Neqreyra işi (isp. Caso Negreira) — İspaniya futbol klubu "Barselona" və İspaniya Krallığı Futbol Federasiyasının (RFEF) Hakimlərin Texniki Komitəsinin (CTA) keçmiş vitse-prezidenti Xose Maria Enrikes Neqreyra arasında davam edən idman korrupsiyası tədqiqatı. İşin mərkəzində 2001–2018-ci illərdə Neqreyranın CTA vitse-prezidenti olduğu dövrdə "Barselona" klubu tərəfindən onunla əlaqəli şirkətlərə ümumilikdə təxminən 8,4 milyon avro ödənişlər dayanır. "Barselona" klubu Neqreyranı hakimliyin texniki hesabatlarını təqdim etmək üçün xarici məsləhətçi kimi işə götürdüklərini bildirir. Neqreyra hakimliyin qərarlarına təsir göstərmək üçün rüşvət aldığını inkar etmişdir, lakin "Barselona"nın ona "hakimliyin neytrallığını təmin etmək" üçün ödəniş etdiyini bildirmişdir.
2024-cü ilin may ayında İspaniya məhkəməsi "vəzifəli şəxsin rüşvətxorluğu" ittihamını rədd etmiş və Neqreyranın İspaniya qanunvericiliyinə görə dövlət vəzifəli şəxs hesab edilmədiyini qərarlaşdırmışdır, lakin araşdırma idman korrupsiyası ittihamı ilə davam etdirilmişdir. 2024-cü ilin avqust ayının sonlarında prokurorlar Neqreyranın yaxın əməkdaşı Ana Paula Rufası 1992–2023-cü illərdə onun adına köçürülmüş 3 milyon avronun aşkar edilməsindən sonra pul yuyulmasında ittiham etmişlər.
İş ictimai rəydə çoxsaylı suallar doğurmuşdur. Bəziləri Hakimlər Komitəsinin (CTA) vitse-prezidentinə ödənişin özünün cinayət sayılması gerektiğini müdafiə edir. "Barselona"nın hüquqşünasları isə heç bir pulun konkret matçların meydan hakimlərinə köçürülməsinə dair sübut olmadığından korrupsiya və ya rüşvətxorluqda təqsirli bilinə bilməyəcəklərini iddia edirlər.
Neqreyra 1945-ci ilin sentyabr ayında Barselonada anadan olmuş, keçmiş peşəkar futbol hakimi olmuş və 1979–80 La Liqa mövsümündə debüt etmişdir. 1994-cü ildə İspaniya Kral Futbol Federasiyasının Hakimlərin Texniki Komitəsinin (CTA) vitse-prezidenti təyin edilmiş və bu vəzifədə 2018-ci ilə qədər çalışmışdır. Qalmaqalla bağlı ödənişlər 2000–2019-cu illər dövründə həyata keçirilmişdir.[1]
15 fevral 2023-cü il tarixində İspaniya radiosu "Cadena SER"də "Barselona" klubunun potensial rüşvətxorluq qalmaqalında Neqreyranın şirkətinə ödənişlər etdiyi barədə məlumatlar yayılmışdır.[2] İki gün sonra yeni məlumatlar ortaya çıxmış və 5 fevral 2019-cu il tarixli məktubda Neqreyranın klubun onun firması ilə müqaviləni xərclərin azaldılması zəminində dayandırmasına cavab olaraq "Barselona"nın qeyri-qanuni fəaliyyətlərini ifşa etməklə hədələdiyi aşkar edilmişdir.[3]
2023-cü ilin mart ayında "Barselona" klubu, keçmiş prezidentlər Sandro Rozel və Xosep Bartomeu, Xose Maria Enrikes Neqreyra və onun oğlu Xavyer Enrikes Romero "korrupsiya", "etibardan sui-istifadə" və "saxta biznes qeydləri" ittihamları ilə məhkəməyə verilmiş və iş üzrə istintaq başlanmışdır.[4] 2023-cü ilin sentyabr ayında bütün təqsirləndirilən şəxslərə əlavə olaraq "rüşvətxorluq" ittihamı irəli sürülmüşdür.[4][5] 18 oktyabr 2023-cü il tarixində "Barselona" prezidenti Joan Laporta da "rüşvətxorluq, idman korrupsiyası, qeyri-dürüst idarəetmə və saxtakarlıq" ittihamları ilə məhkəməyə verilmişdir.[6]
