|Şəkil = Fərzəliyev Məzahir Həmzə oğlu.jpg
Məzahir Həmzə oğlu Fərzəliyev (d. 11 sentyabr 1945, Quba, Azərbaycan SSR) — texnika elmləri doktoru, professor, Azərbaycan Dövlət İqtisad Universitetinin (UNEC) “Mühəndislik və tətbiqi elmlər” kafedrasının müəllimi, Əməkdar müəllim.
Məzahir Fərzəliyev 11 sentyabr 1945-ci ildə Quba rayonunda anadan olmuşdur. 1962–1967-ci illərdə Azərbaycan Politexnik İnstitutunda (indiki Azərbaycan Texniki Universiteti) mühəndis-mexanik ixtisası üzrə təhsil almışdır. Təhsilini başa vurduqdan sonra “Maşınqayırmanın texnologiyası” kafedrasında əmək fəaliyyətinə başlamışdır.
1969–1971-ci illərdə həmin institutda “Toxuculuq və yeyinti sənaye maşınları” kafedrasında assistent vəzifəsində işləmişdir. 1970–1973-cü illərdə Moskva Yüngül Sənaye Texnologiyası İnstitutunun aspiranturasında təhsil almış və 1973-cü ildə namizədlik dissertasiyasını müdafiə etmişdir.
1973–1979-cu illərdə Azərbaycan Texniki Universitetində müəllim və baş müəllim kimi fəaliyyət göstərmişdir. 1979-cu ildən Azərbaycan Texnologiya İnstitutunda direktor, 1984-cü ildən isə eyni zamanda prorektor vəzifəsində çalışmışdır.
1990-cı ildə Sankt-Peterburq Dövlət Dizayn və Texnologiya Universitetində doktorluq dissertasiyasını müdafiə edərək texnika elmləri doktoru elmi dərəcəsi almışdır.
2000–2020-ci illərdə UNEC-in “Texnoloji maşınlar və sahə avadanlıqları” kafedrasının müdiri olmuşdur.
1984–1991-ci illərdə Azərbaycan Xalq Təhsili Tədris-Metodik Şurasının, 1991–2008-ci illərdə isə Ali Attestasiya Komissiyasının texniki elmlər üzrə ekspert şurasının üzvü və “Yüngül və sənaye” bölməsinin rəhbəri olmuşdur.
2020-ci ildə Azərbaycan Respublikası Prezidentinin sərəncamı ilə “Azərbaycan təhsilinin inkişafında xidmətlərinə görə” “Əməkdar müəllim” fəxri adına layiq görülmüşdür.
Professor Məzahir Fərzəliyev 150-dən artıq elmi-metodiki məqalənin, 20 fənn və dərs vəsaitinin, 3 metodik göstərişin və 8 patentin müəllifidir. Onun elmi maraq sahələri toxuculuq və yüngül sənaye üçün texnoloji maşınların layihələndirilməsi və təkmilləşdirilməsi ilə bağlıdır. O, həmçinin çoxsaylı beynəlxalq konfrans və simpoziumlarda çıxışlar etmişdir.
Ailəlidir. Bir qızı, iki oğlu və altı nəvəsi vardır.