Minirə Dilbazi

Minirə Xulusi qızı Dilbazi 1937-ci ildə Bakı şəhərində anadan olmuşdur. Əslən Qazax rayonunun Xanlıqlar kəndinin Dilbazilər soyundandır. Ü. Hacıbəyov adına Bakı Musiqi Akademiyasını (Azərbaycan Dövlət Konservatoriyasının) fortepiano ixtisası üzrə müvəffəqiyyətlə bitirdikdən sonra 1961-ci ildən ümumi fortepiano kafedrasında pedaqoji fəaliyyətə başlamışdır (müəllim, baş müəllim, dosent). 1993-cü ildən indiyə qədər professor və kafedra müdiri vəzifələrində çalışır. İşlədiyi 40 illik fəaliyyət müddətində onun sinfini 240 nəfər bitirmişdir. Bu tələbələrdən bəziləri aşağıda qeyd olunan şəxslərdir:

• BMA-nın 1-ci prorektoru, kafedra müdiri, sənətşünaslıq doktoru, professor Elxan Babayev,
• Sənətşünaslıq doktoru, əməkdar incəsənət xadimi, ABİ-nın katibi, kafedra müdiri, professor Ramiz Zöhrabov,
• Kafedra müdiri, sənətşünaslıq namizədi, professor Səadət Seyidova,
• İfaçılıq fakültəsinin dekanı, professor Nəzmiyə Abbaszadə,
• Fəlsəfə elmləri doktoru Yevgeni Şevtsov,
• Respublikanın əməkdar artistləri Rumiyyə Kərimova, Rasim Abdullayev, Muxtar Məlikov, bəstəkar Cavanşır Quliyevi və başqaları.

M. X. Dilbazinin pedaqoji fəaliyyəti elmi-tədqiqat işi ilə sıx əlaqələndirilir. 1982-ci ildə Moskvada Ümumittifaq Elmi-Tədqiqat İncəsənət İnstitutunda namizədlik dissertasiyasını müvəffəqiyyətlə müdafiə etdikdən sonra o, sənətşünaslıq namizədi dərəcəsi almışdır.

M. X. Dilbazi 30-a yaxın elmi və metodiki işin müəllifidir. Onun aşağıdakı elmi işləri xüsusilə qeyd edilməlidir: "Bakının musiqi keçmişindən (XIX əsrin ikinci yarısı – XX əsrin əvvəli)" monoqrafiyası. "İşıq", Bakı, 1985, 136 s. Bu kitabda ilk dəfə tədqiq olunmamış arxiv materialları elmi dövriyyəyə daxil edilir və "Azərbaycanın musiqi tarixi", "Fortepiano ifaçılığı tarixi" fənnlərinin tədrisində dərs vəsaiti kimi istifadə olunur.

"Tarixin səhifələri Peterburq estradasında" elmi məqaləsi – "Sovetskaya muzıka" jurnalı, Moskva – 1993, № 12 s.136–137. Bu məqalədə müəllif rus oxucusuna Azərbaycan musiqi mədəniyyətinin tarixinə dair maraqlı məlumatlar təqdim etmişdir.

Elmi-metodiki işləri arasında 6 metodik broşür, o cümlədən 3 tədris proqramı nəşr edilmişdir. Bunlardan "Müasir dövrdə ümumi fortepiano tədrisinin təkmilləşdirilməsinə dair" (Bakı, 1995, 42 s.) metodiki işi və başqaları qeyd edilə bilər.

Müxtəlif ixtisaslı peşəkar musiqiçilərin yetişdirilməsində "Ümumi fortepiano fənninin rolu və əhəmiyyəti" mövzusunda 1-ci Ümumrespublika elmi-metodiki konfransının keçirilməsinə müəllim, aspirant və tələbələrin cəlb olunmasında M. X. Dilbazinin təşkilatçılıq və elmi bacarığı xüsusi olaraq qeyd edilməlidir.

Azərbaycanın şəhər və rayonlarında ziyalıların, məktəblilərin və zəhmətkeşlərin qarşısında tələbələrinin iştirakı ilə keçirdiyi leksiya-konsertlər yerli qəzetlərdə dəfələrlə qeyd edilmiş və buna görə M. X. Dilbazi bir çox Fəxri Fəpmanlarla təltif olunmuşdur. Azərbaycan təhsilinin inkişafına göstərdiyi xidmətlərinə görə Azərbaycan Resplulikasi Prezidenti tərəfindən əməkdar müəllim adına layiq görülmüşdür.

Xüsusilə qeyd etmək lazımdır ki, M. X. Dilbazi Bakı Xalq Konservatoriyası təşkil olunduğu gündən ümumi fortepiano fənnini tədris etmişdir. Gənclər və zəhmətkeşlərin musiqi-estetik tərbiyəsində fəal iştirakına görə AHİŞ-in Fəxri Fərmanı ilə təltif olunmuşdur. Respublikanın əmək veteranıdır.

• [1]