24 may 2024-cü il tarixində Barselona Audiensiya Məhkəməsi rüşvətxorluq cinayəti hipotezini rədd etmişdir.[7][8][9]
2024-cü ilin sentyabr ayında hakim Agirre istintaqın sübut toplama mərhələsini daha altı ay uzatmışdır. Klub üzvləri ilə bu ayın əvvəlində paylaşılmış "Barselona"nın illik maliyyə hesabatında indiyədək idman kontekstində korrupsiyaya dair heç bir sübut tapılmadığı qeyd olunmuşdur. Hesabatda həmçinin, potensial maliyyə və ya idman nəticələrinin müəyyənləşdirilməsi üçün hələ tez olduğu vurğulanmışdır. İstintaqın irəliləməsi üçün prokurorların cinayətin baş verdiyinə dair möhkəm sübuta, xüsusilə "Barselona"nın Neqreyraya ödənişlərinin idman nəticələrini manipulyasiya etmək məqsədi daşıdığına və ya belə manipulyasiyanın həyata keçirildiyinə dair ehtiyacı var. 2024-cü il sentyabr ayına olan vəziyyətə görə güclü iş qurulmamış görünür. İstintaqla tanış, lakin adsız qalmaq şərti ilə danışan mənbələr ittihamların sayı və şahidlərin çoxluğu nəzərə alınaraq yekun qərarın çıxarılması üçün bir neçə il lazım ola biləcəyini bildirmişlər.[10]
- ↑ Herrero, Pol Ballús and Laia Cervelló. "Barcelona charged with corruption over payments to former referees chief". The Athletic (ingilis). 10 mart 2023. İstifadə tarixi: 4 oktyabr 2023.
- ↑ "FC Barcelona under investigation for alleged payments made to company owned by referee body's then-VP". CNN. 16 fevral 2023.
- ↑ "Barcelona threatened by ex-VP of referees with burofax after stopping payments". ESPN. 17 fevral 2023.
- ↑ 1 2 Corrigan, Pol Ballus and Dermot. "Barcelona facing fresh suspected bribery charge in Negreira case". The Athletic (ingilis). 28 sentyabr 2023. İstifadə tarixi: 4 oktyabr 2023.
- ↑ "FC Barcelona under investigation for suspected bribery as Spanish FA offices raided by police, per reports". CBSSports.com (ingilis). 28 sentyabr 2023. İstifadə tarixi: 4 oktyabr 2023.
- ↑ Sanderson, Tom. "FC Barcelona President Joan Laporta Charged With Bribery: Reports". Forbes (ingilis). İstifadə tarixi: 18 oktyabr 2023.
- ↑ "FC Barcelona official statement". FC Barcelona. 24 may 2024. İstifadə tarixi: 24 may 2024.
- ↑ "La Audiencia da la razón al Barça y anula su imputación por cohecho en el caso Negreira" (ispan). La Vanguardia. 24 may 2024. İstifadə tarixi: 24 may 2024.
- ↑ "Victoria judicial del Barcelona en el Caso Negreira: No será imputado por cohecho" (ispan). COPE. 24 may 2024. İstifadə tarixi: 24 may 2024.
- ↑ Corrigan, Dermot. "Barcelona and the Negreira case: What's the latest?". The New York Times (ingilis). 16 oktyabr 2024. ISSN 0362-4331. İstifadə tarixi: 10 fevral 2025.