Həsənov Kərim Hüseyn oğlu (10 aprel 1935, Danzik, Naxçıvan MSSR – 26 aprel 1996, Bakı) — ədəbiyyatşünas, filologiya elmləri doktoru (1988), professor (1992).
| KƏRİM HƏSƏNOV | |
|---|---|
| Kərim Hüseyn oğlu Həsənov | |
| Doğum tarixi | 10 aprel 1935 |
| Doğum yeri | |
| Vəfat tarixi | 26 aprel 1996 (61 yaşında) |
| Vəfat yeri | |
| Təhsili | |
| Fəaliyyəti | ədəbiyyat nəzəriyyəçisi |
Kərim Vəkilov (Həsənov) 10 aprel 1935-ci ildə Naxçıvan MSSR-in Şərur rayonu, Danzik kəndində anadan olmuşdur.[1] Soyadını repressiyalardan xilas olmaq məqsədilə dəyişmişdir. Anası Gülarə Gülməmməd qızı Dərələyəzin Amağu kəndində doğulmuş, 1918-ci ildə ailəsinin 12 üzvü erməni silahlı dəstələri tərəfindən törədilən soyqırımı zamanı həlak olmuşdur.[2]
Kərim Həsənov ibtidai və orta təhsilini Şərur rayonunun Danzik və Yeyicə kəndlərində almışdır. Yeyicə kəndində görkəmli dilçi alim Yusif Seyidovla birgə oxumuşdur. 1961-ci ildə Azərbaycan Dövlət Universitetinin (indiki BDU) kitabxanaçılıq fakültəsini bitirmişdir. 1963-cü ildən etibarən Bakı Dövlət Universitetində pedaqoji fəaliyyət göstərmiş, müəllim, baş müəllim, dosent və professor vəzifələrində çalışmışdır.[2]
Filologiya elmləri namizədi dərəcəsini professor Mircəlal Paşayevin rəhbərliyi ilə almış, sonradan 1988-ci ildə filologiya elmləri doktoru olmuşdur. 1992-ci ildən vəfatına qədər BDU-nun professoru olmuşdur.[2]
Professor Kərim Həsənov 26 aprel 1996-cı ildə Bakı şəhərində vəfat etmiş, Mehdiabad qəbiristanlığında dəfn olunmuşdur.
Kərim Həsənov Azərbaycanda nəsil şəcərəsi janrında yazılmış ilk avtobioqrafik araşdırmalardan birinin – “Nəsil şəcərəsi” (1992) adlı kitabın müəlliflərindəndir.[1][3] Çağdaş Azərbaycan ədəbiyyatına dair monoqrafik tədqiqatların, məlumat-biblioqrafiya vəsaitinin, 100-dən çox elmi məqalənin müəllifidir.[4]
Universitetin Elmi Kitabxanasına rəhbərlik etdiyi dövrdə kitabxananı müasir tələblərə cavab verən mərkəzə çevirmiş, kitabların qorunması və bərpası üçün ilk cilidləmə və çeşidləmə emalatxanasını yaratmışdır. 1974-cü ildə kitabxanaya “Elmi Kitabxana” statusu verilmişdir. Kitabxana bu gün də 2.5 milyondan çox ədəbiyyat fondu ilə fəaliyyətini davam etdirir. Azərbaycan dilində elmi dərslik və vəsait çatışmazlığını aradan qaldırmaq məqsədilə onun təşəbbüsü və səyi ilə SSRİ səviyyəsində ilk universitet nəşriyyatı yaradılmışdır. O, ömrünün sonunadək bu nəşriyyata rəhbərlik etmiş, saysız elmi əsərlərin çap olunmasına şərait yaratmışdır.[2]
Kərim Həsənov uzun müddət universitetin Həmkarlar İttifaqının sədri olmuşdur. Onun təşəbbüsü ilə universitetdə yeni idman komandaları, musiqi və rəqs ansamblları yaradılmış, tanınmış incəsənət xadimləri bu fəaliyyətlərə cəlb edilmişdir. Bu sahədəki xidmətlərinə görə “Əməkdar mədəniyyət işçisi” fəxri adına layiq görülmüşdür. Onun təşəbbüsü ilə Quba rayonunun Nügədi kəndində universitetin tədris-təcrübə və istirahət mərkəzi yaradılmış, müəllimlər üçün mənzil təminatı və tələbələr üçün yataqxana şəraitinin yaxşılaşdırılması sahəsində mühüm işlər görülmüşdür.[4]
- ↑ 1 2 "Şərur Vəkilovları – Naxçıvan Kəngərliləridir". anl.az. İstifadə tarixi: 2025-04-10.
- ↑ 1 2 3 4 "PROFESSOR KƏRİM HƏSƏNOV (VƏKİLOV) - 90". qht.az (az.). İstifadə tarixi: 2025-04-10.
- ↑ Həsənov Kərim, Həbibbəyli İsa. Nəsil Şəcərəsi (az.). Bakı. 1992.
- ↑ 1 2 Həsənov Kərim Hüseynbəy oğlu // Naxçıvan Ensiklopediyası (az.). I. Bakı: Azərbaycan Milli Elmlər Akademiyası (AMEA). 2002.