Hümbətov Həsən Həşim oğlu — azərbaycanlı neft mühəndisi, texnika elmləri doktoru. Əmək fəaliyyətinə "Neft Daşları"nda başlamış, "Azneft" İB-nin baş mühəndisi vəzifəsində çalışmış, Azərbaycan neft sənayesinin inkişafında mühüm rol oynamışdır.
| Həsən Hümbətov | |
|---|---|
| Hümbətov Həsən Həşim oğlu | |
 | |
| Doğum tarixi | |
| Doğum yeri | Aşağı Uzunoba kəndi, Naxçıvan MSSR, Azərbaycan SSR |
| Vəfat tarixi | (66 yaşında) |
| Atası | Həşim |
| Anası | Durna |
| Elmi dərəcəsi | texnika elmləri doktoru |
| İş yeri | Azərbaycan Dövlət Neft Şirkəti |
| Təhsili | Azərbaycan Sənaye İnstitutu |
| Üzvlüyü | Beynəlxalq Mühəndislər Akademiyası, Avropa Beynəlxalq Biblioqrafik Mərkəzi. |
| Mükafatları |
 |
Hümbətov Həsən Həşim oğlu Azərbaycan Respublikası Naxçıvan MR Naxçıvan şəhərində anadan olmuşdur. 1959-cu ildə "Neft yataqlarının işlənilməsi və istismarı" ixtisası üzrə Azərbaycan Sənaye İnstitutunun neft-mədən fakültəsini bitirmişdir. 1971-ci ildə namizədlik, 1996-cı ildə isə "Azərbaycanın dəniz neft yataqlarının mürəkkəb şəraitlərində neftin yığılması, nəqli və hazırlanması proseslərinin səmərəliliyinin artırılması" mövzusunda doktorluq dissertasiyaları müdafiə etmişdir.
Əmək fəaliyyətinə "Neft Daşları" Neft-Qaz Çıxarma İdarəsi-ndə (NQÇİ) operator kimi başlayaraq, usta köməkçisi, neft hasilatı ustası kimi müxtəlif vəzifələrdə işləmişdir. 1968–1992-ci illərdə Hümbətov H. H. "Nərimanovneft" NQÇİ-də rəis vəzifəsində işləmişdir ki, burada onun rəhbərliyi altında kompleks elmi-tədqiqat işləri aparılaraq, əldə edilmiş nəticələr müvəffəqiyyətlə istehsalata tətbiq edilmişdir.
1992–1994-cü illərdə "Azneft" İB-nin neft-qaz hasilatı üzrə Baş İdarəsinin neftin hazırlanması və nəqli istehsalat şöbəsinə rəhbərlik etmiş, 1994-cü ildən 2003-cü ilə dək dənizdə neft hasilatı üzrə İB-də baş mühəndis, daha sonra isə Dövlət Neft Şirkətinin Neft Qaz Elmi-Tədqiqat Layihə İnstitutu-nda direktor müavini vəzifəsində işləmişdir.
Həsən Hümbətov 2003-cü il 13 noyabr tarixində Bakı şəhərində vəfat etmişdir. Ailəli olmuş, iki övladı və dörd nəvəsi var.
Həsən Hümbətov, Bakıdan mühəndis (1968) - qısametrajlı sənədli film (Hassan Goumbatov, ingénieur à Bakou - 1968)
1968-ci ildə Belçikanın RTBF (Radio-télévision belge de la communauté française) televiziya şirkəti tərəfindən Azərbaycanda neft sənayesinə həsr olunmuş sənədli film çəkilmişdir.[1] 26 dəqiqəlik filmdə Neft Daşlarında çalışan Həsən Hümbətovun peşəkar fəaliyyəti və Azərbaycan neftçilərinin gündəlik həyatını əks etdirilir.[2] Filmdə onun ev şəraiti, dəniz platformasında çalışması, neft hasilatı prosesini idarəetməsi və həmkarları ilə iş mühiti təsvir olunur. Film həmçinin o dövrün texniki şəraitini və mühəndis əməyinin əhəmiyyətini nümayiş etdirir.
Həsən Hümbətov neft və qazın saxlanması və nəqli sahəsində tanınmış alimdir. 100-dən artıq elmi məqalənin və 23 monoqrafiyanın, bir sıra ixtiraların müəllifidir.[3][4] 1999-cu ildə Beynəlxalq Mühəndislər Akademiyasının həqiqi üzvü seçilmiş və Avropa Beynəlxalq Biblioqrafik Mərkəzinin baş direktoru təyin edilmişdir. Yüksək ixtisaslı alim və mütəxəssis kimi kompleks elmi-tədqiqat işləri aparmışdır və onun neft və qaz hasilatının artırılması üçün əldə etdiyi nəticələr müvəffəqiyyətlə istehsala tətbiq edilirdi.
"Şöhrət" ordeni — 20 sentyabr 2001[5]
- ↑ "Excerpt of the documentary on Hassan Goumbatov, engineer in the oil industry in Baku, Azerbaijan". 1968.
- ↑ "Belçikanın 57 il əvvəl Bakıda çəkdiyi sənədli film –Gənc neftçi, gələcək alim Həsən, "Neft Daşları"".
- ↑ "M.F.Axundov adına Azərbaycan Milli Kitabxanası" (PDF).
- ↑ "Dövlət Elm və Texnika Komitəsi Patent və Lisenziya İdarəsinin 2001-ci il tarixli rəsmi bülleteni" (PDF).
- ↑ Hüquqi Aktların Dövlət Reyestri. "Azərbaycan neftçilərinin təltif edilməsi haqqında Prezident Fərmanı". e-qanun.az (az.). 2019-01-25 tarixində arxivləşdirilib. İstifadə tarixi: 2024-04-02.