Azərbaycan relyefinin inkişafının maykop əsrindən orta-son miosen epoxasına keçid mövcud dağlıq ərazilərin qalxması və dənizin reqressiyası ilə səciyyələnir. Böyük Qafqazın relyefinin bu dövrdəki inkişaf tarixinin təhlili burada mövcud olmuş relyef formalarının morfostruktur əsasda bərpasını həyata keçirməyə imkan yaratmışdır. Məlum olmuşdur ki, bu ərazidə geoloji zaman kəsimi boyunca müxtəlif morfoloji və genetik xarakterli morfostrukturlar formalaşmışdır. Relyefin inkişafının orta-son miosen epoxasında Kiçik Qafqazın ümumi qalxması fonunda dənizin reqressiyası onun müvəqqəti transqressiyaları ilə əvəz olunur. Dənizin Qazax və Həkəri körfəzləri ərazinin dərinliklərinə qədər irəlləyir və onun inqressiyası ensiz və dayaz körfəzlər şəklində Kəkil (Qazax çökəkliyi) və Qabaxtəpə (Şəmkir massivi) məntəqələrinə çatır. Kiçik Qafqazqabağı çökəklik qismən quruya çevrilir və ərazinin əsas oroqrafik ünsürləri böyüməkdə davam edir və denudasion parçalanmaya məruz qalır. Vulkanizmin canlanması ilə əlaqədar olaraq lava platoları əmələ gəlir, bəzi morfostrukturların morfoloji görünüşündə dəyişikliklər baş verir və keyfiyyətcə yeni tip morfostrukturlar yaranır. Relyefin inkişafının həmin epoxasında Orta Araz tektonik zonasında Mehri-Ordubad batoliti formalaşdıqdan sonra Zəngəzur horst-qalxmasının əmələ gətirdiyi eyniadlı silsilə qalxmaqda davam edir və erolzion parçalanmaya məruz qalır. Bu dövrdə Ordubad sinklinor çökəkliyinin əsasının qoyulması müasir relyefin formalaşmasında mühüm rol oynayır. Sinklinoriunun daxilində müasir yüksəkliklər və çökəkliklərin inkişafı baş verir. Naxçıvan törəmə çökəkliyini dəniz tərk edir və burada bir sıra antiklinal tirələr və sinklinal çökəkliklər formalaşır. Orta — son Miosen əsri Talış zonasının relyefinin inkişafında da mühüm mərhələ olmuşdur. Bu mzaman üfüqi və onların doğurduğu şaquli tektonik hərəkətlərin güclənməsi nəticəsində morfostrukturlar xeyli genişlənir Yardımlı dağarası depressiyası, Talış, Peştəsər və Burovar silsilələri qalxır və denudasiyaya məruz qalır.

• Epoxa

1. Azərbaycan Respublikasının coğrafiyası. Fiziki coğrafiya. I cild, Bakı-2015