Graduation — amerikalı repçi, prodüser Kanye Vestin üçüncü studiya albomu, 11 sentyabr 2007-ci ildə "Def Jam Recording" və "Roc-A-Fella Records" tərəfindən buraxılıb. Albomun yazılması 2005-2007-ci illər ərzində Nyu-York və Los-Ancelesdəki müxtəlif studiyalarda davam edib. Əsas istehsalçı qismində özü çıxış edən Kanye West bir sıra peşəkar prodüserlərlə, o cümlədən DJ Toomp ilə əməkdaşlıq qurub. Albomda Dwele, T-Pain, Lil Wayne, Mos Def, DJ Premier kimi tanınmış musiqiçilər, eləcə də "Coldplay" qrupunun solisti Kris Martin qonaq ifaçı rolunda iştirak ediblər. Albomun üz qabığı məşhur yapon rəssamı Takaşi Murakaminin əl işidir; sənətkar sonradan 2018-ci ildə Kanye Vest və Kid Cudinin birgə hazırladığı "Kids See Ghosts" albomunun üz qabığı tərtibatını da öz üzərinə götürüb.
| Graduation | ||||
|---|---|---|---|---|
 | ||||
| Kanye Vest tərəfindən ifa olunmuş studiya albomu | ||||
| Yayımlanma tarixi | 5 sentyabr 2007 | |||
| Yazılma tarixi | 2005–2007 | |||
| Janr | hip-hop[d], pop rep[d], alternativ hip-hop, proqressiv rep[d] | |||
| Müddət | 51:23 | |||
| Dil | ingilis dili | |||
| Prodüser |
|
|||
| Kanye Vest albomlarının xronologiyası | ||||
|
||||
Stadionlarda təşkil edilən konsertlərdən, haus musiqisindən və müstəqil rok istiqamətindən təsirlənərək ərsəyə gətirilən "Graduation" albomunda Vest əvvəlki əsərlərindəki zəngin soul musiqisi üslubundan kənarlaşaraq daha həyəcanlı bəstələrə yönəlmişdir. Sənətkar müxtəlif janrlardan örnəklər əxz edərək, rep ifaçılığına yeni münasibət gətirmiş, sintezator avazlarını qat-qat yerləşdirmiş və elektron musiqinin imkanlarından məharətlə bəhrələnmişdir. O, şöhrətin gətirdiyi diqqət mərkəzində olmağa qarşı ikili münasibətini dilə gətirərkən dinləyicilərinə ünvanlanmış ruhlandırıcı ismarıclar da çatdırmışdır. Albom, Vestin ilk iki studiya albomunun – "The College Dropout" (2004) və "Late Registration" (2005) – təhsil mövzusunu vədəsindən əvvəl yekuna yetirmişdir, zira yarımçıq qalan "Good Ass Job" layihəsi bu konseptual silsiləni üçlük deyil, dördlük olaraq tamamlamalı idi.
"Graduation" Billboard 200-də birinci yerə yüksəlmiş, ilk həftədə 957 min nüsxədən çox satılmışdır. Albom Amerika bazarında 7 milyondan satış göstəricisinə malik olmuş və RIAA-dan 7 qat platin statusu almışdır. Albomdan beş mahnı sinql kimi buraxılmışdır. "Stronger", "Good Life" və "Homecoming" mahnıları beynəlxalq səviyyədə uğur qazanmışdır. "Stronger" Billboard Hot 100-də ön sıraya çıxmışdır. Musiqi tənqidçiləri alboma yüksək qiymət vermiş, xüsusilə istehsal keyfiyyətini tərifləmişlər. Albom müəllifinə "Qremmi" mükafatını "Ən yaxşı rep albomu" kateqoriyasında üçüncü dəfə qazandırmış, "İlin albomu" nominasiyasında isə üçüncü dəfə namizəd kimi irəli sürülməsinə vəsilə olmuşdur. "Rolling Stone" və "USA Today" kimi nüfuzlu nəşrlər "Graduation"ı 2007-ci ilin ən yaxşı albomları sırasına daxil etmişlər. Zaman keçdikcə albomun əhəmiyyəti artmış, "Rolling Stone"un "Bütün zamanların 500 ən böyük albomu" və "NME"nin "Bütün zamanların 500 ən böyük albomu" siyahılarında yer almışdır.
