Oqast Karl Rayşauer (ing. August Karl Reischauer; 4 sentyabr 1879[1], Consboro[d], İllinoys – 10 iyul 1971[1]) – amerikalı presviterian missioneri.[2] Yaponiyadakı fəaliyyətinə görə tanınır.[2] 1918-ci ildə Tokio Qadınlar Xristian Universitetinin, 1920-ci ildə isə həyat yoldaşı ilə birlikdə Yaponiya Karlar Danışıq Məktəbinin əsasını qoymuşdur.[2]
| Oqast Karl Rayşauer | |
|---|---|
| Doğum tarixi | 4 sentyabr 1879[1] |
| Doğum yeri | |
| Vəfat tarixi | 10 iyul 1971[1] (91 yaşında) |
| Fəaliyyəti | missioner |
| Mükafatları |
 |
Oqast Karl Rayşauer 1879-cu ildə ABŞ-nin İllinoys ştatının Consboro şəhərində doğulmuşdur.[2] 1902-ci ildə Hanover kollecindən, 1905-ci ildə isə Makkormik Teologiya Seminariyasından məzun olduqdan sonra Yaponiyaya getmişdir.[2] Rayşauer xristianlığın digər dinlərlə əlaqəsi ilə maraqlandığı üçün 1917-ci ildə "Yaponiyada buddizm tədqiqatları" adlı elmi işini nəşr etdirmişdir.[2] O, həmçinin Yaponiyada təkrarlanan protestant missionerlik cəhdlərini aradan qaldırmağa və məzhəb seminariyalarını möhkəmləndirməyə cəhd etmişdir.[2] 1917-ci ildə Nyu-York Universiteti tərəfindən fəxri dərəcə ilə təltif olunmuşdur.[3]
1941-ci ildə Yaponiyanı tərk etmiş və bir neçə il Nyu-York şəhərindəki Birlik Teologiya Seminariyasında müqayisəli dinlər mövzusunda dərslər vermişdir.[2] Əsas əsərlərinə "Yaponiyada tapşırıq: Müasir missionerlik prinsiplərinin tədqiqi" (1926) və "Oco yoşu: Cənnətdə doğum haqqında esselər" (1930) aiddir.[3]
Böyük oğlu Robert "Erkən Yaponiya tarixi, e.ə. 40 – b.e. 1167" adlı əsərinin nəşrindən qısa müddət sonra Şanxayda hava bombardımanı nəticəsində ölmüşdür.[2] İkinci oğlu Ervin tanınmış yaponşünas olmuş, 1961–1966-cı illərdə ABŞ-nin Yaponiyadakı səfiri vəzifəsini yerinə yetirmişdir.[2]
- ↑ 1 2 3 4 Library of Congress Authorities (ing.). Library of Congress.
- ↑ 1 2 3 4 5 6 7 8 9 10 Kodansha Encyclopedia of Japan. səh. 288
- ↑ 1 2 Kodansha Encyclopedia of Japan. səh. 289
- Kodansha Encyclopedia of Japan (ingiliscə). VI cild (Niju–Saka). Tokio: Kodansha. 1983. səh. 288-289. ISBN 0-87011-626-6. İstifadə tarixi: 16 avqust 2022.