Azərbaycan Milli Kitabxanası

Kitabxana Azərbaycan Respublikası Xalq Maarif Komissarlığının 13 noyabr 1920-ci il tarixli 53 nömrəli qərarına əsasən yaradılmış, rəsmi açılışı isə 1923-cü ilin may ayının 23-də olmuşdur.^[1]

Kitabxana yarananda onun fonduna İmperator Texniki Cəmiyyətinin Bakı şöbəsinin və Bakı İctimai Cəmiyyətinin kitabxanalarının fondlarından 5000 nüsxə kitab verilmişdir.

1923-cü ildən sürətlə inkişaf etməyə başlayan kitabxana əsas diqqəti fondun komplektləşdirilməsinə vermişdir. 1925-ci ildə o öz fondunda 51000, 1928-ci ildə isə 300 min adda kitab, jurnal, qəzet kart və digər çap məhsullarını toplaya bilmişdir. Təkcə 1928-ci ildə xaricdən 50 adda dövri mətbuat alınmışdır. Oxucuları 3183 nəfər: onlardan 2957-si kişi, 226-sı isə qadın olmuşdur. Kitab verilişi isə 2576 nüsxə təşkil etmişdir. İlk biblioqrafik göstəricilər 1927-ci ildə hazırlanmağa başlanmışdır. Ümumiyyətlə o dövrdə Şərqə artaq maraqla bağlı olaraq "Şərq haqqında jurnal materialları (1917–1927)", "1927-ci ildə Şərq haqqında SSRİ ədəbiyyatı" adlı göstəricilər bu silsilədəndir. 13 nəfər işçi ilə fəaliyyətə başlayan kitabxananın ilk direktoru M.Səlimov olmuşdur. Kitabxanada oxu zalı 1927-ci ildə açılmışdır. Oxu zalı hər gün saat 10-dan axşam saat 10-a kimi açıq idi. Kitabxana Azərbaycan Elmlər Akademiyasının binasında bir neçə otaqda yerləşirdi. Bu da onun iş fəaliyyətini genişləndirməyə imkan vermirdi. Buna baxmayaraq artıq 1928-ci ildə kitabxana 6 şöbədən: Şərq, Rus, Qərbi Avropa, Xüsusi şöbə, Xidmət və Biblioqrafiya bürosundan ibarət idi. İşçilərinin sayı isə 29-a çatmışdır.

1939-cu ildə kitabxanaya mütəfəkkir, dramaturq və maarifçi Mirzə Fətəli Axundovun adı verilmişdir.

2004-cü ildə Nazirlər Kabinetinin qərarı ilə kitabxanaya "Milli Kitabxana" statusu verilmişdir.^[3]

Azərbaycan kitabxanalarının flaqmanı, milli-mənəvi dəyərlərimizin etibarlı saxlanc yeri və tarixi yaddaşımız hesab olunan Milli Kitabxananın müasir dövrün tələblərinə uyğun inkişafı və yenidən qurulması işlərinin bünövrəsi də 1990-cı illərin ikinci yarısında Ulu Öndərin rəhbərliyi altında, bilavasitə onun iştirakilə həyata keçirilmişdir. Milli Kitabxananın Əsasnaməsinin təsdiqi, ona bütün fondlarının və əmlakının toxunulmazlığını təmin edən yüksək milli statusun müəyyənləşdirilməsi, binasının istifadəyə verildiyi 50 il ərzində ilk dəfə tam şəkildə yenidən qurulması layihəsinin reallaşdırılması, fondunun zənginləşdirilməsi məsələləri də bilavasitə Heydər Əliyevin şəxsi göstərişi və rəhbərliyi ilə həyata keçirilmişdir.^[4]

10 illik prezidentliyi dövründə Ulu Öndər heydər Əliyev 4 dəfə (3 iyun 1995; 4 mart 1996; 5, 20 noyabr 1997) Milli Kitabxanaya gəlmişdir. Ulu Öndər bu kitabxananı yüksək qiymətləndirərək demişdir: “Mədəniyyət mərkəzlərindən biri olan M.F.Axundov adına Kitabxanaya gəlmişik. Kitabxana xalq üçün, millət üçün, cəmiyyət üçün müqəddəs bir yer, bilik, mənəviyyat və zəka mənbəyidir. Buna görə kitabxanaya daim hörmət xalqımızın mədəniyyətini nümayiş etdirən faktorlardan biridir. Mən vaxtilə də bu kitabxanaya dəfələrlə gəlmişəm. Ancaq bu gün bu kitabxananın astanasından keçərkən çox böyük hörmət və ehtiram hissi keçirirəm və kitabxanaya, burada çalışan insanlara, burada toplanan kitablara öz hörmətimi, ehtiramımı bildirmək istəyirəm”.^[5]

