Kəmalə Mirzəyeva

Kəmalə Mirzəyeva 1976-cı il fevralın 24-də Bakı şəhərində anadan olmuşdur. Suraxanı rayonundakı 104 nömrəli orta məktəbi bitirmişdir. 1993-cü ildə Azərbaycan Dövlət İqtisad İnstitutunun (indiki Azərbaycan Dövlət İqtisad Universiteti) İnformatika və idarəetmə fakültəsinə qəbul olub.

2002-ci ildən Azərbaycan Dövlət Teleradio Verilişləri Şirkəti ilə əməkdaşlığa başlayıb. Bu dövrdə "Mədəniyyət xəbərləri" proqramında müxbir və redaktor kimi çalışıb.

2004-cü ildə "Xəzər" redaksiyasının "Azərbaycan dilində verilişlər" şöbəsində redaktor kimi fəaliyyətə başlayıb. 2005–2006-cı illərdə "Uşaq, Gənclər və İdman", daha sonra isə "Gənclik və Hərbi Vətənpərvərlik" redaksiyalarında fəaliyyət göstərib.

2007-ci ildən "Səhər" musiqi-informasiya proqramında redaktor və aparıcı kimi çalışıb.

2009-cu ildən etibarən özəl studiyalarla əməkdaşlıq edib. Müəllifi və aparıcısı olduğu "Qaliblər" adlı televiziya verilişi 2 il ərzində "Xəzər TV"də yayımlanıb. Veriliş Azərbaycan idmanının tanınmış simalarına həsr olunub.

2010-cu ildən "TRT-Avaz" kanalı ilə əməkdaşlıq edib. "Bizim Uşaqlar", "Can Bala" və "Həyat hekayələri" adlı proqramların müəllifi və aparıcısı olub. "Həyat hekayələri" proqramı 2 il ərzində yayımlanıb və ictimai-siyasi xadimlərə, millət vəkillərinə, sənət adamlarına həsr olunub.

Azərbaycan neft sənayesində mühüm xidmətləri olmuş Rizvan Abasova həsr edilmiş "Həyat hekayələri" və "Öz qəbrini qazan" adlı bədii-publisistik kitabların müəllifidir.

Bir çox sənədli və bədii-publisistik filmlərin ssenari müəllifi, redaktoru və rejissoru kimi fəaliyyət göstərib.^[1]

• "Şuşa öz tarixi, məşhur abidələri və övladları ilə"
• "Ya Qarabağ, Ya ölüm"
• "Tanqo"
• "Qorxulu yuxuların qəhrəmanı"
• "Ruhlar şəhəri"
• "Hay ver mənə, leytenant"
• "Əhmədə deyin ki…"
• "Şuşanın şikəstəsi"
• "İgidlər diyarı"
• "Ulu öndər"
• "Sarı gəlin"
• "Arazbarı"

Mətbuat Şurası ilə "O film studiya"nın birgə layihəsi olan "Mətbuat tariximiz – İstiqlal yolumuz" silsiləsində Məhəmməd Əmin Rəsulzadə, Əli bəy Hüseynzadə, Şirməmməd Hüseynov, Xədicə Əlibəyova, Məhəmməd ağa Şahtaxtlı və digər şəxslərə həsr olunmuş filmlərin ssenari müəllifi, redaktoru və rejissoru olub.^[2]

"AzTV"-nin "Repressiya" layihəsində Bəkir Çobanzadə, Hüseyn Cavid, Mikayıl Müşfiq, Yusif Vəzir Çəmənzəminli, Ömər Faiq Nemanzadə, Əhməd Cavad və digər görkəmli şəxsiyyətlər haqqında sənədli filmlərin ssenarilərini yazıb.

Azərbaycan Televiziyasında yayımlanan "Məlahətli qonaqlar", "Ən doğrusu" verilişlərinin ssenari müəllifidir.^[3]

Mədəniyyət Nazirliyinin sifarişi ilə "Salnaməfilm" studiyasında çəkilmiş, Milli Qəhrəman Niyazi Aslanova həsr olunmuş "Mən sizinləyəm" sənədli filminin rejissorudur.^[4]