Kərim bəy Sultanov

Şahzadə Sultanov özünü gah bakılı, gah da tunisli olduğunu söyləmişdir, şahzadə kimi təqdim etmişdir^[1][2] Ehtimal ki, vaxtilə Bakının zənginlərindən olub, rus işğalından sonra varidatını da götürərək Parisə mühacirət edib.

Gənc və olduqca zərif olan, xəyal qurma, natiqlik və inandırma qabiliyyəti yüksək olan Kərim bəy Sultanov Qərbin ən ali təbəqələri ilə təmas edir, vaxtını böyük və möhtəşəm hotellərdə, paytaxtlarda, köşklərdə keçirirdi.^[3]

1931-ci ilin dekabrında Parisdə Şanzelizenin^[3] böyük bir klubunda kart oyununda 120 min frank uduzduqdan sonra küçəyə çıxdığı zaman iki mülki polis tərəfindən saxlanılmışdır. Sultanov onu tutan mülki məmurlara sərbəst buraxılması üçün hər birinə 5000 frank rüşvət təklif etmişdir.^[3] Lakin qarşı tərəf belə bir sövdələşməyə getməmiş, axtarışda olduğu üçün Kərim bəy nəzarətxanaya göndərilmişdir. Çünki onun əleyhinə bir neçə tacir, iş adamı, hətta bir də qadın opera sənətçisi tərəfindən dələduzluq mühakiməsi açılmışdır. Şikayətçilər onlardan bir milyon frankdan çox pul aldıqlarını söyləmişlər.^[1][2] O vaxta qədər isə Fransadan çıxarılması üçün əleyhində üç məhkəmə qərarı mövcud idi;^[1][2] hətta ayrı-ayrı adlarla üç dəfə tutulmuşdur.^[3]

Sultanov şikayətçilərə Sovet hökuməti və Türkiyədən ona pul gələcəyini, vaxtı çatdığında bu pulu alacağını söyləmişdir. Beləliklə, o zərərçəkmişlərin etimadını qazanaraq, həmin şəxslərdən borc pul götürmüşdür. Kərim bəy iddia etmişdir ki, guya onun Bakıdakı neft mədənlərindən 60 milyon frank, Türkiyədən də silah-sursat satışından 283 min ingilis lirası alacağına dair əlində sənədlər də mövcuddur.^[1][2]

Əslində isə onun əlində türkcə yazılmış, markalı və damğalı bir çox sənədlər var imiş. O, həmin sənədlərə istinad edərək Amerikan Ekspress Bankından da bir milyonluq frank istiqraz almaq üzrə imiş. Lakin istiqraz aldığı şəxslər şikayət etdiyi üçün Amerikan Ekspress təbii olaraq ona müvafiq pulu verməmişdir.^[1][2]

Sultanova Bakıdakı neft mədənlərinin qarşılığında pul verənlərin başında M. Çarlz Metzger vardır. Ona Metzger 300 min frank vermişdir. Sultanov 1930-cu ildə məşhur ingilis bankiri Oecklinqerlə də təmas qurmuş və Nişdə görüşərək ondan 50 min ingilis lirası alacaqdı. Lakin həmin ərəfədə saxta çek imzaladığı üçün saxlanılmışdı. M. Metzger o zaman Sultanova etimad etdiyi üçün saxta çekin ehtiva etdiyi məbləği ödəmiş və onu həbsdən çıxartmışdı. Bundan başqa ona inanan əmlak sahiblərindən bir başqası 250 min frank, bir qadın opera sənətçisi 15 min frank və bir rus tacir isə 150 min frank vermişdir.^[1][2]

Bundan başqa bu dələduzu məhkəməyə verənlər arasında sabiq notariuslardan Radois, bir çox hotelçi, iki qrafinya, iki vikont, bir qadın opera sənətçisi və bir aşpaz qadın vardır.^[3]