Kərimtəpə yaşayış yeri — Azərbaycanın Ağdam rayonu ərazisində qədim yaşayış yeri. Yaşayış yeri Ağdam rayonu Üçoğlan kəndinin şimalında, Qəbiristanlıqtəpədən 200 m cənub-şərqdə yerləşir.
Abidənin səthi və ətrafları hələ sovet dövründə təsərrüfat işlərinin aparılması nəticəsində dağıdılmışdır. 2010-cu il tədqiqat mövsümündə təpə nəzərdən keçirilsə də maraqlı tapıntıya rast gəlinməmişdir. Bu səbəbdən də onun dağılmış kurqan olduğunu güman edərək qeydiyyata almamışlar. 2013-cü ildə isə burada qazılmış zibil quyusu abidə haqqında yeni məlumatların əldə edilməsinə kömək etmişdir. Belə ki, təpənin yola yaxın hissəsində qazılmış quyunun divarlarında ocaq izləri və saxsı qab fraqmentləri diqqəti çəkmişdir. Quyuya baxış keçirilən zaman orta əsrlərə aid şirli qab fraqmentlərinə təsadüf olunmuşdur.
Burada orta əsrlərə aid olan təbəqənin qalınlığı 2 m-dən çoxdur. Neolit dövrünə aid yaşayış yeri orta əsrlərdə də məskunlaşdırılmışdır. Diametri 130 m, hündürlüyü 3,5 m olan təpə hazırda torpaq karxanası və zibilxana kimi istifadə olunur.[1]
- ↑ "Xəqani Alməmmədov, Elvin Əliyev, Şamil Nəcəfov. Azərbaycanın qərb rayonlarında müxtəlif dövr arxeoloji abidələrin elektron qeydiyyatı və xəritələşməsi. Bakı: Elmin İnkişaf Fondu, 2017, səh.87-88" (PDF). 2022-07-07 tarixində arxivləşdirilib (PDF). İstifadə tarixi: 2022-09-10.