Hümbət Musayev

Hümbət Musayev 1960-cı il, avqustun 02-də Qərbi Azərbaycanın Amasiya rayonunda anadan olub.1967–1977-ci illərdə Amasiya rayonunun 1 saylı orta məktəbində oxuyub.1977–1982-ci illərdə BDU-nun Mexanika-riyaziyyat fakültəsinin əyani şöbəsində təhsil alıb. Tələbəlik dövründə respublika olimpiadalarının qalibi, həmin dövrün bir sıra təltif və mükafatlarının sahibi, həmçinin Azərbaycan komsomol mükafatı laureatı olmuş, fəxri fərmanlara layiq görülmüşdür. Bir müddət təyinatla Zaqatala rayonunda müəllim işləmişdir. Aspiranturaya daxil olduğundan 1986-cı ildən Bakı Dövlət Universitetində çalışmışdır, riyaziyyat elmləri doktoru, Nyu-York Elmlər Akademiyasının üzvüdür (1998).

H. Musayev Yeni Azərbaycan Partiyasının, Qərbi Azərbaycan İcması Müşahidə Şurasının da üzvüdür.

Ailəlidir. İki övladı, 1 nəvəsi var.

1988-ci ildən dövri mətbuatda çalışır. İlk dövrlər "Yeni fikir", "Hikmət" qəzetlərində müxbir, şöbə müdiri, baş redaktorun müavini, sonradan "Vətən həsrəti" qəzetində şöbə müdiri, baş redaktorun müavini, baş redaktor vəzifələrində işləmişdir. 1996-cı ildən Azərbaycan Respublikası Prezidentinin İşlər İdarəsinin təsis etdiyi "Respublika" qəzetində baş redaktorun müavini, birinci müavini işləmiş, hazırda baş redaktorudur. Baş redaktorluq dövründə də media sahəsində müasir çağırışlara uyğun olaraq qəzetin maraqlı, məzmunlu olması, oxucu tələbatını ödəməsi üçün bir çox mütərəqqi yeniliklər edilir. Qəzetdə yeni rubrikalar yaradılır, problematik mövzuların müzakirəsi təşkil edilməklə polemikalara geniş yer verilir, zamanla, həyatla səsləşən məqalələr əksəriyyət təşkil edir.

Türkiyə, Qazaxıstan, Rusiya, Almaniya, Yunanıstan, İran, Çex və s. ölkələrdə beynəlxalq konfrans və simpoziumların iştirakçısı olmuş, elmi məruzələrlə çıxış etmişdir. Xaricdə və respublikamızda nəşr olunan dövri jurnallarda (Web of Sciences və Scopus seriyası da daxil olmaqla) 100-ə yaxın elmi, həmçinin çoxlu sayda elmi-kütləvi məqalələri dərc olunmuşdur.

İqtisadi islahatların sürətləndirilməsinə, müstəqil Azərbaycanın iqtisadi qüdrətinin artırılmasına xidmət edən tarixi sənədlərin toplandığı "Azərbaycanda iqtisadiyyatın və sosial sahənin yüksəlişi özəl sektorun inkişafından asılıdır", "Azərbaycanda kiçik və orta sahibkarlığın inkişafına dair" kitablarının ərsəyə gəlməsinə xüsusi əmək sərf etmiş, "Azərbaycan Respublikası regionlarının sosial-iqtisadi inkişafı Dövlət Proqramı (2004–2008-ci illər)" kitabının tərtibçisi və "Azərbaycan Respublikası regionlarının sosial-iqtisadi inkişafı Dövlət Proqramı (2009–2013-cü illər)" kitabının redaktoru olmuşdur.

Ümummilli lider Heydər Əliyevin 1990–2003-cü illərdə ölkə daxilində, eləcə də rəsmi səfərlər zamanı xaricdə kütləvi informasiya vasitələri nümayəndələri ilə görüşləri əksini tapan "Heydər Əliyev və mətbuat" 4 cildliyinin isə (Bakı, 2003, hər bir cildi 640 səh.) redaktoru olmuşdur.

