Neştəryarpaq kallistemon

Cənubi-Şərqi Avstraliya və Tasmaniyada geniş yayılmışdır. Bu növ 1802-ci ildə rəsmi olaraq fransa botaniki Corc Lui Mari Dümon tərəfindən təsvir edilmişdir.

Kallistemon 3-5 m hündürlükdə, düz dayanan və ya şaxələnmiş budaqlı, çılpaq gövdəli, sallaq budaqlara malik bitkidir. Yarpaqları neştərvari, yaşıl-sarımtıl rəngli olub, 2-4 sm uzunluqda, 0,3-0,4 sm enində, itiuclu, cod, üstə çıxan, orta və yan damarcıqlı və incə limon qoxusu olan, çoxsaylı nöqtəli, vəziciklidir. Çiçək sünbülləri çox seyrək, uzunluğu 9-10 sm, diametri 6-7,5 sm, tünd qırmızıdır. Erkəkciklərin uzunluğu 3 sm, 50-60 ədəd, 2 dairədə yerləşir. Tozluqları erkəkcik sapları ilə bir rəngdə, ancaq daha tünddür. May-iyun aylarında çiçəkləyir. Meyvələri şarvari formada, növbəti ilin yazında yetişir. Toxumla çoxaldılır. Toxumu tünd qırmızı rəngdə olub, uzunluğu 1,5 mm, eni 1,1 mm-dir.

Bitki rütubətə tələbkardır, işıqsevəndir. Nəmişli, qumlu torpaqlara, çayların sahillərinə, daşlı, quru yamaclara üstünlük verir. Dendrologiya İnstitutunda açıq şəraitdə yaxşı inkişaf edir, lakin çox sərt qışda bitkinin cavan budaqları məhv olur. Yazda bitki özünü bərpa edir.

Abşeron və Lənkəranda mədəni şəraitdə becərilir.

Dekorativ bitkidir, qış bağlarında, eləcə də park və bağlarda tək əkinlərdə, interyerlərdə geniş istifadə edilir.