Ordu generalı — Azərbaycan Silahlı Qüvvələrində ən ali hərbi rütbə.[1]
| Ordu generalı | ||
|---|---|---|
| ||
| Ölkə |
 Azərbaycan |
|
| Təsis edilib | 5 sentyabr 1991 | |
| Yuxarı rütbə | yoxdur | |
| Aşağı rütbə |
General-polkovnik, Admiral |
|
| Analoji rütbə |
Həqiqi dövlət müşaviri, Həqiqi dövlət ədliyyə müşaviri, Həqiqi dövlət gömrük xidməti müşaviri, Həqiqi dövlət vergi xidməti müşaviri |
|
Ordu generalı hərbi rütbəsi NATO təsnifatındakı "OF-9" ranqına, habelə dörd ulduzlu general rütbəsinə uyğundur.
"Hərbi vəzifə və hərbi xidmət haqqında" Azərbaycan Respublikasının Qanununa əsasən ordu generalı üçün həqiqi hərbi xidmətdə olmağın son yaş həddi müəyyən edilmir.[2]
2011-ci ildə ləğv edilmiş Hərbi xidmət haqqında qanunda “Hərbi rütbələrin verilməsi” adlı 9-cu maddədə bu cür qeyd edilirdi:[3]
“Ali zabit hərbi rütbələri ali zabit vəzifələrində çalışan hərbi qulluqçulara Azərbaycan Respublikasının Prezidenti tərəfindən verilir. “Ordu generalı” hərbi rütbəsi müharibə dövründə dövlətin bütün Silahlı Qüvvələrinə rəhbərlik işində respublika qarşısında xüsusi xidmətlərə görə verilir.”
2 may 1995-ci il tarixli 1030 nömrəli Azərbaycan Respublikasının Qanunu ilə 9-cu maddə yeni redaksiyada verilmişdir:
“Ordu generalı" hərbi rütbəsi müharibə dövründə dövlətin bütün silahlı qüvvələrinə rəhbərlik işində xüsusi xidmətlərə görə Azərbaycan Respublikası Silahlı Qüvvələrinin Ali Baş Komandanına və Azərbaycan Respublikası Prezidentinin təqdimatı ilə ali zabit vəzifələrində çalışan hərbi qulluqçulara Azərbaycan Respublikası Milli Məclisi tərəfindən fərdi qaydada verilir.”
20 aprel 2004-cü il tarixli 640-IIQD nömrəli Azərbaycan Respublikasının Qanunu (Azərbaycan Respublikasının Qanunvericilik Toplusu, 2004-ci il, № 5, maddə 319) ilə 9-cu maddənin bu-ikinci hissəsi çıxarılmışdır.
"Xüsusi, hərbi, diplomatik rütbələrin və ixtisas dərəcələrinin qarşılıqlı uyğunlaşdırılması Qaydası"na əsasən ordu generalı hərbi rütbəsi Azərbaycanda dövlət qulluğundakı həqiqi dövlət müşaviri ixtisas dərəcəsinə, prokurorluq və ədliyyə orqanlarındakı Həqiqi dövlət ədliyyə müşaviri, gömrük orqanlarındakı həqiqi dövlət gömrük xidməti müşaviri, vergi orqanlarındakı həqiqi dövlət vergi xidməti müşaviri ali xüsusi rütbələrinə uyğundur.[4]
Ordu generallarının poqonlarında Azərbaycan Respublikası Silahlı Qüvvələrinin emblemi əvəzinə rəngli təsvirdə Azərbaycan Respublikasının Dövlət Gerbi yerləşdirilir. Gerbin ölçüləri 45x50 mm-dir. Poqonlarındakı üzərində ölçüsü 30 mm olan 1 ədəd səkkizguşəli ulduz vardır.
- ↑ "Azərbaycanda yalnız bir ordu generalı var". Novator.az (az.). 2017-08-22. 2023-06-06 tarixində arxivləşdirilib. İstifadə tarixi: 2024-12-10.
- ↑ "Hərbi vəzifə və hərbi xidmət haqqında". e-qanun.az (az.). İstifadə tarixi: 2025-03-30.
- ↑ "Hərbi xidmət haqqında". e-qanun.az (az.). İstifadə tarixi: 2025-03-30.
- ↑ ""Xüsusi, hərbi, diplomatik rütbələrin və ixtisas dərəcələrinin qarşılıqlı uyğunlaşdırılması Qaydası"nın təsdiq edilməsi haqqında". e-qanun.az (az.). İstifadə tarixi: 2024-12-10.
- "Azərbaycanda Ordu generalı rütbəsi kimə verilə bilər? - AÇIQLAMA". Oxu.az (az.). İstifadə tarixi: 2025-03-30.
- Seyidağa, Etibar. "Azərbaycanın general-polkovnikləri". Musavat.com.