Mayman (söök)

Mayman — Altay türkləri arasında ən çoxsaylı sööklərdən (nəsil birliklərindən) biri. Bu söök iki ekzoqam bölmədən ibarətdir: qara mayman və göy mayman. Altay dilində n və m fonemləri bir-birini əvəz edə bildiyinə görə bir qrup altaylı özünü nayman, digər qrup isə mayman adlandırır. Hər iki forma eyni mənşəyi ifadə edir. Bununla belə, altaylılar arasında ən çox işlənən ad maymandır. Maymanlar əsasən Altay Respublikasının mərkəzi bölgələrində — Onquday, Şebalin və Ust-Koksa rayonlarında, həmçinin respublikanın paytaxtı Qorno-Altaysk şəhərində məskunlaşmışlar. Etnogenetik rəvayətlərdə pura / bura maymanların adı da xatırlanır.^[1]