Müqəddəs Bakirə Məryəmin Məsum Hamiləliyi kilsəsi (Bakı)

Sovet dövründə Katolik icmasının fəaliyyəti Azərbaycanda tamamilə qadağan olunmuşdu. Lakin 1991-ci ildə ölkənin müstəqillik qazanmasından sonra dini azadlıqlar bərpa edildi. 2000-ci ildə Müqəddəs Taxt-Tac Azərbaycanda rəsmi olaraq Azərbaycan Həvari Prefekturasını təsis etdi.

2002-ci ildə Papa II İohann Pavel Azərbaycana səfəri zamanı yerli Katolik icması ilə görüşərək yeni bir kilsə inşa edilməsini təşviq etdi. Bunun nəticəsində Müqəddəs Taxtın dəstəyi ilə bu məbədin inşasına başlanıldı. Kilsənin inşaatı 2006-cı ildə tamamlandı və 2007-ci ilin 7 aprelində təqdis edilərək ibadətə açıldı. Kilsənin təməl daşını Papa 2-ci İoann Pavel təqdis etmişdir.

Kilsənin layihəsi italyan memarlar tərəfindən hazırlanmışdır və müasir Katolik memarlığı ilə ənənəvi Avropa üslubunun sintezindən ibarətdir. Xarici görünüşündə sadəlik, daxili hissədə isə liturgik nizam və müqəddəs simvolların zənginliyi müşahidə olunur.

Bu kilsə yalnız bir ibadət məkanı deyil, həm də Azərbaycanda Katolik Kilsəsinin ruhani və teoloji mərkəzidir. Onun Bakirə Məryəmin Məsum Hamiləliyinə həsr olunması, günahdan uzaq olaraq dünyaya gələn İsanın anasının müqəddəsliyinə olan dərin inancı təcəssüm etdirir. Bu titul Katolik Kilsəsinin Məsum Hamiləlik (lat. *Immaculata Conceptio*) dogmasına əsaslanır və Papa IX Pius tərəfindən 1854-cü ildə rəsmi şəkildə elan olunmuşdur.

Kilsədə həftə boyunca Müqəddəs Ayinlər (Messalar) keçirilir. Liturgiya əsasən Azərbaycan dili, rus dili və ingilis dilində icra olunur. Xüsusilə Pasxa və Milad bayramları burada təntənəli şəkildə qeyd olunur.

Kilsə, yalnız Katolik icmasına xidmət etmir, həm də humanitar və mədəni fəaliyyətlər həyata keçirir. Burada müxtəlif dillərdə katexizis dərsləri, gənclik proqramları, ailə seminarları və sosial yardım kampaniyaları təşkil olunur. Kilsə eyni zamanda ekumenik və dinlərarası dialoqu təşviq edir və müxtəlif konfessiya nümayəndələri ilə müntəzəm əlaqədədir.

2 oktyabr 2016-cı ildə Papa Fransisk bu kilsəni ziyarət etmiş və burada Azərbaycandakı Katolik icması ilə Müqəddəs Ayin icra etmişdir. Bu ziyarət Katolik icmasının ruhani cəhətdən təşviqi və yerli Kilsənin universal Kilsə ilə birliyinin təsdiqi baxımından mühüm hadisə olmuşdur.

Kilsənin fəaliyyətinə Azərbaycan Həvari Prefekti rəhbərlik edir. Hazırda bu vəzifəni Vladimir Fekete (SDB) daşıyır. Vladimir Fekete 2018-ci ildə yepiskop rütbəsinə təyin edilmişdir.

1. ↑ "THE CHURCH OF THE VIRGIN MARY'S IMMACULATE – Catholic Church in Azerbaijan" (ingilis). 2011-11-18. 2016-12-09 tarixində arxivləşdirilib. İstifadə tarixi: 2024-03-05.