Mahizər Hacıyeva 1918-ci ildə Şuşa şəhərində anadan olmuşdur. O, 1937-ci ildə Moskva Tekstil texnikumunu bitirmişdir.

Mahizər Hacıyeva 1937-1938-ci illərdə “Azərtrikotaj” fabrikində texnik-texnoloq, 1938-1941-ci illərdə həmin fabrikinin Staxanovçular məktəbinin direktoru, 1941-1942-ci illərdə trikotaj atelyesinin direktoru olmuşdur. 1942-1943-cü illərdə “Qızıl Ulduz” kombinatının baş mühəndisi, “Azərbaycan Fərdi Tikiş” fabrikinin direktoru, 1946-1947-ci illərdə Azərbaycan BKŞR Yüngül Sənaye şöbəsində müdir müavini və fabrikin direktoru vəzifələrində çalışmışdır.

Mahizər Hacıyeva da 1947-ci ildə repressiya dalğasının qurbanlarından olmuş, lakin 1956-cı ildə aministiya alaraq bəraət qazanmışdır. O, 1949-1953-cü illərdə Qazaxıstan SSR Baykadan kənd orta məktəbində müəllim, 1953-1956-cı illərdə Özbəkistan SSR Marqelam şəhərində orta məktəbdə və texnikumda müəllim işləmişdir.

Daha sonra o, Azərbaycan Yüngül Sənaye Nazirliyi trikotaj sənayesi şöbəsinin rəisi, 1956-1957-ci illərdə Dəriqalantereya fabrikinin baş mühəndisi, 1957-65-ci illərdə Yüngül Sənaye idarəsinin tikiş-trikotaj şöbəsinin rəisi, 1965-1973-cü illərdə tikiş-trikotaj sənayesi idarəsinin rəisi, 1973-1976-cı illərdə Volodarski adına Qırmızı Əmək Bayrağı ordenli tikiş fabrikinin direktoru vəzifələrində çalışmışdır.

Mahizər Hacıyeva 1976-1979-cu illərdə Azərbaycan SSR Yüngül sənaye nazirinin müavini işləmişdir.

O, bir sıra orden və medallara, eləcə də SSRİ Yüngül Sənaye Nazirliyinin və Respublika Ali Sovetinin Fəxri fərmanlarına layiq görülmüş, Əmək veteranı olmuşdur.

Mahizər Hacıyeva 1995-ci ildə vəfat etmişdir.