Ulu Öndər Heydər Əliyevin müstəqillik dövründə Azərbaycanda kitabxana quruculuğunun inkişafına, xüsusilə Azərbaycan Milli Kitabxanasının fəaliyyətinin müasir dövrün tələblərinə uyğun yenidən qurulmasına, xidmət proseslərinin avtomatlaşdırılmasına və modernləşdirilməsinə verdiyi töhfələri, bu kitabxananın fəaliyyətinə və əməkdaşlarının əməyinə verdiyi yüksək qiyməti layiqincə dəyərləndirən Milli Kitabxananın foyesində xalqımızın böyük oğlunun adına layiq guşə yaradılmışdır. Həmin guşədə Ulu Öndərin bir vaxtlar Milli Kitabxanaya gələrkən bu elm məbədinə öz şəxsi kitabxanasından bağışladığı 300 nüsxədən artıq kitab nümayiş olunur.^[6]

Kitabxananın memarlıq baxımından tarixi abidə kimi qiymətləndirilən binası 1959-cu ildə tikilmiş, açılışı isə 1961-ci ildə olmuşdur^[7]. Kitabxananın yeni binasında yaradılan əlverişli şərait, təcrübəli və savadlı mütəxəssislərin çalışması xalqımızın sosial‐iqsadi və intellektual potensialının güclənməsi naminə daha səmərəli fəaliyyət göstərməsi üçün əsaslı zəmin yaratdı.^[8]

Binanın layihəsi tanınmış memar Mikayıl Hüseynova məxsusdur. Binanın yerinin seçilməsində və tikilməsində yazıçı Süleyman Rəhimovun böyük xidməti olmuşdur.

Kitabxananın eyvanında Nizami Gəncəvi, Şota Rustaveli, A.S.Puşkin, Məhsəti Gəncəvi, D.İ.Mendeleyev, Həsən bəy Zərdabi, Maksim Qorki, Üzeyir Hacıbəyli, Səməd Vurğun, Bülbül, Niyazi, Rəsul Rza, Mirzə Ələkbər Sabir, Əcəmi Naxçıvani, Sultan Məhəmmədin heykəlləri qoyulmuşdur.

Hazırda Milli Kitabxanada 21 şöbə, 29 bölmə fəaliyyət göstərir.

Kitabxananın zalları:

Beynəlxalq əməkdaşlıq zalı

Tələbə gənclərə xidmət zalı

Dəqiq və texniki elmlər zalı

Humanitar elmlər zalı

Lokal şəbəkədən istifadə üzrə oxu zalı

Dövri mətbuat zalı

Elektron informasiya xidməti zalı

Xarici ədəbiyyat oxu zalı

Açıq oxu zalı

Sərgi zalı

Not nəşrləri zalı

İnformasiya xidməti şöbəsinin oxu zalı

Konfrans zalı

Akt zalı

Azərbaycan ədəbiyyatının arxivi zalı

Nadir kitablar və kitabxana muzeyi şöbəsinin zalı

Elektron dissertasiya xidməti zalı

Elmi-biblioqrafik və diyarşünaslıq biblioqrafik resursların yaradılması şöbəsinin zalı

Zəngin kitab fonduna malik olan Milli Kitabxanada Azərbaycan kitab mədəniyyətinin ilk nümunələri – daşbasma üsulu ilə çap olunmuş və ilk çap kitabları, XIX əsrin dövri mətbuat nümunələri toplanmışdır. Kitabxananın Nadir kitablar və kitabxana muzeyi şöbəsində dünyanın 20‐ə yaxın dilində ən qədim kitablar, muxtəlif elm sahələrinə aid fundamental tədqiqat əsərləri, qiymətli sorğu ədəbiyyatları qorunub saxlanılır. Kitabxananın arxiv fondunda mətbuat tariximizin misilsiz bir hissəsini təşkil edən 91 adda qəzetin 1875-1930-cu illəri əhatə edən böyük bir dövrünün əsli və fotosurətləri, eləcə də Azərbaycan mətbuatının inkişafında mühüm rol oynayan jurnallar qorunub saxlanılır.