Vestin təhsil mövzusuna həsr olunmuş dördlük silsiləsinin üçüncü albomunu təşkil edən "Graduation", ifaçının dördüncü studiya albomunun – "808s & Heartbreak"in (2008) yaranması ilə əlaqədar yarımçıq qalmışdır. Bu əsər sənətçinin yaradıcılıq təkamülündə yeni mərhələ açmışdır.
İrland rok qrupu "U2"nun "Vertigo turu" zamanı onlarla birgə dünya turunda olan Vest, xüsisilə Bononun (solist) stadionları valeh edən çıxışlarından ruhlanaraq, geniş konsert meydanlarında səslənəcək təsirli rep kompozisiyaları bəstələməyə yönəlmişdir. Bu məqsədlə musiqiçi hip-hop janrına elektron sintezatorların çoxqatlı səslənməsini daxil etmiş, tempi yavaşlatmış, səksəninci illərin musiqi ruhundan bəhrələnərək elektron musiqinin imkanlarını araşdırmışdır.
Çikaqoda səksəninci illərin əvvəllərində meydana gələn elektron rəqs musiqisinin alt janrı – haus musiqisi Vestin yaradıcılığına xüsusi təsir göstərmişdir. Musiqiçinin etirafına görə, gənclik illərində evdə yaxud avtomobilində hip-hop dinləsə də, rəqs etmək istəyəndə haus klublarına üz tutarmış.
Vest musiqisinin sərhədlərini "Graduation" albomunda xeyli genişləndirərək, klassik soul musiqisindən götürdüyü nümunələrlə kifayətlənməyib, müxtəlif janrlardan bəhrələnmişdir. O, haus musiqisi ilə yanaşı, avro-disko, sərt rok, elektronika, lanj, proqressiv rok, sint-pop, elektro, krautrok, dab, reqqi və densholl elementlərini öz yaradıcılığında məharətlə birləşdirmişdir. Üçüncü studiya albomunda rep ifaçılığını dəyişərək, Bononun opera tərzli oxuma üslubuna bənzər, coşqun axıcılığı mənimsəmişdir. O, vokal təqdimatında sərt samitlərdən daha çox ahəngdar saitlərə üstünlük vermişdir. "U2" qrupundan əlavə, Vest öz melodiyalarını bəstələyərkən "The Rolling Stones" və "Led Zeppelin" kimi rok qruplarının yaradıcılığından ilhamlanmışdır. "Rolling Stones" ilə "A Bigger Bang" konsert turunda çıxış etdikdən sonra, mürəkkəb lirik mövzuların tamaşaçıları lazımi səviyyədə cəlb etmədiyini anlayaraq, qafiyələrini sadələşdirmişdir.
Kanye Vest əvvəlki əsərlərindəki çoxsaylı ara parçaları və əlavə materiallardan fərqli olaraq, "Graduation" albomunda yığcamlığa üstünlük vermişdir. Belə ki, albomun rəqəmsal variantında on dörd, adi formatında isə on üç mahnı yer almışdır. Bu yanaşma onun "My Beautiful Dark Twisted Fantasy" və "Yeezus" kimi sonrakı əsərlərində də öz əksini tapır. Vest həmçinin albomda qonaq ifaçıların iştirakını azaldaraq, yalnız bir rep ustasına yer vermişdir. O öz musiqisinin formalaşmasında "The Killers", "Keane", "Modest Mouse" rok qruplarının və indi-pop musiqiçisi Feist-in yaradıcılığından təsirlədiyini qeyd etmişdir. Bu albom, dövründəki musiqi cərəyanlarını və mürəkkəb elektron sintezatorları məharətlə özündə cəmləşdirərək, Vestin qənaətinə görə, hip-hop musiqisinə tamamilə yeni bir yön vermişdir. O, "Graduation"ın sadəcə müxtəlifliyi ilə deyil, dinlədiyi musiqilərin təsirini və ruhunu yaradıcılığında dəqiqliklə əks etdirə bilməsi ilə əhəmiyyətli olduğunu düşünür.
