Malikanə, saray, qəsr, imarət, villa — hökmdarlar üçün adətən şəhərlərdən kənarda inşa edilmiş balaca saray və pavilyon.[1]
Anadolu bəylikləri və bəylərbəyləri (qubernator) dövründə təhlükələrə qarşı müdafiə strukturları ilə təchiz edilmiş bəzi tikililərə də malikanə demişdilər. Bu formada olan malikanələr adətən şəhərlərin yüksək yerlərində tikilmiş qəsrlərin daxilində yerləşir və daxili qala kimi fəaliyyət göstərirdilər.
Paris və Fransanın digər şəhərlərində, Fransız inqilabınadək olan dövrdə, ayrıca yerləşən və varlı şəxslərə məxsus şəhər yaşayış evi malikanə (ing. hôtel particulier) adlanırdı. Tipik Paris malikanəsi küçədən dəmir barmaqlıqlarla və çınqılla örtülmüş giriş həyəti ilə ayrılır, binanın arxa hissəsində isə bağ yerləşirdi.
Aristokratiyaya və ruhanilərə məxsus ən qədim malikanələr orta əsr memarlıq xüsusiyyətlərini hifz edib saxlamışdır; bu tip tikililərin əsas hissəsi isə XVII–XVIII əsrlərə aid edilir.[2]
Moskvanın tarixi mərkəzində (Xamovniki, Arbat, Basmannı və digər rayonlarda) xeyli sayda yaşayış malikanəsi günümüzədək hifz edilərək saxlanılmışdır. XIX əsrin sonu — XX əsrin əvvəllərinə aid malikanələr şəhər ərazisində, o cümlədən Bağ halqasından kənarda da mövcuddur. İnqilabdan əvvəlki dövrə aid Moskva malikanələrinin böyük əksəriyyəti hazırda səfirliklər, muzeylər və ofislər tərəfindən istifadə olunur. Moskvanın bir çox malikanə-tipli mülkləri hasarlanmış əraziyə, tarixi darvazalara və hündür divarlara malikdir ki, bunlar da özlüyündə memarlıq və tarixi dəyər daşıyır.
XIX əsrdə Avropa tipli klassizm üslubunda malikanə evləri geniş yayılmışdır (məsələn, Paşkovun evi). Bununla yanaşı, əsas yaşayış binası, fligellər və parkdan ibarət təntənəli mülk kompleksləri də mövcud olmuşdur. Sonrakı dövrlərdə ampir üslubu üstünlük təşkil etməyə başlamışdır. XIX əsrin sonlarına aid bəzi malikanələrdə isə memarlıq baxımından zadəgan mülkləri ilə tacir evləri üslublarının qarışığı müşahidə olunur.
2010-cu illərin ikinci yarısı və 2020-ci illərin birinci yarısında memarlar "malikanə" terminini çoxmənzilli yaşayış binalarına da şamil etməyə başlamışdılar. Yüksək tavanlara, yeraltı parkinqə, hasarlanmış (çox vaxt mühafizə olunan) əraziyə malik olan bu tip binalar yaşayış massivlərində yerləşən analoji tikililərlə müqayisədə daha komfortlu və nümayişkaranə hesab olunur. Bununla belə, bu cür tikililər sözün həqiqi mənasında malikanə anlayışına tam müvafiq gəlmir.
Bu kontekstdə "malikanə" anlayışının müasir istifadəsi ilə tarixi-memarlıq mənası arasında terminoloji fərq mövcuddur. Klassik mənada malikanə ayrıca yerləşən, adətən bir ailəyə məxsus, memarlıq və planlaşdırma baxımından müstəqil yaşayış tikilisi hesab olunur. Müasir dövrdə isə bu termin daha çox marketinq və prestij məqsədilə tətbiq edilir və funksional, tarixi və hüquqi baxımdan ənənəvi malikanə anlayışı ilə üst-üstə düşmür.
- ↑ // Энциклопедический словарь Брокгауза и Ефрона: В 86 томах (82 т. и 4 доп.). СПб.. 1890–1907.
- ↑ "Французские дворцы и особняки XVII-XVIII веков | История архитектуры". 11 iyul 2021 tarixində arxivləşdirilib. İstifadə tarixi: 11 iyul 2021.
- Классическая Москва. Николаев Е. В. 1975
- Вера Николаевна Жакова, «Судьба особняка», 1933 год.
- Константин Алексеевич Коровин, «Московские особняки», 1935 год.
- Особенный // Толковый словарь живого великорусского языка : в 4 т. / авт.-сост. В. И. Даль. — 2-е изд. — СПб. : Типография М. О. Вольфа, 1880—1882.
- Плец // Толковый словарь живого великорусского языка : в 4 т. / авт.-сост. В. И. Даль. — 2-е изд. — СПб. : Типография М. О. Вольфа, 1880—1882.
- // Энциклопедический словарь Брокгауза и Ефрона: В 86 томах (82 т. и 4 доп.). СПб.. 1890–1907.
- Historic Mansions and Estates in Latin America
- Estonian Manors Portal the English version introduces 438 well-preserved historical manors (mansions, estates) in Estonia