Məhərrəm Məhəmməd oğlu Hüseynov (1901, Qalakənd, Gədəbəy rayonu – 28 yanvar 1981, Bakı) — Azərbaycan həkim-dermatoloqu və veneroloqu, tibb elmləri doktoru, professor, Azərbaycan SSR əməkdar elm xadimi və əməkdar həkimi.
| Məhərrəm Hüseynov | |
|---|---|
| Doğum tarixi | 1901 |
| Doğum yeri | |
| Vəfat tarixi | 28 yanvar 1981 (79–80 yaşında) |
| Vəfat yeri | |
| Təhsili | |
| Mükafatları |
 |
Məhərrəm Hüseynov 1901-ci ildə Gədəbəy rayonunun Qala kəndində kəndli ailəsində anadan olmuşdur. Gimnaziya təhsili aldıqdan sonra Moskva Dövlət Universitetinin tibb fakültəsinə daxil olmuş və 1925-ci ildə ali tibb təhsilini başa vurmuşdur. Təhsilini bitirdikdən sonra Azərbaycana qayıtmışdır.[1]
Onun həyat yoldaşı Münəvvər Mirzəyeva da həkim olmuşdur. Cütlüyün oğlu Tokay Hüseynov biologiya elmləri doktoru və professor olmuş, uzun illər AMEA Biofizika İnstitutunun Ekoloji Biofizika Laboratoriyasının müdiri kimi çalışmışdır. Məhərrəm Hüseynov Rəhim Hüseynov, Müseyib Hüseynov və Mikayıl Xıdırzadə ilə qohum olmuşdur.[2]
Azərbaycana qayıtdıqdan sonra Ağdaş dəri-zöhrəvi xəstəxanasına baş həkim təyin edilmiş, daha sonra həmin ərazi üzrə səhiyyə şöbəsinin müdiri olmuşdur. 1927-ci ildə elmi biliklərini artırmaq məqsədilə Almaniyaya ezam edilmişdir.[1]
Ezamiyyətdən qayıtdıqdan sonra 1929-cu ildə Azərbaycan Dəri-Zöhrəvi Xəstəlikləri İnstitutunu yaratmış və uzun müddət ona rəhbərlik etmişdir. Eyni zamanda, Azərbaycan Tibb İnstitutunda dəri-zöhrəvi xəstəlikləri kafedrasında dosent və sonralar professor kimi fəaliyyət göstərmişdir.[1]
1941–1948-ci illərdə Bakı Dəri Xəstəlikləri Dispanserinin baş həkimi vəzifəsində çalışmışdır. 1942-ci ildən etibarən paralel şəkildə Həkimləri Təkmilləşdirmə İnstitutunun dəri xəstəlikləri kafedrasına rəhbərlik etmiş və ömrünün sonunadək həmin kafedrada elmi-pedaqoji fəaliyyətini davam etdirmişdir.
Məhərrəm Hüseynov Bakı şəhər dəri-zöhrəvi xəstəlikləri dispanserinin yaradıcılarından biri olmuş və 1941–1948-ci illərdə orada çalışmış, 1942-ci ildən həmin dispanserin baş həkimi vəzifəsində çalışmışdır. 1935-ci ildən ömrünün sonunadək paralel şəkildə özünün təşkil etdiyi Həkimləri Təkmilləşdirmə İnstitutunun dəri xəstəlikləri kafedrasına rəhbərlik etmiş və ömrünün sonunadək həmin kafedrada elmi-pedaqoji fəaliyyətini davam etdirmişdir.[1]
Məhərrəm Məhəmməd oğlu Hüseynov 28 yanvar 1981-ci ildə vəfat etmişdir.[1]
Professor Məhərrəm Hüseynov dəri və zöhrəvi xəstəliklərin müalicəsi və profilaktikasına dair 80-ə yaxın elmi məqalənin müəllifi olmuşdur. O, bir sıra dəri və zöhrəvi xəstəliklərinin müalicəsində yeni üsullar hazırlamış və onları tibbi praktikaya tətbiq etmişdir. Bir neçə xarici dili bilməsi ona dünya təbabətindəki yenilikləri izləmək və tətbiq etmək imkanı yaratmışdır.[3]
Onun rəhbərliyi altında 6 nəfər tibb elmləri namizədi hazırlanmışdır. Məhərrəm Hüseynov Azərbaycanda dəri və zöhrəvi xəstəliklərlə mübarizədə fəal iştirak etmiş, bu sahədə çalışan həkimlərə metodiki və elmi dəstək göstərmişdir. Onun işləyib hazırladığı müalicə üsulları keçmiş SSRİ ərazisində geniş tətbiq olunmuşdur.[1]
Məhərrəm Hüseynov 1920-ci ildən Sovet İttifaqı Kommunist Partiyasının üzvü olmuşdur. 1962-ci ildə Azərbaycan dermatologiya və zöhrəvi xəstəliklər üzrə elmi cəmiyyətinin sədri seçilmiş, eyni zamanda bu sahə üzrə ümumittifaq elmi cəmiyyətin fəxri üzvü olmuşdur. O, həmçinin bir sıra elmi şuraların və redaksiya heyətlərinin üzvü kimi fəaliyyət göstərmişdir.[3]
1966-cı ildə Məhərrəm Hüseynova Azərbaycan SSR əməkdar elm xadimi fəxri adı verilmişdir. Onun elmi və tibbi fəaliyyəti müxtəlif dövlət mükafatları ilə qiymətləndirilmişdir.[3]
- ↑ 1 2 3 4 5 6 "Gədəbəy ziyalıları". Gədəbəy Rayon İcra Hakimiyyəti (az.).
- ↑ Bahadır, Ülvi. ""Xalq düşməni"nin oğlu: "Üç aylıq bacımı anamla birgə küçəyə atmışdılar..." - Müsahibə". Kulis.az. 12 avqust 2024 – Cenub.az vasitəsilə.
- ↑ 1 2 3 H. Ə. Əliyev, G. Ə. Xəlilov, H. H. Seyidov, J. H. Puqaçov, K. M. Bağırov, B. Ə. Hüseynov, F. H. Əhmədov, J. M. Kirsanov, R. Ə. Mehdiyev, T. Ə. Qasımov, M. A. Topçubaşov, M. İ. Cavadzadə, Z. T. Quliyeva, A. Ç. Cəbrayılbəyli, K. Ə. Haşımova, M. Ə. Ələkbərov, R. H. Haşımov, S. Ə. Quliyeva, İ. M. Zeynalov, Z. Z. Paşabəyli, Ş. R. Topçiyev. "M. M. Hüseynov". Kommunist qəzeti (az.). 30 yanvar 1981.