Həmyerlilər

Televiziya tamaşasında hadisələr Əmək və Əhalinin Sosial Müdafiəsi Nazirliyi nəzdində fəaliyyət göstərən idarələrin birində və ətrafında cərəyan edir. Belə ki, hadisələr idarəyə yeni inspektorun(əslində, nazir müavininin) təyin edilməsi ilə üz verir. Yeni işçinin rəhbərin həmyerlisi olması idarənin qəliz taleyi üçün ümid yeri hesab edilir, fəqət inspektorun(Tariyel Qasımov) öz işini dürüst şəkildə yerinə yetirməsi," Həmyerli" məsələsini dövlətə sədaqətlə xidmətdən üstün tutmaması idarə rəhbərliyinin planlarını alt-üst edir. Televiziya tamaşasında günün ümdə məsələləri işıq üzü görür. Rüşvətxorluq, həmyerlipərəstlik, dələduzluq, şan-şöhrətə aludə kimi əyriliklər ekran həllini tapır. Tamaşanın ən yaddaqalan süjeti isə sonda hər kəsin Xanım xalanın(Lətifə Əliyeva) sayəsində inspektorun, əslində, nazir müavini olduğunu bilməsidir. Ümumiyyətlə, televiziya tamaşasında "Şərəf və ləyaqətlə yaşamaq bir sənətdir. Bu həyatda elə yaşa ki, öz ömrünün sənətkarı olasan." ideyaları tamaşaçılara çatdırılır.

Altay Məmmədovun 1960-cı illərdə qələmə aldığı maraqlı əsərlərdən biri ilk dəfə 1960-cı ildə Gəncə Dövlət Dram teatrında səhnəyə qoyulur. Əsər həmçinin ispan, ingilis, ərəb, fars, macar, eston, tacik dillərinə tərcümə olunub və Rusiya, Tacikistan, Bolqarıstan, Türkiyə və İranda tamaşaya qoyulub. O zaman teatr səhnələrində də məşhurlaşan həmin əsər belə adlanır: Həmyerlilər… Əsər 1990-cı illərin sonlarında Azərbaycan Televiziyasında ekrana gətirilir. Teatr və kino fədaisi Lütfi Məmmədbəyovun və televiziya rejissoru Əmirhüseyn Məcidovun quruluşunda təqdim olunan televiziya tamaşası ilk nümayişdən sonra böyük tamaşaçı marağına səbəb olur. Müəllif təqdim etdiyi mövzuda diqqət çəkən məqamlara toxunur və hər bir insanı öz işini şərəflə, vicdanla yerinə yetirməyə çağırır. "Həmyerlilər" tamaşası bir-birindən maraqlı, koloritli surətlərlə zəngindir. Obrazlar bir-birindən fərqliliyi, öz şirinliyi ilə diqqəti cəlb edir. Aktyor dəsti-xətti, oyun tərzi və xüsusi improvizələr ekran əsərini daha yaddaqalan edib.

Əsərin müəllifi: Altay Məmmədov

Quruluşçu rejissorlar : Lütfi Məmmədbəyov,Əmirhüseyn Məcidov

Quruluşçu operator: Fərman Nəbiyev

Quruluşçu rəssam: Rafiq Əbdülrəhimov

Operatorlar: Elman Hüseynov, Zaur Əsgərbəyov, Rza Fərəcov

Səs rejissoru: Vaqif İmanquliyev

Musiqi tərtibatçısı: Təranə Babayeva

Rejissor köməkçiləri : Əzizağa Mövsümov, Rza Məmmədov

Balvazov- Bürcəli Əsgərov

Gümüşov — Səyavuş Aslan

Fərid — Tariyel Qasımov

Zərrin- Nübar Novruzova

Sarı Sarızadə — Hacı İsmayılov

MaşAllah — Şahin Cəbrayılov

Xanəli- Məcnun Hacıbəyov

Nuru kişi — Məmməd Sadıqov

Göyçək — Sofya Bəsirzadə

Yaqub — Mustafa Süleymanov

Xanım — Lətifə Əliyeva

Zəhra — Mehriban Rəsulova

Kazım kişi — Firuz Xudaverdiyev

Birinci kişi — Nəcəf Həsənzadə

Azərbaycan televiziya tamaşaları