Gecəgörmə cihazı

Gecəgörmə cihazı — obyektləri onların məxsusi və ya əks etdirdiyi istilik (infraqırmızı – İQ) şüalanmasına görə qaranlıqda və ya zəif işıqlandırılmış şəraitdə tapmaq və müşahidə etmək üçün cihaz.

İş prinsipi, obyektin İQ şüalardakı təsvirinin görünən təsvirə çevrilməsinə əsaslanır. Gecəgörmə cihazlarının əsasını İQ şüaların qəbuledicisi, gücləndirici və təsvirin vizuallaşdırılma qurğusu funksiyalarını yerinə yetirən fotoelektron cihaz təşkil edir.

Mənbədən (işıqlanan gecə səması, ulduzlar, Ay və s.) gələn şüalar obyektdən əks olunaraq gecəgörmə cihazının obyektivinə düşür və obyektin gözlə görünməyən təsvirini ("portretini") yaradır. Bu "portret" qəbuledicidə görünən təsvirə çevrilir.

Gecəgörmə cihazları iki əsas növə bölünür:

Passiv cihazlar – təbii gecə işığında işləyir

Aktiv cihazlar – adətən İQ diapazona yaxın işıqlandırma ilə işləyir

Elektron-optik çevirici və ya onun analoqu – fotohəssas inteqral sxem əsasında hazırlanan gecəgörmə cihazları daha geniş yayılmışdır.

Konstruktiv cəhətdən gecəgörmə cihazları aşağıdakı formalar üzrə hazırlanır:

Monokl

Binokl

müxtəlif silahların nişangahları

eynək

fotoaparat və videokamera

Enerji mənbəyi kimi akkumulyatorlardan istifadə olunur.

Bütün gecəgörmə cihazları tozdan və nəmdən qoruyan, hermetik və zərbəyədavamlı gövdəyə malikdir.