Elxan Hidayət oğlu Bəşirov 28 may 1968-ci ildə Azərbaycan Respublikasının Lerik rayonunda anadan olmuşdur. 1985–1992-ci illərdə Azərbaycan Dövlət Politexnik İnstitutunun "Maşınqayırma texnologiyası" ixtisası üzrə təhsil almışdır.

Elxan Bəşirov evlidir. Dört övladı var.

Erkən fəaliyyəti

Sahibkarlıq fəaliyyətini 1988-ci ildə "Samira" tekstil kooperativinin təsisçisi və direktoru kimi başlayan Elxan Bəşirov, bir il müddətində işçilərinin sayını 350 nəfər edərək müəssisəsini böyük fabrikaya çevirmişdir. 1992-ci ildə EFTB kiçik müəssisəsini təsis etmişdir və onun direktoru vəzifəsində çalışmışdır.

Müəyyən texnologiyaları tətbiq etməklə Azərbaycanda ilk dəfə olaraq sement əsaslı kafel metlax yapışdırıcılarının və aralıq doldurucularının istehsalina nail olmuşdur və 2000-ci ilin 10 yanvar tarixində "Mətanət A" şirkətini təsis etmişdir. Elxan Bəşirov bu günədək təsis etdiyi şirkətin müşahidə şurasının sədri vəzifəsində çalışmaqdadır.

"Mətanət A" şirkətlər qrupunun rəhbəri

2000-ci illərdə Azərbaycan Respublikasının inşaat sektorunda yaranan tələbatın ödənilməsi üçün Qafqazda ilk dəfə "Mətanət A" sement əsaslı quru inşaat qarışıqları zavodu qurularaq fəaliyyətə başladı.

Hal-hazırda şirkət 3 sistemdə, 24 mal qrupunda fəaliyyət göstərməklə 200-dən çox ticarət markasına və 1500-dən artıq məhsul çeşidinə malikdir. "Mətanət A" şirkəti gips əsaslı məhsullar sahəsində də yeniliklər etmiş, 2002-ci ildə Qafqazda ilk müasir tipli gips zavodu olan "Ağdağ" zavodunun əsasını qoymuşdur. Zavod Almaniyanın qabaqcıl Grenzebach texnologiyasına əsaslanır, istehsal prosesi rəqəmsal texnologiya ilə avtomatlaşdırılmış formada idarə olunur və keyfiyyətə total nəzarət həyata keçirilir.

2016-cı ildə "Mətanət A" şirkətinin Yeni Ağdağ gips zavodunun açılışı oldu.

2020-ci ildə Prezident İlham Əliyevin iştirakı ilə Qazax rayonunda İsveçrənin Maerz şirkətinin texnologiyası əsasında qurulan "Azerlime" Əhəng zavodunun açılışı ilə daha yeni bir zavod fəaliyyətə başladı.

Azərbaycan Respublikasının işğaldan azad olunmuş ərazilərində cənab Prezident İlham Əliyevin başçılıq etdiyi quruculuq abadlıq işlərinə dəstək olunması üçün "Mətanət A" şirkəti yeni zavodun tikilməsi hədəflənib.

2021-ci ildə Hacıqabul Sənaye Məhəlləsində "Elberg" Maşınqayırma Zavodunun açılışı oldu. Müəssisədə quraşdırılan dəzgahlar Avropa, Yaponiya və Türkiyə istehsalıdır.

Elxan Bəşirov yüksək tələbkarlığa, nizam-intizama, operativliyǝ, yüksək müştəri məmnuniyyətinə, etibarlılığa, dürüstlüyə və ədalətə xüsusi önəm verən şəxsiyyətdir. İntensiv olaraq elmi-texniki araşdırmalar aparmaq onun əsas fəaliyyət prinsiplərindəndir. "Keyfiyyətə kompromis yoxdur" devizini əsas tutaraq məhsulların keyfiyyətinə ciddi nəzarət edilməsinə, mütəmadi olaraq təkmilləşdirmə işlərinə, müştəriyə istiqamətlənmiş xidmətlərin səviyyəsinə və bütün bu fəaliyyət ISO standartlarına uyğun qurulmasına önəm verir.

