Laçın Vəliyev

Laçın Vəliyev 4 fevral 2002-ci ildə Göyçay rayonunda anadan olub. 2013-cü ildə güləşlə məşğul olmağa başlayıb. Kamran Baxışovun rəhbərliyi altında məşq edir, Daxili İşlər Nazirinin İdman Cəmiyyətində çıxış edir. Azərbaycan İdman Akademiyasında təhsil alıb.

Laçın Vəliyevin beynəlxalq səviyyədə debütü 2017-ci ilin sentyabrına təsadüf edib. Həmin il o, Yunanıstanın Afina şəhərində baş tutan yeniyetmələr arasında Dünya Çempionatını 12-ci pillədə başa vurdu.

2018-ci ildə isə Vəliyev artıq birinci uğuruna imza atdı. Mayda o, yeniyetmələr arasında Avropa Çempionatının bürünc medalına sahib oldu. Həmin ilin iyulunda isə Zaqreb şəhərində (Xorvatiya) yeniyetmələr arasında Dünya Çempionatını onuncu pillədə tamamladı.

Laçın Vəliyev üçün 2019-cu il də uğurlu alındı. İyunda İspaniyada gənclər arasında Avropa Çempionatını yeddinci pillədə başa vurduqdan sonra o, həmin ay İtaliyada yeniyetmələr arasında Avropa Çempionatının final görüşündə məğlub olaraq turnirin gümüş medalla başa vurdu. İyulda ayında isə Laçın Vəliyev Bolqarıstanın Sofiya şəhərində baş tutan yeniyetmələr arasında Dünya Çempionatında bütün rəqibləri üzərində qələbə qazanaraq turnirin qalibi oldu. Vəliyev həmin mövsüm yeniyetmələr arasında Avropa və Dünya Çempionatında ciddi uğurlara imza atsa da, gənclər arasında Dünya Çempionatında uğursuzluğa düçar oldu (24-ci pillədə başa vurdu).

2021-ci il Laçın Vəliyev üçün beynəlxalq arenada medalsız nəticələndi. Vəliyev mayda KYRM-da U23 Avropa Çempionatını, iyulda Almaniyada gənclər arasında Avropa Çempionatını, avqustda isə Rusiyada gənclər arasında Dünya Çempionatını yeddinci pillələrdə baş vurdu. Həmin il onun yeganə uğuru Azərbaycan Çempionatını gümüş medalla başa vurmaq oldu.

Laçın Vəliyev üçün ən uğurlu mövsümlərdən biri 2022-ci ilə təsadüf edib. Həmin ilin martında U20 Azərbaycan Çempionatının qalibi olan Vəliyev həmin ay həm də Bolqarıstanın Plovdiv şəhərində 23 yaşlılar arasında Avropa Çempionatında bürünc medalın sahibi oldu. Daha sonra Vəliyev iyunda İtaliyanın Roma şəhərində 20 yaşlılar arasında Avropa Çempionatında bütün rəqibləri üzərində qələbə qazanaraq turnirin qalibi oldu. Avqustda isə o, Sofiya şəhərində (Bolqarıstan) U20 Dünya Çempionatını bürünc medalla başa vurdu. Vəliyev mövsümü noyabrda İspaniyada baş tutan U23 Dünya Çempionatını yeddinci pillədə tamamlamaqla və Azərbaycan Çempionatını bürünc medalla başa vurmaqla tamamladı.

2023-cü il ərzində beynəlxalq turnirlərdə mübarizə aparmayan Laçın Vəliyev həmin ilin sonlarında Azərbaycan Çempionatının final görüşündə məğlub olaraq turniri gümüş medalla tamamladı.

Uzun fasilədən sonra Laçın Vəliyev beynəlxalq səviyyədə birinci uğuruna 2024-cü ilin mayında Azərbaycanda baş tutan 23 yaşlılar arasında Avropa Çempionatında bürünc medalın sahibi olmaqla imza atdı.