Grunewald qalası — Karlsberq təpəsi üzərində yerləşən mənzərəli bir qaladır. Şarlottenburq-Wilmersdorfun Grunewald məhəlləsi sərhədlərində yerləşən qala, Berlinin görməli yerlərindən biri hesab olunur. Hündürlüyü 36 metrdir[1].
Qala 1899-cu ildə Prussiya kralı və Almaniyanın ilk imperatoru I Vilhelmin adına abidə olaraq inşa edilmişdir. Qotik üslubunda tikilən binada I Vilhelmin heykəli də var. Həmçinin Albrext fon Run, Helmut von Moltke, Otto fon Bismark və Şahzadə Friedrich Karlın portretləri qalanın dörd küncündə yerləşir.
1897-ci ildə Landkreis Teltovun parlamenti Ernst von Stubenrauchun fikri ilə 1888-ci ildə vəfat edən Prussiya Kralı I Vilhelmin 100-cü doğum günü şərəfinə bir abidə tikmək qərarı verildi. Beləliklə, Grunewald meşələrində yerləşən Karls dağında bir mənzərə qalası tikmək qərara alındı. Binanın memarı Frans Şvechten oldu. 10 mart 1897-ci ildə Şvechtenin layihəsi imperator II Vilhelm tərəfindən təsdiq edildi və inşaatın icazəsi verildi. Qalanın inşasına 1897-ci ilin oktyabrında başlandı və bir il yarım sonra qala 22 mart 1899-cu ildə tamamlandı və 9 iyun 1899-cu ildə ziyarətçilər üçün açıldı.
Qala 1953-cü ildə təmir edildi, lakin 12 oktyabr 2007-ci ildə ikinci dəfə əsaslı şəkildə təmir edildi və 2009-cu ildə tamamlandı[2].
- ↑ "Grunewaldturm". 2021-12-03 tarixində arxivləşdirilib. İstifadə tarixi: 2020-03-13.
- ↑ "Grunewald". 2020-03-13 tarixində arxivləşdirilib. İstifadə tarixi: 2020-03-13.