursa şəhərində 11-ci Beynəlxalq Fotofestivalda fotoları sərgilənib.^[34]

2015-ci ildə Binəqədi rayonunda baş verən yanğın zamanı çəkdiyi fotoda polisin uşağı yanğından xilas etdiyi anı lentə alıb.^[35] Bu foto bir çox xarici kütləvi informasiya vasitəsində "Qəhrəman polis" başlığı ilə yayımlanıb.^{[36][37][38][39][40]}

Həmin dövrdə Azərbaycan Respublikasının Daxili İşlər naziri olan Ramil Usubov yanğınsöndürmə və xilasetmə işlərinə cəlb olunmuş dövlət qurumlarının, o cümlədən polisin fədakar xidmətini yerli və xarici KİV-lərdə obyektiv şəkildə işıqlandırdığına görə Orxan Əzimi Daxili İşlər Nazirliyinin "Fəxri fərmanı" ilə təltif edib.^[41][42][43]

2016-cı ildə müəllifi olduğu Çernobıl qəzasının nəticələrini əks etdirən fotoşəkillərdən ibarət – qəzanın otuz illiyinə həsr edilmiş sərgi "İlin sərgisi" mükafatına layiq görülüb.^[44][45]

2016-cı ildə Birləşmiş Millətlər Təşkilatının Sivilizasiyalar Alyansının keçirdiyi "Mədəniyyətlər arası dialoq gənclərin gözü ilə" adlı beynəlxalq müsabiqədə üçüncü yerə layiq görülüb.^[46]

2019-cu ildə Azərbaycan Fotoqraflar Birliyinin keçirdiyi "İlin fotoqrafı" müsabiqəsində "Müharibə fotoqrafı" nominasiyasında birinci yerin sahibi olub.^[47][48]

Orxan Əzim 2019–2020 ci illər ərzində beynəlxalq müsabiqələrdə üç qızıl, üç gümüş medal, iki diplom və iki xüsusi lentlə təltif olunub.

 • Orxan Əzim – "Nənəmin rəsmi Luvr muzeyindədir - MÜSAHİBƏ"^[49]

 • Orxan Əzim – "Hər bir fotoqraf şəkil çəkməzdən əvvəl özünə sual verməlidir ki, çəkdiyi şəkil ona, ondan da tamaşaçıya hansı hissləri ötürürmü"^[50]

 • Orxan Əzim – "Faciə və kədər üzərində şou qurmaq mənim həyat devizimə aid deyil"^[51]

 • Orxan Əzim – "Eləsinə 100 min manatlıq aparat da versən, yarıdan deyil"^[52]