Azərbaycan Milli Kitabxanasında informasiya texnologiyalarından istifadəyə 1999-cu ildən başlanılmış, 2000-ci ildə İnternet zalı istifadəyə verilmişdir. 2001-ci ildə isə Tədris Mərkəzi yaradılmışdır. 2003-cü ildən kitabxanada avtomatlaşdırılmış idarəetmə sisteminin tətbiqinə başlanılmışdır. Sistemin proqram təminatı ORAKLE əsasında qurulmuş VİRTUA proqramı əsasında həyata keçirilir. Buraya elektron kataloqun tərtibi, elektron kitabxananın təşkili, oxucuların qeydiyyatı, kitab verilişi, kitab fondunun komplektləşdirilməsi, yəni bütün kitabxana proseslərinin avtomatlaşdırılmasını təmin edən modulları daxildir.

Azərbaycan Milli Kitabxanasında informasiya texnologiyalarından istifadəyə 1999-cu ildən başlanılmış, 2000-ci ildə İnternet zalı istifadəyə verilmişdir. 2001-ci ildə isə Tədris Mərkəzi yaradılmışdır. 2003-cü ildən kitabxanada avtomatlaşdırılmış idarəetmə sisteminin tətbiqinə başlanılmışdır. Sistemin proqram təminatı ORAKLE əsasında qurulmuş VİRTUA proqramı əsasında həyata keçirilir. Buraya elektron kataloqun tərtibi, elektron kitabxananın təşkili, oxucuların qeydiyyatı, kitab verilişi, kitab fondunun komplektləşdirilməsi, milli biblioqrafiyanın və respublikanın bütün iri kitabxanalarının toplu kataloqunun yaradılması, yəni bütün kitabxana proseslərinin avtomatlaşdırılmasını təmin edən modulları daxildir. Avtomatlaşdırma işinə kitabxananın ən vacib sahəsi olan elektron kataloqunun tərtibindən başlanmışdır və milli ədəbiyyata dair təsvirlər məlumat bazasına daxil edilir.

Elektron kataloqla yanaşı, AMK-da kitab fondlarının elektron versiyası, yəni kitabların mətninin kompüter yaddaşına köçürülməsi işi də həyata keçirilir. Kitabxanaya daxil olan bütün ədəbiyyat (seçmə üsulu ilə) dərhal rəqəmsallaşdırılaraq kitabxananın lokal şəbəkəsində yerləşdirilir. AMK-da Rusiya Dövlət Kitabxanasının Elektron Dissertasiya fondunun Virtual oxu zalı və Azərbaycanda müstəqillik dövründə müdafiə olunmuş dissertasiyaların tam elektron bazası yaradılmış, onlayn xidmət növləri olan virtual sifariş, biblioqrafik sorğu, metodik xidmət həyata keçirilir.

Hazırda AMK-da oxucuların kitabxanaya yazılması, qeydiyyata alınması, kitabların axtarışı və sifarişi, kitabların qaytarılması və qanunsuz olaraq kitabxanadan çıxarılmasının qarşısının alınmasınadək oxuculara kitabxana xidməti ilə bağlı bütün proseslər tam avtomatlaşdırılmışdır.

2016-cı ilin iyul ayında Azərbaycan Respublikası Mədəniyyət Nazirliyinin və Azərbaycan Milli Kitabxanasının birgə layihəsi əsasında paytaxt sakinləri və şəhərimizin qonaqları üçün fasiləsiz və sərbəst mütaliə imkanlarının yaradılması məqsədilə, Milli Kitabxananın nəzdində həftənin bütün günləri, 24 saat ərzində xidmət göstərən “Açıq Kitabxana” yaradılmışdır.

Azərbaycan Milli Kitabxanası hər il həm müxtəlif mövzularda, həm də “Azərbaycanın görkəmli şəxsiyyətləri” seriyasından onlarla biblioqrafiyalar, həmçinin metodik vəsaitlər, daycestlər, “Milli musiqi xəzinəmizdən (Azərbaycan Milli Kitabxanasının fondundan)” seriyası altında Azərbaycan bəstəkarlarının əsərlərinin not nəşrlərini, ardı davam edən nəşr kimi “Əlamətdar və tarixi günlər təqvimi”, “Yeni kitablar” adlı rüblük annotasiyalı biblioqrafik göstəricini, “Birillik Azərbaycan Kitabiyyatı”, fundamental “Azərbaycan kitabı”, “Mədəniyyət, incəsənət, bədii ədəbiyyat və ədəbiyyatşünaslıq haqqında yeni ədəbiyyat” adlı cari informasiya göstəricisini, “Elmi Əsərlər”ini və s. tərtib və çap edir.

