Mahmud Həmid oğlu Həmzəyev (31 yanvar 1949 – 9 noyabr 2023) — Azərbaycan Silahlı Qüvvələrinin general-mayoru, 2-ci Ordu Korpusunun sabiq komandiri.
| Mahmud Həmzəyev | |
|---|---|
| Hərbi fəaliyyəti | |
| Rütbəsi |
 General-mayor |
| Döyüşlər | Birinci Qarabağ müharibəsi |
| Təltifləri |
         |
Doğum tarixi: 31 yanvar 1949, Qazax rayonu, Azərbaycan SSR.[1] 1966–1971-ci illərdə Azərbaycan Neft-Kimya İnstitutunda təhsil alıb. 1984–1987-ci illərdə Moskva şəhərində M.Frunze adına Hərbi Akademiyada təhsil alıb. Qazax Xeyriyyə İctimai Birliyinin İdarə Heyətinin üzvü.[2]
1971–1973-cü illərdə SSRİ ordusunda xidmət edib. 1976–1980-ci illərdə tağım komandiri, əlahiddə pulemyot-artilleriya, hərbi hissə komandiri vəzifələrinə qədər yüksəlib. 1986–1987-ci illərdə əlahiddə tank alayı komandirinin müavini vəzifəsində xidmət edib. 1987–1992-ci illərdə Pribaltika Hərbi Dairəsində I dərəcəli təlim mərkəzinin rəisi vəzifəsində xidmət edib. 1989-cu ildə SSRİ Müdafiə Nazirliyi tərəfindən polkovnik hərbi rütbəsinə layiq görülüb. SSRİ dağıldıqdan sonra 1992-ci ildə təqaüdə çıxıb.[3]
1993-cü ilin sonunda Azərbaycana gələrək ordu sıralarında xidmətə başlamışdır. Xidməti müddətində briqada komandiri, ordu korpusunun qərargah rəisi, ordu korpusunun komandiri vəzifələrində qulluq edib.[4]
2002-ci ildə Azərbaycan Respublikası Prezidentinin sərəncamı ilə general-mayor hərbi rütbəsinə layiq görülüb.[5]
General-mayor Mahmud Həmzəyev Azərbaycan Prezidenti Heydər Əliyevin 24 iyun 2003-cü il tarixli 887 nömrəli Sərəncamına əsasən "Azərbaycan Bayrağı" ordeni ilə təltif edilib.[6]
2010-cu ilin əvvəllərində öz xahişi ilə ordu sıralarından tərxis olunub.
Azərbaycan Kinematoqrafçılar İttifaqının İdarə Heyətinin üzvü, Əməkdar incəsənət xadimi, kinorejissor Ziya Şıxlinski Beyləqan korpusunun sabiq komandiri, general-mayor Mahmud Həmid oğlu Həmzəyevə həsr olunmuş sənədli film üzərində işləyir.[8]
Noyabrın 9-da uzunsürən xəstəlikdən sonra 74 yaşında vəfat edən ehtiyatda olan general-mayor Həmzəyev Mahmud Həmid oğlu İkinci Şəhidlər xiyabanında dəfn olunub. Dəfn mərasimində müdafiə nazirinin birinci müavini - Azərbaycan Ordusunun Baş Qərargah rəisi, general-polkovnik Kərim Vəliyev və Müdafiə Nazirliyinin digər rəhbər heyəti, mərhumun ailə üzvləri, yaxınları, döyüş yoldaşları və ictimaiyyət nümayəndələri iştirak ediblər.[9]
- ↑ General mayor Mahmud Həmzəyevi 70 illik yubiley münasibətilə təbrik edirik
- ↑ General-mayor Mahmud Həmzəyevi 70-illik yubiley münasibətilə təbrik edirik — qazaxib.az
- ↑ Mahmud Həmzəyevin 70-illik yubileyinə həsr olunmuş tədbir
- ↑ Beyləqanda Mərkəzi stadionun açılışı olmuşdur – AZERTAC
- ↑ Azərbaycan Respublikasının “...” qanunu — e-qanun.az
- ↑ 887 – Azərbaycan Respublikası Müdafiə Nazirliyinin hərbi qulluqçularının təltif edilməsi haqqında
- ↑ e-qanun.az — hüquqi akt
- ↑ Ziya Sixlinski general-mayor Mahmud Həmzəyev haqqında film çəkir — AKI.az
- ↑ General-mayor Mahmud Həmzəyev son mənzilə yola salınıb — AZERTAC