Fərid Sadıxlı

Fərid Sadıxlı 2 fevral 2003-cü ildə Bakı şəhərində anadan olub. 2012-ci ildə güləşlə məşğul olmağa başlayıb. İlham Vəzirovun rəhbərliyi altında məşq edir, Neftçi İdman Klubunda çıxış edir. Azərbaycan İdman Akademiyasında təhsil alıb.

Fərid Sadıxlının beynəlxalq turnirində debütü 2019-cu ilə təsadüf edib. Həmin ilin iyununda o, İtaliyada baş tutan yeniyetmələr arasında Avropa Çempionatında bütün rəqibləri üzərində qələbə qazanaraq turnirin qalibi oldu. Həmin ilin iyulunda Fərid Sadıxlı Azərbaycanda baş tutan Avropa Gənclər Yay Olimpiya Festivalında da bütün rəqibləri üzərində qələbə qazanaraq turnirin qızıl medalına sahib oldu. Bir həftə sonra isə o, Sofiya şəhərində (Bolqarıstan) baş tutan yeniyetmələr arasında Dünya Çempionatını bürünc medalla başa vurdu.

Gənc yaşda ciddi uğurlara imza atan Fərid Sadıxlının nəticələrində daha sonra eniş qeydə alındı. Uzun müddət beynəlxalq turnirində çıxış etməyən Fərid Sadıxlı 2021 və 2022-ci illərdə Azərbaycan Çempionatlarının final görüşlərində məğlub olaraq gümüş medalların sahibi oldu.

Sadıxlı 2023-cü ildə tədricən yeni uğurlara imza atmağa başladı. Həmin ilin avqustunda o, İordaniyada 20 yaşlılar arasında Dünya Çempionatının final görüşündə məğlub olaraq turniri gümüş medalla başa vurdu. Noyabrda isə Fərid Sadıxlı Albaniyada 23 yaşlılar arasında Dünya Çempionatında bürünc medalın sahibi oldu.