Milli Kitabxananın hazırladığı və çap etdirdiyi bütün fundamental biblioqrafiyalar, tövsiyələr, metodik vəsaitlər pdf formatında kitabxananın saytında yerləşdirilir və nəticədə bütün nəşrlər çap olunmamışdan və yerlərə göndərilməmişdən əvvəl onlayn şəkildə kitabxanaçıların, mütəxəssislərin ixtiyarına verilir.^[9]

Bundan başqa, Kitabxana tərəfindən tammətnli Elektron məlumat bazaları və virtual sərgilər hazırlanaraq sayt vasitəsilə dünya istifadəçilərinə təqdim edilir, həmçinin 81 ölkənin musiqi irsini özündə birləşdirən Beynəlxalq Petruççi Musiqi Kitabxanasının Azərbaycan bölməsində “Müəlliflik hüququ və əlaqəli hüquqlar haqqında” Qanunun icazə verdiyi və ya müəlliflərin özləri tərəfindən rəsmi icazə verilən Azərbaycan xalq mahnıları və bəstəkarlarının yüzlərlə musiqi əsərinin notlarını, habelə Azərbaycanın korifey ifaçılarının səs yazıları MP-3 formatında “Petruççi Musiqi Kitabxanası”nda (www.imslp.org) yerləşdirilir.

Azərbaycan Milli Kitabxanasının həyata keçirdiyi son layihələrdən biri də “Milli-mənəvi dəyərlərimizin Vətənə qayıdışı” layihəsidir. Layihəsinin əsasında dünya milli kitabxanalarında və muzeylərində mühafizə edilən Azərbaycana aid qiymətli əlyazmaların müəyyən olunaraq onların elektron və kağız nüsxələrinin Milli Kitabxanaya gətirilməsi ideyası durur. Bu layihə çərçivəsində 2019-cu ildə İmadəddin Nəsiminin 650 illik yubileyi ilə əlaqədar dünya milli kitabxanalarında mühafizə olunan, Azərbaycan elminə və alimlərinə məlum olmayan nüsxələrin yer aldığı 32 Nəsimi əlyazmalarının rəqəmsal və kağız surətləri Azərbaycana gətirilmişdir.  Belə ki, Milli Kitabxana ilk dəfə olaraq bu layihə çərçivəsində Türkiyə, İran, Çexiya, Misir, Bosniya və Herseqovina, Amerika Birləşmiş Ştatlarından gətirilmiş, türk, ərəb və fars dillərində olan Nəsimi əlyazmalarının, eləcə də Nizami Gəncəvinin “Xəmsə”sinin əlyazmasının surətlərini və rəqəmsal nüsxələrini əldə etmişdir.

2021-ci ildə bu layihə əsasında Nizaminin 880 illik yubileyi çərçivəsində Nizami Gəncəvi əlyazmalarının rəqəmsal nüsxələrinin Azərbaycana gətirilməsi işi davam etdirilmiş, 206 əlyazmanın rəqəmsal surəti Azərbaycana gətirilmişdir. Tehrandan əldə olunan və 1312-ci ildə üzü köçürülən əlyazmanı “Nizami Gəncəvi İli”nin ən uğurlu nəticəsi kimi qeyd etmək olar. Bu günədək böyük şairin ilk əlyazmasının 1318-ci ilə aid olduğu alimlərimiz tərəfindən söylənilirdi və indiyədək çap olunan bütün kataloqlarda ilk əlyazmanın tarixi 1318-ci il göstərilirdi.

2023-cü ildə isə Nizami Gəncəvinin qəzəllərinin yer aldığı ilk əlyazma olduğu ehtimal edilən “Şeirlər məcmuəsi”nin (Tehran, 1295) digital variantı Milli Kitabxana tərəfindən əldə olunmuşdur. Qeyd edək ki, əldə olunan əlyazmaların köçürülmə tarixi və tərtibat orijinallığı nəzərə alınaraq bəziləri orijinallığı qorunmaqla 1 nüsxə çap edilərək Milli Kitabxananın “Nadir kitablar və kitabxana muzeyi” şöbəsinin kolleksiyasına verilmişdir. Bu gün bu əlyazma kolleksiyasının tərkibi artıq 200 ədədi keçmişdir. Nizami Gəncəvi əlyazmalarının faksimile nüsxələrinin çapının sayı 100-ə çatmışdır.

