Müzakirə:Çaylı (Qazax)
Qazax rayonunun Çaylı kəndinin adı ilə bağlı müxtəlif versiyalar mövcuddur. El arasında belə bir rəvayət dolaşır ki, guya qoca bir qadın yol kənarında çayxana işlədirmiş və insanlar ona “çayçı qarı” deyə müraciət edirmişlər. Deyilənə görə, kəndin adı da buradan yaranıb.
Başqa bir versiyaya görə isə kənd Coğaz çayının sahilində yerləşdiyinə görə “Çaylı” adını alıb. Lakin hesab edirəm ki, bu məsələyə dair daha dəyərli bir məlumat Osmanlı dövrünə aid arxiv sənədi olan “Tiflis əyalətinin müfəssəl dəftəri”ndə qeyd olunub. Həmin sənəddə “Çaylı” adlı kəndə rast gəlinmir. Əvəzində “Çaylı Arxı” adlanan bir suvarma arxından bəhs olunur.
Maraqlıdır ki, həmin arx bu gün də mövcuddurmu, yoxsa başqa bir adla tanınır? Bu barədə dəqiq məlumatımız yoxdur. Lakin ehtimal etmək olar ki, sonralar Qıraq Kəsəməndən bu əraziyə köç edənlər həmin arxın adına əsaslanaraq burada saldıqları yeni yaşayış məntəqəsini “Çaylı” adlandırıblar.