Nefrotom

Nefrotom (q.yun. νεφρωτόμιον / Rom: nephrotomium — hərf. "böyrək seqmenti", hərf. "böyrəklə bağlı bölmə"; q.yun. νεφρός / Rom: nephrós — hərf. "böyrək" və q.yun. τέμνω / q.yun. τομή /Rom: témnō / Rom: tomḗ — hərf. "kəsmək", hərf. "bölmək", hərf. "dilim", hərf. "seqment", ) — xordalı heyvan embrionlarında ifrazat orqanlarının (böyrəklər) ilkin rüşeymi. Hər bir nefrotom — cüt, metamer (buğum) quruluşa malik törəmədir. O, mezodermanın onurğa seqmenti (somit) ilə onun seqmentləşməmiş qarın hissəsi arasında yerləşir. Nefrotomdan böyrəklər, onların axarları və toxumaxarı kanal (ona toxumçıxaran kanal da deyilir və o, erkək fərdlərdə olur) inkişaf edir.

Böyrəklərin biologiyasına dair əvvəlki təsəvvürlərdə nefrotom, pronefrosun və nəticə etibarilə bütün böyrək sisteminin əmələ gəldiyi mezoderm sahəsi kimi qəbul edilirdi. Köhnə mənbələrdə pronefrosun bir neçə nefrotomun birləşməsi nəticəsində formalaşdığı qeyd olunurdu.^[1]