Vətən müharibəsi nəticəsində erməni işğalından azad olunmuş ərazilərimizdə 1990-cı illərin əvvəllərinədək fəaliyyət göstərmiş kitabxanaların kitab fondlarının bərpası işinə dəstək göstərilməsi məqsədilə Azərbaycan Respublikasının Mədəniyyət Nazirliyi və Azərbaycan Milli Kitabxanası tərəfindən 2020-ci ildən “Qarabağa kitabla gedək!” aksiyası təşkil edilir. Həyata keçirilən aksiya çərçivəsində mədəniyyət sahəsi üzrə fəaliyyət göstərən bir sıra beynəlxalq təşkilatlar, türkdilli dövlətlər, tanınmış xarici və yerli yazarlar, ölkəmizin nəşriyyat-poliqrafiya müəssisələri tərəfindən Qarabağ Kitab Fondu üçün böyük sayda kitab hədiyyə olunur.^[10]

AMK-nın fəaliyyətinin prioritet istiqamətlərindən birini təşkil edən və kitab təbliğinin genişləndirilməsi, kitabın və mütaliənin kütləviləşdirilməsi məqsədilə daima kitab təqdimatları, oxucu konfransları, oxucu günləri, yazıçı və şairlərlə görüşlər, kitab sərgiləri, biblioqrafik icmallar və digər tədbirlər keçirilir. Ən əhəmiyyətli tədbirlərindən biri Mədəniyyət Nazirliyinin təşkil etdiyi ənənəvi Bakı Beynəlxalq Kitab Sərgiləridir. Hər il keçirilən bu beynəlxalq sərgi-yarmarkalarda getdikcə daha çoxlu sayda xarici və yerli nəşriyyatların və milli kitabxanaların iştirak etməsi bu tədbirə marağın ildən-ilə artması ilə izah olunur və yaxın gələcəkdə həmin sərginin Frankfurt, London, İstanbul, Turin və s. beynəlxalq sərgi-yarmarkaları ilə bir sıraya çıxacağından xəbər verir. Belə sərgilərin ən əhəmiyyətli yekunlarından biri də orada iştirak edən xarici milli kitabxanaların nümayiş etdirdikləri qiymətli kitabların sərgi bitdikdən sonra Azərbaycan Milli Kitabxanasına hədiyyə edilməsidir.

AMK-nın yerinə yetirdiyi ən vacib missiyalardan biri də Azərbaycan həqiqətlərinin ölkə xaricində daha geniş təbliğində fəal iştirak etməkdən ibarət olmuşdur. Hər il Milli Kitabxana Mədəniyyət Nazirliyi ilə birgə 10-dan artıq beynəlxalq kitab sərgisində - Frankfurt, London, Tehran, İstanbul, Turin, Moskva, Praqa, Qahirə, Budapeşt və s. Azərbaycana dair zəngin ekspozisiyalarla iştirak edir və sonda həmin ekspozisiyada nümayiş olunan kitablar təşkilatçı əlkənin milli kitabxanasına hədiyyə olunur.

Milli Kitabxananın beynəlxalq əlaqələr və beynəlxalq kitab mübadiləsi sahəsində fəaliyyəti də gündən-günə genişlənir. Kitabxana dünyanın 57 ölkəsinin milli və universitet kitabxanaları ilə qarşılıqlı əməkdaşlığa dair memorandumlar imzalamış, 90-dan artıq ölkə kitabxanaları ilə kitab mübadiləsini həyata keçirir. Qarşılıqlı beynəlxalq kitab və informasiya mübadiləsi, elektron resurslardan ikitərəfli istifadənin təşkili, mütəxəssislərin təcrübə mübadiləsi, qarşılıqlı beynəlxalq tədbirlərin keçirilməsi, ötən əsrlərdə çap olunmuş ölkələrə dair nəşr materiallarının qarşılıqlı mübadiləsi imzalanan memorandumların əhəmiyyətli nəticələri hesab oluna bilər.

Kitabxana türkdilli ölkələrin mədəni dəyərlərinin təbliğində mühüm rol oynayan TÜRKSOY təşkilatı ilə də səmərəli əməkdaşlıq edir və mütəmadi olaraq həm Azərbaycanda, həm TÜRKSOY-un iqamətgahında və həm də türkdilli ölkələrdə birgə mədəniyyət tədbirləri, yubileylər təşkil olunur, elmi konfranslar və kitab təqdimatları keçirilir.