| № | Başlıq | Müddət |
|---|---|---|
| 1. | "Good Morning" | 3:15 |
| 2. | "Champion" | 2:47 |
| 3. | "Stronger" | 5:12 |
| 4. | "I Wonder" | 4:03 |
| 5. | "Good Life" (featuring T-Pain) | 3:27 |
| 6. | "Can't Tell Me Nothing" | 4:31 |
| 7. | "Barry Bonds" (featuring Lil Wayne) | 3:24 |
| 8. | "Drunk and Hot Girls" (featuring Mos Def) | 5:13 |
| 9. | "Flashing Lights" (featuring Dwele) | 3:57 |
| 10. | "Everything I Am" (featuring scratches by DJ Premier) | 3:47 |
| 11. | "The Glory" | 3:32 |
| 12. | "Homecoming" (featuring Chris Martin) | 3:23 |
| 13. | "Big Brother" | 4:47 |
| Ümumi müddət: | 51:23 | |
| № | Başlıq | Müddət |
|---|---|---|
| 14. | "Good Night" (featuring Al Be Back and Mos Def) | 3:07 |
| № | Başlıq | Müddət |
|---|---|---|
| 14. | "Can't Tell Me Nothing" (remix featuring Young Jeezy) | 4:08 |
| № | Başlıq | Müddət |
|---|---|---|
| 14. | "Good Night" (featuring Al Be Back and Mos Def) | 3:06 |
| 15. | "Stronger" (A-Trak Remix) | 4:34 |
| № | Başlıq | Müddət |
|---|---|---|
| 14. | "Good Night" (featuring Al Be Back and Mos Def) | 3:06 |
| 15. | "Bittersweet Poetry" (featuring John Mayer) | 4:01 |
| № | Başlıq | Müddət |
|---|---|---|
| 14. | "Stronger" (A-Trak Remix) | 4:34 |
| 15. | "Stronger" (AD Remix Main) | 4:48 |
Sempllər
- "Good Morning" trekində Elton Conun "Someone Saved My Life Tonight" mahnısının semplindən istifadə edilib.
- "Champion" trekində Steely Dan tərəfindən ifa olunmuş "Kid Charlemagne" mahnısının semplindən istifadə edilib.
- "Stronger" trekində Daft Punk-un "Harder, Better, Faster, Stronger" və Edwin Birdsong-un "Cola Bottle Baby" mahnılarının semplindən istifadə edilib.
- "I Wonder" trekində Labi Siffre-nin "My Song" mahnısının semplindən istifadə edilib.
- "Good Life" trekində Maykl Cekson tərəfindən ifa olunan "P.Y.T. (Pretty Young Thing)" mahnısının semplindən istifadə edilib.
- ↑ "Graduation Kanye West − Album, singles et concerts" (fransız). Virgin Mega. October 18, 2014 tarixində orijinalından arxivləşdirilib. İstifadə tarixi: October 12, 2014.
- ↑ "Graduation (Alternative Business Partners)". 2020-12-23 tarixində arxivləşdirilib. İstifadə tarixi: 2023-08-29.
- ↑ "Graduation + 2 remixes Kanye West − Album, singles et concerts" (fransız). Virgin Mega. October 18, 2014 tarixində orijinalından arxivləşdirilib. İstifadə tarixi: October 12, 2014.
- ↑ "Graduation (French Limited Version)". 2020-12-23 tarixində arxivləşdirilib. İstifadə tarixi: 2023-08-29.