Kənan Heybətov

Kənan Heybətov 21 noyabr 2002-ci ildə Bakı şəhərində anadan olub. 2010-cu ildə güləşlə məşğul olmağa başlayıb. Cəbrayıl Həsənovun rəhbərliyi altında məşq edir, Neftçi İdman Klubunda çıxış edir. Azərbaycan İdman Akademiyasında təhsil alıb.

Kənan Heybətovun beynəlxalq səviyyədə debütü 2017-ci ilə təsadüf edib. Həmin ilin mayında o, Serbiyanın Belqrad şəhərində baş tutan 15 yaşlılar arasında Avropa Çempionatında çıxış etdi və turniri onuncu pillədə başa vurdu.

Bir il sonra isə o, beynəlxalq arenada birinci uğurlarına imza atdı. Mayda KYRM-da yeniyetmələr arasında Avropa Çempionatını bürünc medalla başa vuran Heybətov həmin ilin iyulunda Xorvatiyada yeniyetmələr arasında Dünya Çempionatını 16-cı pillədə tamamladı.

2019-cu ildə Kənan Heybətov əvvəlcs iyundə İtaliyada baş tutan yeniyetmələr arasında Avropa Çempionatında bürünc medalın sahibi oldu, daha sonra isə iyulunda Azərbaycanda baş tutan Avropa Gənclər Yay Olimpiya Festivalında da bütün rəqibləri üzərində qələbə qazanaraq turniri qızıl medalla başa vurdu.

Kənan Heybətov 2021-ci ilin iyununda o dövr üçün ən ciddi uğuruna imza atdı. Heybətov Almaniyanın Dortmund şəhərinin ev sahibliyində baş tutan gənclər arasında Avropa Çempionatında bütün rəqibləri üzərində qələbə qazanaraq turnirin qalibi oldu. Həmin ilin noyabrında o, Oslo şəhərində Dünya Çempionatında debüt etsə də, bu debüt uğursuz oldu və Heybətov turniri 17-ci pillədə başa vurdu.

2022-ci il Kənan Heybətov üçün ən uğurlu mövsümlərdən biri oldu. Heybətov əvvəlcə avqustda Bolqarıstanın Sofiya şəhərində baş tutan 20 yaşlılar arasında Dünya Çempionatında bütün rəqibləri üzərində qələbə qazanaraq turnirin qalibi oldu. Ardınca isə o, noyabrda İspaniyada 23 yaşlılar arasında Dünya Çempionatını bürünc medalla tamamladı.

Kənan Heybətov tədricən 2023-cü ildə sərbəst güləş üzrə Azərbaycan yığmasının əsas heyətinə cəlb edildi. İyunda o, İstanbul şəhərində baş tutan Vəhbi Əmrənin xatirəsinə həsr olunmuş beynəlxalq turnirdə çıxış etdi. Həmin ilin noyabrında isə Heybətov Tirana şəhərində baş tutan 23 yaşlılar arasında Dünya Çempionatında bürünc medalın sahibi oldu. Kənan Heybətov 2023 və 2024-cü illərdə ardıcıl olaraq 2 dəfə Azərbaycan Çempionatının qızıl medallarına sahib oldu.

2024-cü ildə Kənan Heybətov Avropa Çempionatında debüt etdi. Fevralda Rumıniyanın Buxarest şəhərində baş tutan turnirdə o, yeddinci pillədə qərarlaşdı. Mayda isə Kənan Heybətov Azərbaycanda baş tutan 23 yaşlılar arasında Avropa Çempionatının final görüşündə məğlub olaraq turniri gümüş medalla başa vurdu. Noyabrda Albaniyada baş tutan U23 Dünya Çempionatını isə Heybətov 8-ci pillədə tamamladı.

Kənan Heybətov 2025-ci ildən tədricən sərbəst güləş üzrə Azərbaycan yığmasının "bir nömrəli" güləşçisi oldu. Həmin ilin fevralında Heybətov Xorvatiyada baş tutan Zagreb Open beynəlxalq turnirində bütün rəqibləri üzərində qələbə qazanaraq turnirin qalibi oldu. Martda isə Heybətov Tirana şəhərində (Albaniya) baş tutan 23 yaşlılar arasında Avropa Çempionatında final görüşündə məğlub olaraq turniri gümüş medalla başa vurdu. Apreldə isə Kənan Heybətov Bratislava şəhərində, debüt Avropa Çempionatında bürünc medalın sahibi oldu.