Mənsum Əsgərov

Mənsum Əsgərov 1908-ci ildə Zəngəzur mahalının Qəzyan kəndində anadan olub. 1930-cu ildə Şuşa Pedaqoji Texnikumunu bitirib. 1930–1939-cu illərdə Qubadlı rayonunun bir sıra məktəblərində müəllim olub. 1939–1940-cı illərdə Sovet-Fin müharibəsinin və sonralar Böyük Vətən müharibəsinin iştirakçısı olub. 1944-cü ildə cəbhədə yaralanıb və 1946-cı ildə ordudan tərxis edilib.

1946-cı ildən qoyunçuluq təsərrüfatının müdiri, 1951-ci ildən isə Telman kolxozunun (keçmiş Bağırov adına) sədri olub. 1953-cü ildən meşə gözətçisi, 1958-ci ildən Azərbaycan Ovçular İttifaqının inspektoru olub. 1960–1971-ci illərdə Telman adına kolxozun qoyunçuluq fermasının yenidən müdiri olub. 1971–1978-ci illərdə Respublika Arıçılıq İdarəsinin Qubadlı rayon şöbəsinin müfəttişi olub. 1978–1991-ci illərdə Qubadlı rayonunun Telman adına kolxozunun sədr müavini olub.

SSRİ Ali Soveti Rəyasət Heyətinin 24 iyun 1949-cu il tarixli Fərmanı ilə 1948-ci ildə heyvandarlıqda yüksək məhsuldarlıq əldə etdiyinə görə Əsgərov Mənsum Gülməmməd oğlu Lenin ordeninə, Çəkic və Oraq qızıl medalına, Sosialist Əməyi Qəhrəmanı adına layiq görülmüşdür.

Sov. İKP üzvü, dəfələrlə kənd sovetinə deputat, Azərbaycan Kommunist Partiyasının qurultaylarına nümayəndə seçilib.

1993-cü ilin avqust ayında Qubadlının ermənilər tərəfindən işğalı zamanı məcburi köçkün düşərək Bakı şəhərində məskunlaşıb.

1994-cü ildə Bakı şəhərində vəfat edib.