Nihad Quluzadə

Nihad Quluzadə 15 iyul 2002-ci ildə Bakı şəhərində anadan olub. 2011-ci ildə güləşlə məşğul olmağa başlayıb. İlham Vəzirovun rəhbərliyi altında məşq edir, Neftçi İdman Klubunda çıxış edir. Azərbaycan İdman Akademiyasında təhsil alıb.

Nihad Quluzadənin beynəlxalq səviyyədə birinci uğuruba 2018-ci ilin mayında KYRM-da baş tutan yeniyetmələr arasında Avropa Çempionatında bürünc medala sahib olmaqla imza atdı. Həmin il o, həm də Zaqreb şəhərində yeniyetmələr arasında Dünya Çempionatını 8-ci pillədə başa vurdu. 2019-cu ilin mayında isə İtaliyada yeniyetmələr arasında Avropa Çempionatını beşinci pillədə tamamladı.

2021-ci ilin noyabrında o, Serbiyanın Belqrad şəhərində baş tutan 23 yaşlılar arasında Dünya Çempionatını bürünc medalla başa vurdu.

2022-ci il isə Nihad Quluzadə üçün ən uğurlu mövsümlərdən biri oldu. O, əvvəlcə iyunda Roma şəhərində (İtaliya) 20 yaşlılar arasında Avropa Çempionatında, ardınca isə avqustda Sofiya şəhərində (Bolqarıstan) 20 yaşlılar arasında Dünya Çempionatında bütün rəqibləri üzərində qələbə qazanaraq U20 Avropa və Dünya çempionu oldu. Noyabrda isə Quluzadə Pontevedra şəhərində (İspaniya) baş tutan 23 yaşlılar arasında Dünya Çempionatını final görüşündə məğlub olaraq turniri gümüş medalla başa vurdu.

Növbəti, 2023-cü il Nihad Quluzadə üçün uğursuz oldu və o, il ərzində yalnızca Albaniyada baş tutan U23 Dünya Çempionatında çıxış etdi və həmin turniri 8-ci pillədə tamamladı.

2024-cü ildə Nihad Quluzadə formasını bərpa etdi və mövsüm ərzində uğurlu nəticələrə imza atdı. O, əvvəlcə mayda Azərbaycanda 23 yaşlılar arasında Avropa Çempionatının gümüş medalına sahib oldu, ardınca isə noyabrda Albaniyada 23 yaşlılar arasında Dünya Çempionatını bürünc medalla başa vurdu.