Matienlər və ya matianlar (q.yun. ματιηνοι, ματιανοι, lat. matieni, matiani) — qədim dövrdə Urmiya gölü ətrafında yaşamış tayfa, Atropatena dövlətinin sakinləri. E.ə. VI əsrdən e.II əsrinədək, yəni təxminən 8 əsr ərzində, 9 antik müəllifin yazılarında matientlər Urmiyaətrafı ərazilərdə qeyd olunub.
E.ə.VI - V əsr mənbələrində Miletli Hekateyin və Herodotun məlumatlarinda matienlərin məskunlaşma ərazisi geniş idi. Belə ki, onların vilayətlərindən şimal-qərbdə Araks (Araz) çayı mənbə alırdı, bir qədər cənubda Tiqr (Dəclə) çayı axırdı, sonra Böyük Zab, sonra onların vilayətinin ərazisindən mənbə alan Kiçik Zab axırdı, vilayətin ən cənub sərhədi Diyala çayının mənbələrinə çatırdı. [1][2] Bundan başqa matienlərin Halis (Qızılirmaq) çayı axdığı ərazilərdə də məskunlaşmaları haqda məlumatlar mövcuddur. Daha sonrakı dövrdə mənbələrin məlumatlarına əsaslanaraq matienləri Urmiya gölünün şimal, şərq və cənub sahillərində məskunlaşdığını demək olar.