Məşədi Hüseyn Əsgər oğlu (13 iyul 1868, Əskəvar, Cənubi Azərbaycan – 1939) — Azərbaycan-sovet inqilabçısı və dövlət xadimi.
| Məşədi Hüseyn | |
|---|---|
 | |
| Şəxsi məlumatlar | |
| Doğum tarixi | 13 iyul 1868 |
| Doğum yeri | |
| Vəfat tarixi | 1939 (70–71 yaşında) |
| Partiya |
|
| Fəaliyyəti | inqilabçı, dövlət xadimi |
 Vikianbarda əlaqəli mediafayllar | |
Məşədi Hüseyn Əsgər oğlu 13 iyul 1868-ci ildə Cənubi Azərbaycanın Əskəvar kəndində anadan olmuşdur.[1] 1885-ci ildə Bakıya gələrək neft mədənlərində fəhlə işləməyə başlamışdır. Birinci rus inqilabı illərində (1905–1907) İvan Vatsek[rus.] və digər bolşeviklərlə yaxınlaşmış, Bayıl–Bibiheybət rayonunda (indiki Səbail rayonu ərazisində) fəhlə tətillərinin təşkilində fəal iştirak etmişdir.[2]
Məşədi Hüseyn 1906-cı ildə İran sosial-demokrat "Ədalət" təşkilatına daxil olmuş, həmin ilin sonunda təşkilatın tapşırığı ilə İrana göndərilmişdir. O, Rəşt, Ənzəli və Ərdəbildə Məşrutə inqilabında iştirak etmiş, Ərdəbil İnqilab Əncüməni tərəfindən "Səttar xan" ordeni ilə təltif edilmişdir. 1909-cu ildə İran hökumət orqanları tərəfindən həbs olunmuş, qısa müddət sonra həbsdən qaçaraq Bakıya qayıtmışdır. Daha sonra Balaxanıda, ardınca isə Bibiheybətdə "Aramazd" şirkətinin neft mədənlərində çalışmışdır. Fəhlə tətillərində fəal iştirakı səbəbindən 1914-cü ildə işdən çıxarılmış, həbs təhlükəsi ilə əlaqədar Muğana getmişdir.[2]
1917-ci il fevral inqilabından sonra Məşədi Hüseyn "Aramazd" şirkətinə yenidən işə qəbul edilmişdir. Həmin ilin oktyabrında Stepan Şaumyan və Möhsün İsrafilbəyovun zəmanəti ilə bolşeviklər partiyasına üzv olmuş, partiyanın Bayıl–Bibiheybət təşkilatının döyüş drujinasında fəal iştirak etmişdir. 1917–1920-ci illərdə partiyanın Bayıl–Bibiheybət rayon komitəsinin təşviqatçısı olmuş, 1919-cu ilin mayında fəhlə tətillərinin təşkili və keçirilməsində, habelə müsavatçılara qarşı silahlı üsyanın hazırlanmasında mühüm rol oynamışdır.[2]
1920-ci ilin aprelində Azərbaycanda sovet hakimiyyətinin bərqərar olunmasından sonra Məşədi Hüseyn 1924-cü ilədək Azərbaycan Kommunist (bolşeviklər) Partiyasının Bayıl–Bibiheybət Rayon Komitəsində təlimatçı, rayon sovetinin fövqəladə komissiyasında müvəkkil vəzifələrində çalışmışdır. 1925-ci ildən etibarən Bakı Sovetinin Bayıl–Bibiheybət rayonunda müvəkkili olmuşdur. 1926-cı ildə Azərbaycan SSR Mərkəzi İcraiyyə Komitəsi sədrinin müavini seçilmiş, 1930-cu ildə fərdi pensiyaya çıxanadək partiya və sovet orqanlarında fəaliyyət göstərmişdir.[2]
Məşədi Hüseyn dəfələrlə partiya qurultay və konfranslarının nümayəndəsi olmuş, Azərbaycan K(b)P Bakı Komitəsinin üzvü və Nəzarət Komissiyasının üzvü, Zaqafqaziya Nəzarət Komissiyasına namizəd üzv, Azərbaycan SSR Mərkəzi İcraiyyə Komitəsinə əvvəlcə üzvlüyə namizəd, sonra isə üzv seçilmişdir. "Qırmızı əmək bayrağı" ordeni ilə təltif edilmişdir.[2]
Məşədi Hüseyn 1939-cu ildə vəfat etmişdir.[1]
- 1 2 Мәшәди Һүсејн Әсҝәр оғлу // Азәрбајҹан Совет Енсиклопедијасы: [10 ҹилддә]. VI ҹилд: Куба—Мисир. Бакы: Азәрбајҹан Совет Енсиклопедијасынын Баш Редаксијасы. Баш редактор: Ҹ. Б. Гулијев. 1982. С. 546.
- 1 2 3 4 5 Мәшәди Һүсейн Әскәр оғлу // Азәрбайҹанда Совет һакимиййәти уғрунда фәал мүбаризләр. Бакы: Азәрбайҹан Дөвләт Нәшрийяты. 1958. 381–382.