Odigitis

Odigitis (yun. Οδηγητής) — yunanca nəşr edilən gənclərə yönəli jurnal, Yunanıstan Kommunist Partiyasının (KKE) gənclər qanadı olan Yunanıstan Kommunist Gəncliyi Mərkəzi Şurasının (KNE) rəsmi mətbu orqanı. Jurnal ayda bir dəfə, adətən hər ayın ilk şənbə günü nəşr olunur. Jurnalı KNE-nin yerli filiallarından, Synchroni Epochi-nin kitab mağazalarından (KKE nəşriyyatı),^[1] Yunanıstan universitetlərindəki KNE üzvlərindən və onlayn şəkildə Synchhroni Epochi-nin saytından əldə etmək olar. Jurnalın satış qiyməti isə 2,5 avrodur.

Odigitis jurnalı 40 səhifəlik jurnaldır, burada Yunanıstan Kommunist Partiyasının mövqeləri gənclərə aşılanır, KNE-nin işçi gənclərlə, universitetlərdə və məktəblərdə təhsil alan gənclərlə siyasi əlaqələrinin inkişafına töhfə verir. Jurnal vasitəsilə, həmçinin KKE və KNE-nin mövqeləri Yunanıstan ətrafındakı gənclərə də təbliğ edilir. Odigitisdə, həmçinin sosialist düşüncəli gənclərlə bağlı mövzulara da yer verilir.

Odigitisin ilk nömrəsi, qanunsuz olsa da, 22 sentyabr 1968-ci ildə işıq üzü görüb, çünki o vaxtkı hakim hərbi rejim KKE-nin və ümumiyyətlə solçu siyasi təşkilatların siyasi fəaliyyətini qadağan etmişdi. Yunanıstan Kommunist Partiyasının qanunsuz fəaliyyət göstərdiyi dövrdə Odigitisin 44 nömrəsi buraxılışmışdı. Demokratiyanın bərpası ilə Partiyanın fəaliyyəti 1974-cü ilin sentyabrında qanuni müstəviyə mindi və Odigitis 1990-cı ilə qədər yüksək satışlarla, müntəzəm olaraq dövriyyəyə buraxılmağa başladı. 1990-cı ilin sentyabrında Synaspismos-un yaradılması və onun mühafizəkar Yeni Demokratiya ilə birlikdə hökumətdə iştirakı, Yunanıstan Kommunist Gəncliyi Mərkəzi Şurasında parçalanmaya və Odigitisin nəşrinin müvəqqəti dayandırılmasına səbəb oldu. 1991-ci ilin sentyabrında, KNE-nin yenidən qurulması zamanı Odigitis yenidən aylıq jurnal kimi nəşr olunmağa başladı.^[2]

2025-ci ilin yanvar ayında KNE-nin Mərkəzi Şurası Odigitisin əhatə dairəsini genişləndirmək üçün yeni bir kampaniyaya imza atdı. Bu kampaniyanın açılışı nəticəsində Odigitisin üz qabığı və satış qiyməti dəyişdirildi. İndi Odigitisin qəzetdən daha çox jurnalı xatırladan üz qabığı vardır. Jurnalın keyfiyyətinin daha da yüksəldilməsi istiqamətində görülən işlər nəticəsində jurnalın satış qiyməti 2 avrodan 2,5 avroya qaldırılıb.^[3]