Kömək
Bu səhifəni kitabınıza əlavə edin
Kitabı göstər (0 səhifə)
Səhifə təklif edinKüləklər şəhəri – Azərbaycanın paytaxtı Bakı şəhərinə verilən ləqəb. Şəhərdə tez-tez əsən güclü küləklər bu ləqəbin yaranmasına gətirib çıxarmışdır. "Bakı" adının etimologiyası ilə bağlı iddialardan biri fars dilində "külək döyən" mənasını verən "Badkubə" sözündən yaranmasıdır.
Bakı şəhəri Xəzər dənizinin qərbində, şimal küləklərinin daim döyəclədiyi yerdə yerləşir. Şəhərdə xəzri adlandırılan şimal küləyi və gilavar adlandırılan cənub küləyi əsir. Əbdürrəşid Bakuvi Bakı şəhərini küləkli şəhər kimi təsvir etmiş, hətta külək əsən zaman at və qoyunların öz yerində dayana bilmədiklərini bildirmişdir. 1826-cı ildə Bakıda olmuş səyyah Zeynalabdin Şirvani şəhərin Badkubə də adlandırıldığını, çünki burada güclü küləklərin əsdiyini qeyd etmişdir.[1]
Rus dramaturq Vladimir Kirşon tərəfindən 1929-cu ildə yazılmış 26 Bakı komissarından bəhs edən pyes "Küləklər şəhəri" (rus. Город ветров) adlanır.[2] 1928-ci və 1967-ci ildə çəkilmiş, Bakı şəhərinin tarixindən bəhs edən iki sənədli film "Küləklər şəhəri" adını daşıyır. Eston yazıçı Kersti Kivirüüt tərəfindən yazılmış "Küləklər şəhəri" romanı sovet hakimiyyətinin qurulması ərəfəsində Bakıda yaşayan əcnəbilərin həyatından bəhs edir.[3] 2011-ci ildə Xəzər TV-də "Küləklər şəhəri" serialı yayımlanmışdır.[4]
2016-cı ildən təşkil olunan Bakı Marafonunun şüarı "Küləyə qalib gəl"dir.[5]
- ↑ "Bakı küləkləri". "Azərbaycan" qəzeti (az.). 12 yanvar 2020. 26 aprel 2023 tarixində arxivləşdirilib. İstifadə tarixi: 22 aprel 2023.
- ↑ "Vladimir Kirşon". Puşkinskiy Dom (rusca). İstifadə tarixi: 20 sentyabr 2025.
- ↑ "Küləklər şəhəri". Əli və Nino (az.). 27 aprel 2023 tarixində arxivləşdirilib. İstifadə tarixi: 22 aprel 2023.
- ↑ ""Küləklər şəhəri": yeni milli teleserial". Mədəniyyət qəzeti. 14 yanvar 2011. 20 sentyabr 2025 tarixində arxivləşdirilib. İstifadə tarixi: 20 sentyabr 2025.
- ↑ "Bakı Marafonu - 2025 başlayır!". Bakı Marafonunun saytı. İstifadə tarixi: 20 sentyabr 2025.