Millət (qəzet, Ukrayna)

İlk sayını 20 Yanvar hadisələrinin ildönümünə həsr edən qəzet Ukraynada Azərbaycan dilində nəşr olunan ilk mətbu orqan olmaqla yanaşı, sonradan rus dilində yayımlanmaqla Azərbaycan həqiqətlərini Ukraynada yaşayan digər xalqlara da çatdırır. О dövrdə, əsasən, Dağlıq Qarabağ həqiqətləri haqqında obyektiv analitik yazılar dərc etməklə erməni xəyanətini ifşa edən "Millət" qəzeti Krımda güclü mövqeyə malik olan erməni diasporunun dəfələrlə hədə-qorxuları ilə üzləşməsinə baxmayaraq, fəaliyyətini daha da genişləndirmişdir. Belə ki, ilk saylarından etibarən Krım erməni diasporunun hədəfinə çevrilmişdir.

Ötən illər ərzində Azərbaycanın qədim tarixini, zəngin mədəniyyətini və adət-ənənələrini səhifələrində işıqlandırmaqla çoxmilyonlu Ukrayna ictimaiyyəti arasında Azərbaycan haqqında informasiya bolluğu yaradan "Millət" qəzeti hər sayında Dağlıq Qarabağ hadisələri və Ermənistanın işğalçılıq siyasəti haqqında dürüst analitik yazılarla çıxış etmişdir. Qəzet həmçinin, mütəmadi olaraq Azərbaycanla Ukrayna arasında mövcud olan iqtisadi, siyasi, mədəni, elm və təhsil əlaqələrinin dinamik inkişafına geniş yer ayırmışdır. Krımın azadlığı uğrunda qəhrəmanlıq göstərən azərbaycanlıların həyatı haqqında maraqlı yazıların dərc olunması ənənə halını almışdır.

Ukrayna azərbaycanlılarının mədəni-maarifçilik cəmiyyəti "Ocaq"ın təsis etdiyi "Millət" qəzeti (yanvar, 1991-ci il, Yalta) ilk sayından etibarən Azərbaycanla bağlı həqiqətləri əks etdirən, onun problemlərinin həllinə çalışan mətbuat orqanı olduğunu təsdiqlədi. Sonralar Krım-Azərbaycan cəmiyyətinin orqanı kimi tanınan "Millət" qəzeti klassik Azərbaycan jurnalistikasının "Dildə birlik, əməldə birlik!" şüarına əsaslanmış, görkəmli türk mütəfəkkiri İsmayıl Qaspıralının ideyalarını rəhbər tutmuş, Ukrayna-Azərbaycan əlaqələrinin daha da möhkəmləndirilməsini özünə vəzifə bilmişdir.

1991-ci ilin yanvar sayı Azərbaycan həqiqətlərinə ayna tutan dəyərli qəzet nüsxəsidir. Burada "Quran"dan fraqmentlərin verilməsi, "20 Yanvar" gününün qanlı hadisələrini əks etdirən məqalələr və fotomaterialların geniş yer alması qəzetin redaksiya heyətinin Azərbaycana bağlılığını əsaslı şəkildə təsdiqləmişdir. Qəzetin rus dilində çıxması isə onun oxucu auditoriyasına, informasiya obyektivliyinin təmin olunmasına meylin göstəricisidir. Qəzetin yalnız azərbaycanlılar üçün deyil, həm də Krımda yaşayan digər xalqlar üçün nəzərdə tutulduğunu bilən müəlliflər "20 yanvar" faciəsinin tarixi köklərini şərh edən analitik məqalələrə üstünlük vermiş, Ermənistan-Azərbaycan qarşıdurmasının səbəblərini və səbəbkarlarını ifşa etməyi vacib saymışlar. Bu baxımdan "Millət"in birinci sayındakı məqalələr analitik dəyəri, informasiya bolluğu, hadisələrin təqdimi zamanı obyektivlik və bitərəflik nümayiş etdirmə cəhdi ilə diqqəti cəlb edir. Bəzilərinin adlarına diqqət edəndə də bunu görmək olurː

• "Кто разжигает конфликт?" (Münaqişəni kim qızışdırır)
• "20 января – черный день в истории Азербайджана" (20 yanvar — Azərbaycan tarixində qara gün)
• "Так говорят о событиях в Азербайджане" — (Azərbaycanda baş verənlər haqqında belə deyirlər)
• "Азербайджан – таковы мы сегодня" (Azərbaycan — bu gün biz beləyik)
• "Азербайджан – земля спасения" (Azərbaycan — qurtuluş ölkəsi)

Qəzetin müxtəlif saylarında elan və reklamların verilməsi, "Ocaq" cəmiyyətinin gördüyü işlərə aydınlıq gətirməsi, sosial-mədəni tədbirlər haqqında yazılar dərc etdirməsi də mühüm maraq doğurur. "Millət"in birinci sayında "Oxuculara ünvanlanan "Bizim oxuculara" adlı yazıda onun məqsəd və vəzifələri açıqlanmış, redaksiya heyətinin tutacağı yol müəyyənləşdirilmişdir. "Millət" qəzeti həm də Krım azərbaycanlılarının ictimai-mədəni cəmiyyəti olan "Ocaq"ın məqsəd və məramını açıqlayır, buradakı həmvətənlərin birlik və bərabərlik arzularını ifadə edirdi.^[1]

• Крымская азербайджанская община