Nəsibə Ağa İsmayıl qızı Hüseynova (25 yanvar 1926, Bakı) — Azərbaycan pediatrı, tibb elmləri doktoru (1969), professor (1970), Səhiyyə əlaçısı (1984), Əmək veteranı (1986), Əməkdar həkim (1990).[1][2]
| Nəsibə Hüseynova | |
|---|---|
| Nəsibə Ağa İsmayıl qızı Hüseynova | |
 | |
| Doğum tarixi | |
| Doğum yeri | Bakı, Azərbaycan SSR, ZSFSR, SSRİ |
| Vətəndaşlığı |
 SSRİ→ Azərbaycan |
| Milliyyəti | azərbaycanlı |
| Elm sahəsi | Pediatriya |
| Elmi dərəcəsi | Tibb elmləri doktoru |
| Elmi adı | Professor |
| Mükafatları |
   |
Nəsibə Hüseynova 25 yanvar 1926-cı ildə Bakı şəhərində Azərbaycan dili müəllimləri olan Ağa İsmayıl və Həvva Hüseynovların ailəsində anadan olmuşdur. O, 1943-cü ildə Azərbaycan Dövlət Tibb Universitetinə qəbul olmuş, 1948-ci ildə Moskva şəhərinin N. İ. Piroqov adına Tibb İnstitutunu bitirmişdir.[1]
Nəsibə Hüseynova 1948-ci ildən Azərbaycan Dövlət Tibb İnstitutunun Uşaq xəstəliklərinin propedevtikası kafedrasının kliniki ordinatoru vəzifəsini icra etmişdir. Daha sonra 1950–1951-ci illərdə Laçın şəhərindəki qadın və uşaq məsləhətxanasının müdiri vəzifəsində çalışmışdır. 1955–1959-cu illərdə Ana və Uşaqların Mühafizəsi Elmi-Tədqiqat İnstitutunda əvvəlcə baş elmi işçi, sonra şöbə müdiri olaraq fəaliyyət göstərmişdir.[1]
Nəsibə Hüseynova 1959-cu ildən ATU-nin Hospital pediatriya kafedrasının dosenti, 1970-ci ildən etibarən isə həmin kafedranın professorudur.[1]
1959–1961-ci illərdə SSRİ dövləti tərəfindən İraqa ezam olunmuş və orada müharibə şəraitində səhiyyə müşaviri işləmişdir. Bu şərəfli həkim işinə görə Nəsibə Hüseynova İraq hökuməti və Azərbaycan SSR-nin Səhiyyə Nazirliyi tərəfindən dəfələrlə Fəxri fərmanla təltif olunmuşdur.[1]
1970–1992-ci illərdə ATU-nin Müalicə-profilaktika fakültəsinin Uşaq xəstəlikləri kafedrasının müdiri olmuş, 1992-ci ildən hal-hazıradək həmin kafedranın professoru vəzifəsində çalışır.[1]
1971–1976-cı illərdə Bakı şəhərində baş pediator vəzifəsini icra etmişdir. 1970–1991-ci illərdə Səhiyyə Nazirliyinin IV Baş İdarəsinin baş pediatoru olmuşdur. Professor Nəsibə Hüseynova 1976-cı ildən hal-hazıra qədər Azərbaycan Respublikası Səhiyyə Nazirliyinin baş uşaq qastroenteroloqudur.[1]
1982-ci ildə prof. N. Hüseynova 17 saylı uşaq şəhər poliklinikasının bazasında Respublika Uşaq Qastroenteroloji Mərkəzinin yaradıcısı olmuş və uzun illər bu mərkəzdə elmi rəhbər kimi işləyərək, Azərbaycanın bütün regionlarından mədə-bağırsaq problemli uşaqlara yardım etmişdir.[1]
Professor Nəsibə Hüseynova əsasən, uşaqların qidalanması problemlərinə dair tədqiqatlar aparmış, 300-dən artıq elmi məqalənin və metodiki tövsiyələrin müəllifidir. Elmi rəhbər kimi 6 tibb elmləri namizədi hazırlayan Nəsibə Hüseynova 2013-cü ildə "Uşaq qastroenterologiya" dərsliyini, 2014-cü ildə isə "Pediatriyada dietoterapiya" dərs vəsaitini çap etdirmişdir.
Nəsibə Hüseynova 1951–1954-cü illərdə SSRİ Tibb Elmləri Akademiyasının Pediatriya İnstitutunda aspirant olmuş, namizədlik dissertasiyasını müdafiə edərək elmlər namizədi, 1969-cu ildən doktorluq dissertasiyasını müdafiə edərək tibb elmləri doktoru alimlik dərəcəsi almışdır.[1]
Professor Nəsibə Hüseynova Azərbaycan Pediatrlar Assosiasiyasının sədri və Türkdilli Ölkələrin Pediatrlar Cəmiyyətinin ilk prezidenti olmuşdur. [3]
Professor Nəsibə Hüseynova 1984-cü ildə "Səhiyyə əlaçısı" nişanı ilə, 1986-cı ildə "Əmək veteranı" medalı, 1990-cı ildə isə Azərbaycanın Əməkdar həkimi fəxri adı ilə təltif olunmuşdur.[1]
20 sentyabr 2010-cu ildə Azərbaycanda tibb təhsilinin və elminin inkişafındakı xidmətlərinə görə Azərbaycan Respublikası Prezidenti İlham Əliyevin Sərəncamı ilə "Tərəqqi" medalı ilə təltif edilmişdir.[1][2]
- ↑ 1 2 3 4 5 6 7 8 9 10 11 Əlamətdar və tarixi günlər təqvimi - 2021 (PDF). Bakı: Zərdabi Nəşr. 2020. səh. 36. ISBN 978 9952 542 04 2.
- ↑ 1 2 (Azərbaycan). president.az https://president.az/articles/754/print (#bare_url_missing_title). 2-9-2021 tarixində arxivləşdirilib.
- ↑ "Uşaq xəstələnən kimi antibiotik və qızdırmasalıcı dərmanlardan əsassız istifadə yanlışdır - MÜSAHİBƏ". ikisahil.az (az.). İstifadə tarixi: 2025-02-14.
Azərbaycan Sovet Ensiklopediyası, X cild