Azərbaycan Milli Kitabxanası Avropa Milli Kitabxanaları Konqresi (CENL), Avrasiya Kitabxana Assambleyası (BAE), Türkdilli Ölkələrin Milli Kitabxana Direktorları Şurası, İqtisadi Əməkdaşlıq Təşkilatına Üzv Ölkələrin Milli Kitabxanaları Şurası, Avrasiya Kitabxanaçılar Birliyinin və s. üzvüdür.     

Yarandığı vaxtdan etibarən şərəfli bir yol keçmiş, qarşıya qoyulan vəzifələrin öhdəsindən həmişə layiqincə gələrək ötən müddət ərzində cəmiyyətin intellektual potensialının artırılmasında baza kimi mühüm rol oynamış, ədəbiyyat sayı milyonları keçən fondlarını müntəzəm surətdə milli və dünya əhəmiyyətli nəşrlərlə, nadir kitablar, yeni-yeni çap məhsulları və qiymətli məlumat daşıyıcıları ilə zənginləşdirməklə xalqımızın mədəniyyət xəzinəsinə çevrilmiş kitabxananın 100 illik yubileyi Cənab Prezidentin 24 iyun 2023-cü il tarixli müvafiq sərəncamı ilə dövlət səviyyəsində qeyd edilmişdir. ^[11]

• millikitabxana.az — rəsmi saytı
• Azərbaycan Milli Kitabxanası — Facebook səhifəsi
• https://www.instagram.com/milli_kitabxana_/ - İnstagram səhifəsi
• Milli kitabxana (film, 2008)
• https://www.youtube.com/watch?v=cZUSuBT2JJs - Milli Kitabxana
• Azərbaycan Milli Kitabxanasının 90 illik yubileyi (konsert)
• https://www.youtube.com/watch?v=7161138avOY - Yeddi gün 24 saat oxucuların ixtiyarında olan “Açıq kitabxana”
• https://www.youtube.com/watch?v=f7ddtRRqT3U - Milli Kitabxana işğaldan azad olunan rayonlarımızda kitabların fondu üçün kampaniyaya başlayıb
• https://www.youtube.com/watch?v=oKkrWqu7Dhk - Milli Kitabxana 40 min elektron resurs hazırlayıb
• https://www.youtube.com/watch?v=SGGoVCHhsTY&t=1s - Azərbaycan Milli Kitabxanasının fəaliyyətə başlamasından 100 il ötür
• https://www.youtube.com/watch?v=YfZXs6PAFtc - Milli Kitabxana 100
• https://www.youtube.com/watch?v=poR4xHXAfUk - Bir əsr tarixi yol keçən Azərbaycan Milli Kitabxanası
• https://www.youtube.com/watch?v=0Sc6Nk0L4m0 - Mədəniyyət Dalğası – Milli Kitabxana 100 yaşını qeyd edir
• https://www.youtube.com/watch?v=C3A-rs2gqPk - Bakı Dövlət Universitetində Azərbaycan Milli Kitabxanasının xüsusi otağı istifadəyə verilib
• https://www.youtube.com/watch?v=pSXbp2ikn94 - Özünəməxsus memarlıq üslubuna malik əzəmətli binada yerləşən Milli Kitabxana
• https://www.youtube.com/watch?v=ZzGqc6bc-eU - Bizi birləşdirən mədəniyyət
• https://www.youtube.com/watch?v=XGbdL7DfRZM - Onlayn kitabxana
• https://www.youtube.com/watch?v=M6mQPYIPxKs - Memarlıq baxımından tarixi abidə – Azərbaycan Milli Kitabxanası
• https://www.youtube.com/watch?v=MLC9j1XyFww - Azərbaycan Milli Kitabxanası
• https://www.youtube.com/watch?v=eMKl4f2qh0o - “Heydər Əliyev və Milli Kitabxana” kitabının təqdimatı keçirilib
• https://www.youtube.com/watch?v=w-gMEHBUV-E - Milli Kitabxana yeni loqosunu təqdim edib
• https://www.youtube.com/watch?v=_kR0Pi9l1u4 - Gürcüstan Milli Kitabxanasında “Azərbaycan ədəbiyyatı guşəsi” yaradılıb