Musa Alı oğlu Əzimov (20 dekabr 1914, Dağ Kəsəmən, Qazax rayonu – 25 iyun 1992, Bakı) — Azərbaycanlı riyaziyyatçı alim, fizika-riyaziyyat elmləri doktoru, dosent.
| Musa Əzimov | |
|---|---|
| Əzimov Musa Alı oğlu | |
| Şəxsi məlumatlar | |
| Doğum tarixi | |
| Doğum yeri | Dağ Kəsəmən kəndi, Qazax rayonu, Azərbaycan SSR |
| Vəfat tarixi | |
| Vəfat yeri | Bakı, Azərbaycan |
| Elmi fəaliyyəti | |
| Elmi dərəcəsi | Fizika-riyaziyyat elmləri doktoru |
| Elmi adı | Dosent |
| İş yeri | Azərbaycan Dövlət Universiteti, Azərbaycan Dövlət Pedaqoji İnstitutu. |
|
|
|
| Təltifləri |
 |
Musa Əzimov 20 dekabr 1914-cü ildə Qazax rayonunun Dağ-Kəsəmən kəndində anadan olmuşdur. 1933-cü ildə V.İ.Lenin adına Azərbaycan Dövlət Pedaqoji İnstitutunun fizika-riyaziyyat fakültəsinə daxil olmuş, 1937-ci ildə həmin fakültəni I dərəcəli diplomla bitirərək riyaziyyatçı və riyaziyyat müəllimi ixtisasına yiyələnmişdir.
1935–1937-ci illərdə Azərbaycan Dövlət Pedaqoji İnstitutunun “Riyaziyyat” kafedrasında böyük laborant vəzifəsində çalışmışdır. 1938-ci ildə S.M.Kirov adına Azərbaycan Dövlət Universitetinin aspiranturasına daxil olmuş, eyni zamanda həmin universitetin “Diferensial tənliklər” kafedrasında assistent kimi fəaliyyət göstərmişdir.
Musa Əzimov 1946-cı ildə Azərbaycan Dövlət Universitetində riyaziyyat müəllimi vəzifəsinə təyin olunmuşdur. 1948-ci ildə S.M.Kirov adına Azərbaycan Dövlət Universitetində “Bir sıra xətti diferensial tənliklər sistemi üçün Koşi məsələsi haqqında” mövzusunda namizədlik dissertasiyasını müdafiə etmişdir. 26 mart 1949-cu ildə Ali Attestasiya Komissiyasının qərarı ilə fizika-riyaziyyat elmləri namizədi elmi dərəcəsini almışdır.
28 yanvar 1950-ci ildə Ali Attestasiya Komissiyasının qərarı ilə “Riyazi analiz” kafedrası üzrə dosent elmi adına layiq görülmüşdür. 1974-cü ildə “Bir sıra elastiklik nəzəriyyəsinin məsələləri üçün əks olunma üsulunun tətbiqi” mövzusunda doktorluq dissertasiyasını müdafiə edərək fizika-riyaziyyat elmləri doktoru elmi dərəcəsini almışdır.
Musa Əzimov müxtəlif illərdə aşağıdakı vəzifələrdə çalışmışdır:
- 1946–1950 — Azərbaycan Dövlət Universitetində müəllim, dosent və kafedra müdiri
- 1950–1957 — Kirovabad şəhəri H.Zərdabi adına Pedaqoji İnstitutunda “Riyazi analiz” kafedrasının dosenti və müdiri
- 1957–1959 — Kirovabad Pedaqoji İnstitutunda kafedra müdiri
- 1959–1963 — V.İ.Lenin adına Azərbaycan Pedaqoji İnstitutunda “Riyazi analiz” kafedrasının müdiri
- 1963–1976 — RDYNMİ-nin Bakı filialında dosent
- 1976–1977 — Azərbaycan SSR Elmlər Akademiyasının Riyaziyyat və Mexanika İnstitutunda böyük elmi işçi
- 1977-ci ildən — Azərbaycan Dövlət Pedaqoji İnstitutunda dosent
Musa Əzimov 40-dan çox elmi məqalənin və dərs vəsaitinin müəllifidir. Onun elmi araşdırmaları əsasən riyazi analiz, diferensial tənliklər və elastiklik nəzəriyyəsinə həsr olunmuşdur.
Musa Əzimov aşağıdakı orden və medallarla təltif edilmişdir:
- I dərəcəli “Vətən müharibəsi” ordeni
- “Qırmızı ulduz” ordeni
- “Qafqaz uğrunda” medalı
- “Budapeşt uğrunda” medalı
- “Vyana uğrunda” medalı
- “Cəsurluğa görə” medalı
Musa Əzimov 25 iyun 1992-ci ildə Bakı şəhərində vəfat etmişdir.