Mahmud Nəbiyev

Mahmud Nəbiyev 1957-ci il mayın 29-da Naxçıvan şəhərində ziyalı ailəsində anadan olmuşdur. Atası Yusif Mustafa oğlu Nəbiyev dövrünün ictimai-siyasi xadimi kimi fəaliyyət göstərərək 1970–1979-cu illərdə Naxçıvan MR-nin Nazirlər Sovetinin sədri olmuşdur. Mahmud Nəbiyev Naxçıvan şəhər 1 saylı orta məktəbində təhsil almışdır. 1981-ci ildə Azərbaycan Dövlət Universitetinin hüquq fakültəsini bitirmiş və həmin ildən prokurorluq orqanlarına işə qəbul olunaraq 1987-ci ilədək müxtəlif prokurorluq orqanlarında, o cümlədən Sabunçu Rayon Prokurorluğunda stajor, Bakı Şəhər Prokurorluğunun ümumi nəzarət üzrə prokuror köməkçisi, Səbail rayon prokurorunun müavini kimi vəzifələrdə işləmişdir. Daha sonra xidməti fəaliyyətini 1987–1993-cü illərdə Gəncə şəhər Nizami rayon prokuroru, 1993–1994-cü illərdə Azərbaycan Nəqliyyat prokurorunun müavini, 1994–2000-ci illərdə Sumqayıt şəhər prokuroru kimi davam etdirmişdir.

Azərbaycan Respublikası Prezidenti Heydər Əliyevin 2000-ci ildə imzaladığı Sərəncama əsasən Ağır Cinayətlərə Dair İşlər üzrə Azərbaycan Respublikası Məhkəməsinin sədri təyin edilmiş, 2011-ci ilədək həmin vəzifədə çalışmış, Azərbaycan Respublikası Prezidenti İlham Əliyevin 2011-ci ildə imzaladığı Sərəncama əsasən Bakı Ağır Cinayətlər Məhkəməsinin sədri təyin edilmiş və 2022-ci ilin dekabr ayınadək həmin vəzifəni icra etmişdir.

Prokurorluq və Ədliyyə orqanlarında qüsursuz xidmətlərinə görə müxtəlif illərdə Azərbaycan Respublikası Baş Prokurorluğunun və Ədliyyə Nazirliyinin mükafatları ilə təltif olunmuşdur. İstər məhkəmə, istərsə də prokurorluq orqanlarında çalışdığı dövrlərdə hüquqi dövlət quruculuğunda, vətəndaş cəmiyyətinin formalaşdırılmasında, cinayətkarlığa qarşı mübarizədə, xüsusilə bir sira dövlət çevirilişi cəhdlərində iştirak etmiş və digər ağır cinayətlər törətmiş şəxslərin cinayət məsuliyyətinə cəlb olunaraq barələrində ədalətli məhkəmə hökmlərinin çıxarılmasında xidmətləri olmuşdur.

Erməni təcavüzü və blokada şəraitində Naxçıvanın müdafiəsində, o cümlədən Naxçıvan şəhərinə bir neçə təyyarə yardımın göndərilməsində fəal iştirak etmişdir.

Azərbaycanın əməkdar hüquqşünası Mahmud Yusif oğlu Nəbiyev 2022-ci il dekabr ayının 7-də Bakı şəhərində vəfat etmişdir.^[4][5][6]

4 övladı, 9 nəvəsi vardır.

• Azərbaycan Respublikası Prezidenti Ilham Əliyevin 21 noyabr 2008-ci il tarixli sərəncamı ilə 3-cü dərəcəli "Vətənə Xidmətə görə" ordeni ilə təltif edilmişdir.
• Azərbaycan Respublikası Prezidenti Ilham Əliyevin 29 may 2012-ci il tarixli sərəncamı ilə 2-ci dərəcəli "Vətənə Xidmətə görə" ordeni ilə təltif edilmişdir.
• Azərbaycan Respublikası Prezidenti İlham Əliyevin 25 may 2017-ci il tarixli sərəncamı ilə Azərbaycan Respublikasının Əməkdar hüquqşünası fəxri adı verilmişdir.^[7][8][9]
• Azərbaycan Respublikası Prezidenti İlham Əliyevin 27 may 2019-cu il tarixli sərəncamı ilə Azərbaycan Xalq Cümhuriyyətinin 100 illiyi (1918–2018) yubiley medalı ilə təltif edilmişdir.
• Azərbaycan Respublikası Baş Prokurorloğunun 5 sentyabr 2000-ci il tarixli əmri ilə "Prokurorluğun Fəxri İşçisi" döş nişanı ilə təltif edilmişdir.
• Azərbaycan Respublikası Ədliyyə Nazirliyinin 22 noyabr 2004-cü il tarixli qərarı ilə "Ədliyyə Nazirliyinin Rəmzi Medalı" ilə təltif edilmişdir.

1. ↑ "Bakı Ağır Cinayətlər Məhkəməsinin sədri vəfat etdi". 2024-03-01 tarixində arxivləşdirilib. İstifadə tarixi: 2024-11-26.
2. ↑ Mahmud Nəbiyevə "Əməkdar hüquqşünas" fəxri adı verilib
3. ↑ Bakı Ağır Cinayətlər Məhkəməsinə yeni sədr təyin edilib
4. ↑ "Bakı Ağır Cinayətlər Məhkəməsinin sədri Mahmud Nəbiyev vəfat edib". 2022-12-12 tarixində arxivləşdirilib. İstifadə tarixi: 2024-11-26.
5. ↑ Bakı Ağır Cinayətlər Məhkəməsinin sədri Mahmud Nəbiyev vəfat edib
6. ↑ Bakı Ağır Cinayətlər Məhkəməsinin sədri Mahmud Nəbiyev vəfat edib
7. ↑ Dövlət başçısı Mahmud Nəbiyevə "Əməkdar hüquqşünas" fəxri adı verdi
8. ↑ "Mahmud Nəbiyevə "Əməkdar hüquqşünas" fəxri adı verildi". 2017-05-27 tarixində arxivləşdirilib. İstifadə tarixi: 2024-11-26.
9. ↑ Prezident İlham Əliyev Mahmud Nəbiyevin "Əməkdar hüquqşünas" fəxri adının verilməsi haqqında sərəncam imzalayıb