Friren (personaj)

Manqa seriyasının yaradıcısı Kanehito Yamada məsul redaktor Katsuma Oquranın tövsiyəsi ilə komediya janrında olan vanşot manqa üzərində işləməyə başlamışdır. Manqanın əsas personajı üçün bir neçə ideya ilə çıxış etdikdən sonra gec yaşlanan elf sehrbaz yaratmağa qərar vermişdir. Oqura ideyanı bəyənmiş və illüstrator Tsukasa Abe ilə əlaqə saxlayaraq Frireni çəkməsini istəmişdir. Yamada onun dizaynını bəyənmiş və personajın insani aurasından təsirlənmişdir.^[1][2]

Anime adaptasiyasında Friren Atsumi Tanezaki tərəfindən səsləndirilir. Friren min ildən çox yaşayan personaj olduğu üçün Tanezaki personajı səsləndirərkən ən aşağı səs tonundan istifadə etmişdir. O, həmçinin Frireni manqadakına nisbətən daha istiqanlı səsləndirməyə çalışmışdır.^[3]

Friren qəhrəman Himmelin başçılıq etdiyi və 10 illik macəradan sonra İblis kralı məğlub edərək dünyada sülhü bərqərar etmiş komandanın keçmiş üzvü olan elf sehrbazdır. Friren gənc görünsə də, mindən çox yaşı var. Vaxtının çoxunu nadir sehrləri tapmaq və öyrənməklə keçirməyi sevir. Onun zaman qavrayışı insanlardan fərqli olduğu üçün çox səbirli xarakterə malikdir. Kiçik məqsədlərə çatmaq üçün aylarla və ya illərlə gözləməyə hazırdır. Friren çox uzunömürlü olduğu üçün insanların duyğularını və istəklərini başa düşməkdə çətinlik çəkir. Onun üçün 10 illik səyahət çox qısa müddət kimi gəlir.

Friren İblis kralın qüvvələri tərəfindən məhv edilmiş bir elf kəndində böyümüşdür. Bu hücumdan sağ qalan yeganə elf olan Friren Flamme adlı insan sehrbaz tərəfindən himayəyə götürülmüşdür. Friren onun başçılığı altında sehr öyrənməyə başlamışdır. İblislər manaya qarşı çox həssas olduğu üçün Friren iblisləri öldürmək üçün əsrlər boyunca öz manasını gizlətmək texnikası üzərisində ustalaşmışdır. Əsrlər sonra Himmelin komandasına qoşulmuş və 10 illik macəradan sonra İblis kralı məğlub etməyi bacarmışdır. Friren yüksəksəviyyəli sehrbazlıq bacarığına malik bir elfdir və ən çox iblis öldürən sehrbazlardan biri olması ona "Qatil Friren" (葬送のフリーレン, Soso no Friren^?) ləqəbini qazandırmışdır.

Friren bu macəradan 50 il sonra keçmiş yoldaşlarını görməyə gedir və onların çox yaşlandığını görür. Qısa müddət sonra Himmel ölür və Friren dəfnetmə mərasimində onu daha yaxşı tanımağa cəhd etmədiyi üçün peşman olduğunu ifadə edir. Friren daha sonra digər yoldaşlarını ziyarət edir və ölüm döşəyində olan keçmiş yoldaşı Hayterin xahişi ilə Fern adlı yetim qızı şagirdi kimi qəbul edir. Friren insanları daha yaxşı tanımaq üçün ikinci bir səyahətə çıxmağa qərar verir. Bu səyahətdə əsas məqsədi ruhların dincəldiyi yerin yerləşdiyi rəvayət olunan ucqar şimaldakı Aureola regionuna çatmaq və Himmeli son dəfə görməkdir. Friren Fernlə birlikdə səyahət edərək ona sehr öyrətməyə davam edir. Daha sonra onların komandasına Ştark adlı gənc döyüşçü də qoşulur.

"Anime News Network" Frirenin uzunömürlü elf olmasına baxmayaraq Himmelin ölümündən təsirləndiyini, bu səbəbdən Frirenin hekayəsinin digər fentezi hekayələrindən seçildiyini qeyd etmişdir. Friren Rip van Vinkl və Uraşima Taro kimi personajlarla müqayisə olunmuşdur.^[4] "Siliconera" saytı Frirenin oxuculara çox yaşlı və təcrübəli bir personajın belə dəyişə biləcəyini göstərdiyini bildirmişdir.^[5] "Sequential Tart" saytı Frireni "Ulduz yolu" personajı Spokla müqayisə etmişdir: "məntiqli və məsafəli, insanları başa düşməkdə çətinlik çəkən, lakin eyni zamanda insanlarla yaxınlaşdıqca onlara oxşayan personaj".^[6] "Anime News Network" saytının tənqidçisi Riçard Aysenbeys Frireni 2023-cü ilin ən yaxşı personajı seçmişdir.^[7]

Anime serialının 12-ci seriyasında Frirenin iksir təqdim edərkən nümayiş etdirdiyi qürrəli sifəti sosial mediada populyar olmuşdur.^[8]