Heydər Əliyev parkı və ya Heydər Əliyev Xatirə Parkı — Azərbaycan Respublikasının Lənkəran şəhərində yerləşən, Ümummilli lider Heydər Əliyevin adını daşıyan park. Bu park Lənkəran şəhərinin sahəsinə görə ən böyük parkı hesab olunur.
| Heydər Əliyev parkı | |
|---|---|
 | |
| Məlumatlar | |
| Parkın tipi | İctimai şəhər parkı |
| Yerləşməsi | Şirəli Axundov küçəsi, Məhəmməd Əmin Rəsulzadə küçəsi, Həzi Aslanov küçəsi, Lənkəran, Azərbaycan |
| Sahəsi | 3,49 ha |
| Tabeçiliyi | Lənkəran Şəhər İcra Hakimiyyəti |
| Statusu | Fəaliyyət göstərir |
Parkın əsası Sovet dövründə qoyulmuşdur və o zamanlar Zabitlər parkı və ya yerli sakinlər tərəfindən “Dosa” adı ilə tanınırdı. Lənkəran şəhərinin əsas ictimai istirahət yerlərindən biri kimi fəaliyyət göstərmişdir.
1993-cü ilin avqustunda parkda Ulu Öndər Heydər Əliyevin çağırışı ilə ölkənin ərazi bütövlüyünü və dövlətçiliyini müdafiə edən minlərlə insanın iştirak etdiyi kütləvi mitinq keçirilmişdir. Bu mitinq, həmin ilin iyun ayında Əlikram Hümmətovun rəhbərliyi ilə elan edilmiş qondarma Talış-Muğan Muxtar Respublikasına qarşı xalqın etirazını ifadə edirdi. Mitinq zamanı separatçı qüvvələr tərəfindən dinc nümayişçilərə atəş açılmış, nəticədə Sultanağa Bayramov, Etibar Əliyev və Paşa Təhməzov şəhid olmuşdur. Hadisələrdən sonra qondarma rejim devrilmiş, Lənkəranda və digər ərazilərdə əminamanlıq bərqərar olmuş və şəhid olmuş şəxslərə Ümummilli lider Heydər Əliyevin sərəncamı ilə Azərbaycanın Milli Qəhrəmanı fəxri adı verilmiş, xatirələri əbədiləşdirilmişdir.[1]
2000-ci illərin əvvəllərindən etibarən parkda əsaslı yenidənqurma işlərinə başlanılmış, ərazisi genişləndirilmiş və müasir infrastruktur yaradılmışdır. 2006-cı ildə Azərbaycan Respublikasının Prezidenti İlham Əliyev və birinci xanım Mehriban Əliyeva parkı ziyarət etmiş, burada görülən abadlıq işləri ilə tanış olmuşlar.
Parkın ərazisində aşağıdakı əsas obyektlər yerləşir:
Heydər Əliyev Mərkəzi – Ulu öndər Heydər Əliyevin həyat və fəaliyyətinə həsr olunmuş mədəniyyət və informasiya mərkəzi;
M.Ə.Rəsulzadə adına Gənclər Mərkəzi – Gənclərin maarifləndirilməsi və inkişafı üçün fəaliyyət göstərən ictimai məkan;
Heydər Əliyev Meydanı – Parkın mərkəzində yerləşən geniş meydan;
İkinci Dünya müharibəsi memorialı – Faşizmə qarşı mübarizədə həlak olmuş lənkəranlıların xatirəsinə ucaldılmış abidə.
Bundan əlavə, parkda fəvvarələr, müasir işıqlandırma sistemi, gəzinti yolları, oturacaqlar və yaşıllıq sahələri mövcuddur.