Bir neçə kitabın, həmçinin dərslik və dərs vəsaitinin müəllifi olsa da, həmmüəlliflərindən olduğu, öz aktuallığı və dəyəri ilə seçilən iki kitab daha yüksək həvəs və zövqlə ərsəyə gəldi:"Azərbaycan-Rusiya münasibətlərində yeni mərhələ" (Bakı, 2001, 180 səh.) — Azərbaycan-Rusiya münasibətlərinin yaxşılaşmasında Heydər Əliyevin xüsusi xidmətlərindən bəhs edən kitab; "Prezident İlham Əliyev" (Bakı, 2004, 366 səh.) — Ölkə başçısının prezidentlik fəaliyyətinə həsr olunmuş irihəcmli kitab.

Təhsillə bağlı normativ akt və sənədlərlə, qanunvericiliklə, tədris planlarının məzmunu ilə yaxından tanış olduğundan fakültənin və universitetin ictimai həyatında fəal iştirak etməklə, obyektivliyi, ədalətliliyi ilə professor-müəllim heyəti və tələbə kontingenti arasında yüksək nüfuza malikdir.

BDU-da tədris etdiyi fənni elmin müasir problemləri ilə əlaqələndirməklə mühazirələr oxuyur, seminar məşğələləri aparır, tələbələrin kurs və buraxılış işlərinə, magistr və doktorluq dissertasiyalarına rəhbərlik edir. Bir çox tədris proqramlarının, metodik göstərişlərin, vəsaitlərin hazırlanmasında həmmüəllif olub. Universitetin yuxarı kurs tələbələri, magistrantlar və elmi-tədqiqatla məşğul olan gənc mütəxəssislər üçün nəzərdə tutulan "Kommutatorlar nəzəriyyəsinin elementləri" (Bakı, 2004, 168 səh.) adlı dərs vəsaitinin də müəllifidir.

"Qızıl qələm", "Həsən bəy Zərdabi" mükafatları laureatı və jurnalistika sahəsində mövcud olan digər ictimai təşkilatların verdiyi mükafatların sahibidir. Bundan əlavə yazdığı məqalələr "Fikir, söz və məlumat azadlığının, plüralizmin inkişaf etdirilməsi" mövzularında keçirilən müxtəlif fərdi jurnalist yazıları müsabiqələrində dəfələrlə birinci yerə layiq görülmüşdür.

Azərbaycan Respublikasının Prezidenti İlham Əliyevin 21 iyul 2005-ci il tarixli sərəncamı ilə "Tərəqqi" medalı ilə təltif edilmişdir.^[1]

Azərbaycan Respublikası Prezidentinin 2 fevral 2024-cü il tarixli Sərəncamı ilə "Heydər Əliyevin 100 illiyi (1923–2023)" yubiley medalı ilə təltif edilmişdir.

26 yanvar 2023-cü ildə "Azərbaycan Respublikası Müdafiə Sənayesi Nazirliyinin 15 illiyi (2005–2020)" Azərbaycan Respublikasının yubiley medalı ilə təltif edilmişdir. 2024-cü il noyabrın 11–22-də Bakı şəhərində keçirilmiş BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) fəal iştirakına görə 10 dekabr 2024-cü ildə Azərbaycan Respublikası Prezidentinin Təşəkkürnaməsi ilə təltif edilmişdir.

Milli mətbuatımızın 150 illik yubileyi münasibətilə Azərbaycan Respublikasının Prezidenti İlham Əliyevin 21 iyul 2025-ci il tarixli sərəncamı ilə "Əməkdar jurnalist" fəxri adına layiq görülmüşdür.^[2]

Həmçinin "Bakı Dövlət Universitetinin 100 illiyi (1919–2019)" və "Azərbaycan Dövlət Pedaqoji Universitetinin 100 illiyi (1921–2021)" Azərbaycan Respublikasının yubiley medalları ilə təltif edilmişdir.

Jurnalistlik fəaliyyətilə yanaşı, gənc nəslin təlim-tərbiyəsində və yeni kadrların yetişməsində də yaxından iştirak edir. Bu səbəbdən də 2009-cu ildə "Qabaqcıl Təhsil İşçisi" fəxri adına layiq görülmüşdür.

• Bakı Dövlət Universitetinin rəsmi veb-saytında Hümbət Musayev