Elxan Rəsulov

23 mart 1960-cı ildə Bakı şəhərinda anadan olmuşdur. Futbol ilə "Neftçi" klubunun hazırlıq qrupunda məşğul olmağa başlayıb və 17 yaşına qədər gənclər birinciliyində çıxış edib. Məktəbi bitirdikdən sonra o, birbaşa "Neftçi"nin əsas heyətinə cəlb olunub və peşəkar karyerasına başlayıb.

1978-ci ildə "Neftçi"nin heyətində Moskva-1980 Olimpiadasına hazırlaşan SSRİ olimpiya yığmasına qarşı yoldaşlıq oyunlarında iştirak edib və həmin dövrdə Rinat Dasayevlə tanış olub.

Rəsulovun "Neftçi" heyətində rəsmi debütü 1979-cu ildə Moskva "Dinamo"suna qarşı oyunda baş tutub. Matçın 87-ci dəqiqəsində hesab 0:0 olarkən bakılıların qapısına təyin olunan penaltini Aleksandr Maksimenkov dəqiq yerinə yetirərək Rəsulovu məyus edib və oyun "Dinamo"nun minimal hesablı qələbəsi ilə bitib. 1981-ci il mövsümündə o, "Neftçi"nin heyətində bütün oyunlarda meydana çıxıb. Həmin mövsüm keçirdiyi 34 matç arasında "Dinamo" və "Spartak" klubları ilə 1:1 hesablı heç-heçələr qapıçı üçün xüsusilə yadda qalan olub.

Daha sonra hərbi xidmətə çağırılan Rəsulov Moskvada xidmət etdiyi müddətdə MOİK (CSKA) klubuna dəvət alıb. Komanda ilə Bolqarıstandakı təlim-məşq toplanışına yollanan qapıçıya baş məşqçi Albert Şesternyov iki seçim təklif edib: ya Valeri Novikovdan sonra MOİK-in ikinci qapıçısı olmaq, ya da digər ordu klublarından birinə yollanmaq. Rostov SİA (SKA), Smolensk ordu komandası və Lvovun "SİA Karpatı" (SKA Karpaty) klubları arasından Rəsulov Şesternyovun məsləhəti ilə Lvov təmsilçisini seçib. O, komandanın məşqçisi Nikolay Samarinlə görüşərək Soçidəki toplanışa qatılıb.

1983-cü ildə rəsmən "Karpatı"ya keçən Rəsulov komandanın əsas qapıçısı olub və ilk mövsümündəcə təxminən 500 dəqiqəlik "quru seriya" (qol buraxmadan) imza atıb. 1984-cü ildə "Rotor" üzərindəki 8:0 hesablı qələbədə, 1988-ci ildə isə Moskvanın MOİK klubunu məğlub edərək onların Güclülər dəstəsinə yolunu kəsməkdə böyük pay sahibi olub. 1988-ci ildə komandada aparılan ciddi islahatlardan sonra o, Xabarovskun "SİA" (SKA) klubuna keçib və növbəti iki ili orada keçirib.

1991-ci ilin martından Polşanın "Stal Sanok" klubunun şərəfini qoruyan Elxan Rəsulov, daha sonra Azərbaycana — doğma klubu "Neftçi"yə qayıdıb. 1993-cü ilin yayında Miron Markeviçin dəvəti ilə yenidən Lvovun "Karpatı" klubuna üz tutub və Ukrayna çempionatında debütünü 22 avqust 1993-cü ildə "Temp" klubuna qarşı (1:1) edib. Burada gənc Boqdan Strontsitski ilə rəqabət aparsa da, həmkarı ilə dostluq münasibətlərini qoruyub saxlayıb. 1997-ci ilə qədər "Karpatı"da çıxış edən Rəsulov, həmçinin icarə əsasında "Çortkov" və "Karpatı-2" komandalarında da bir oyun keçirib.

1997-ci ildə 37 yaşında Lvovdan ayrılan qapıçı bir tanışının məsləhəti ilə Almaniyaya yollanıb. O, «Herford» (Herforder) həvəskar futbol klubunda iki il oyunçu-məşqçi kimi çıxış etdikdən sonra qapıçı məşqçisi olaraq işləməyə dəvam edib. 2003-cü ildə isə əsas işi ilə məşqçilik fəaliyyətini eyni vaxtda çatdıra bilmədiyi üçün qapıçı məşqçisi postundan ayrılaraq məşqçilik karyerasına son qoyub^[2].