Muğan Məmmədov

Məmmədov Muğan Azad oğlu 15 dekabr 1942-ci ildə Laçın rayonunun Leninkənd (indiki Qarakeçdi) kəndində anadan olub. 1950-ci ildə birinci sinifə daxil olub. 1958-ci ildə Leninkənd kənd natamam orta məktəbini bitirdikdən sonra Şamaxı Kənd Təsərrüfatı Texnikomuna daxil olub.Texnikomu bitirdikdən sonra 1962-ci ildə Azərbaycan Dövlət Universitetinin (hazırkı BDU) fizika fakültəsinə daxil olub. Təhsil dövründə fitri istedadına və elmi bacarıqlarına görə xüsusi təqaüdə layiq görülüb. IV kursda T. Şevçenko adına Kiev Dövlət Universitetində diplom işini yazıb. 1967-ci ildə ADU-nun fizika fakültəsini fərqlənmə diplomu ilə bitirib və Universitetin Elmi Şurasının qərarıyla aspiranturaya göndərilib. Həmin il yüksək göstəricilərlə T.Şevçenko adına Kiev Dövlət Universitetinin aspiranturasında fizika eliminin müasir sahəsi olan "Plazmanın nəzəri problemləri" mövzusunda elmi işlə məşğul olub. 1969-1970 ci illərdə Xarkov Hərbi Radiotexnika Akademiyasinada xüsusi hərbi xidmətdə olduğu zaman hərbi texnikaya aid bir neçə əsəri hərbi akademiyada nəşr edilib.

1971-ci ildə aspiranturanı vaxtından əvvəl bitirərək "Məhdud plazma-elektron seli sistemi dayanıqsızlığının tədqiqi" mözusunda namizədlik işini S.M.Kirov adına ADU-nun Elmi Şurasına təqdim edir. Müasir elmi nəaliyyətlərə malik olan  əsər Elmi Şurada yüksək qiymətləndirilir və M.Məmmədova fizika-riyaziyyat elmləri namizədi adı verilir.

   1971-ci ildə xüsusi təyinatla təhsil aldığı universitetdə elektronika kofedrasına müəllim təyin olunur. Sonrakı illərdə "Atom və Molekulların Kvant Mexanikası " kofedrasının assistenti, baş müəllimi, dossenti olub. Pedaqoji fəaliyyətilə yanaşı, elmi fəaliyyətini də davam etdirərək Xarkov, Leninqrad, Kiev, Moskva və Tbilisi şəhərlərində tanınmış elmi mərkəzlərində  elmi məruzələr edib.

1976-1977-ci illərdə dünyanın tanınmış elm mərkəzlərindən olan Almaniya Federativ Respublikasında RDUR Universitetində işlədiyi dövrdə Amerika, Almaniya, İngiltərə, Çexoslovakiya alimləri ilə iş birliyi quraraq dörd elmi əsərin müəllifi olub.  Dünyada tanınmış fizik, Nobel mükafatçısı  L.D.Landaunun bir əsərinə elmi əlavələr edib. Ukranyanın məşhur fiziki A.M.Fedorçonko ilə birgə apardığı elmi işlər üzrə  əsərləri üç müxtəlif dildə Ukranya Elmlər Akademyasının nəşiriyyatında  nəşr olun.

Muğan Məmmədov  33 elmi əsərin və "Plazma Fizikası və onun tətbiqi perspektivləri "  kitabının müəllifidir. O, Azərbaycanda Plazma Nəzəriyyəsi ilə məşğul olan ilk alimlərdən biri olub.  

Doktorluq işi üzərində çalışdığı və həyatının çiçəkləndiyi bir dövrdə qəflətən 27 fevral 1985-ci ildə vəfat edib

Ölmündən sonra 1991-ci ildə işıq üzü görən “Plazma fizikası və onun tətbiq prespektivləri” adlı kitabı tərəqqipərvər bəşəriyyətin gələcək taleyi üçün mühüm rol oynayan  "istilik nüvə sintez reaksiyalarının" idarə edilməsi problemlərin həll edilməsinə həsr edilmişdir.

Ailəli olub, üç övladı var