"Mətanət A" şirkəti Azərbaycanla yanaşı, qlobal səviyyədə də fəaliyyətini genişləndirməkdədir. "Mətanət A" şirkətinin istehsal etdiyi məhsullar yalnız Azərbaycanda deyil, eyni zamanda Rusiya, Türkiyə, Gürcüstan, Özbəkistan və digər xarici ölkələrə ixrac olunur.

2019 — Azərbaycan Respublikasının Prezidenti İlham Əliyevin sərəncamı ilə Azərbaycan Respublikasının iqtisadi inkişafına verdikləri töhfəyə və sahibkarlığın genişləndirilməsi ilə bağlı dövlət siyasətinin həyata keçirilməsində səmərəli fəaliyyətlərinə görə "Əməkdar mühəndis" fəxri adı.

2017 — Azərbaycan Respublikasının Prezidenti İlham Əliyevin sərəncamı ilə Azərbaycanın iqtisadi inkişafına verdikləri töhfəyə və sahibkarlığın genişləndirilməsi ilə bağlı dövlət siyasətinin həyata keçirilməsində səmərəli fəaliyyətlərinə görə "Tərəqqi" medalı.

2014 — Belarus-Azərbaycan arasında işgüzar münasibətlərin möhkəmlənməsinə verdiyi mühüm şəxsi töhfələrinə görə təşəkkürnamə sertifikatı.

2010 — "Keyfiyyətli tikinti materiallarının istehsalı"-na görə "QIZIL BUTA" mükafatı.

2010 — "Qloballaşma prosesində Qafqaz və Mərkəzi Asiya" 3-cü beynəlxalq konqresinin təşkilində göstərdiyi dəstǝyǝ görə mükafat.

2009 — "Xəzər İnteqrasiya İşgüzar Klubu"-nun tamhüquqlu üzvü olmasına dair CEIBC tərəfindən verilmiş təltif.

2006 — "XXI ƏSR AZƏRBAYCAN ZİYALILARI" Beynəlxalq Layihəsinin qalibi olduğuna görə Beynəlxalq Diplom.

E. Bəşirov tikinti materiallarının istehsalı texnologiyasının nəzəriyyəsi və apardığı elmi araşdırmaların nəticələrini 3 kitab, 15-dən artıq məqalə, 4 patent müəllifi olmaqla ictimayyətin diqqətinə çatdırmışdır.

O, "Quru inşaat qarışıqları komponentlərinin aktivləşdirilməsi ilə effektivliyinin artırılması" (Elmi və elmi-pedaqoji kadr hazırlığı üçün) adlı monoqrafiyanın müəllifidir.

Üzv olduğu qurumlar

• Azərbaycan Respubikası Prezidenti yanında Sahibkarlar Şurasının üzvü (2003–2016)

• Azərbaycan Tikinti Materialları İstehsalçıları Assosiasiyasının (ATMİA) sədri

• Kiçik və Orta Biznesin İnkişafı Agentliyi (KOBİA) yanında İctimai Şuranın üzvü (2018–2022)

• Abşeron rayonu Sahibkarlar Assosiyasiyasının sədri

• Azərbaycan Sahibkarlar Konfederasiyasının (ASK) Rəyasət Heyətinin üzvü

Elmi dərəcələri

• Böyük Britaniyanın Oksford Universitetinin fəxri professoru

• Azərbaycanın əməkdar mühəndisi

• Beynəlxalq Ekoenergetika Akademiyasının fəxri professoru

• Beynəlxalq Akademik Akreditasiya və Attestasiya Komitəsinin (IAACC) elmlər doktoru

• Texnika üzrə fəlsəfə doktoru

Yüksək texnologiyalar

Elxan Bəşirov rəhbərlik etdiyi şirkətdə yeni smart va nano texnologiyaların, elmi nailiyyətlərin istehsal prosesində tətbiqinə daim böyük maraq göstərir. Azərbaycanda inşaat materiallarının istehsalı sahəsində nanotexnologiyalar ilk dəfə olaraq "Mətanət A" şirkətində tətbiq edilməyə başladı və bu texnologiyalar sayəsində məhsulun tərkibindəki qatqıların ən xırda atom hissəciklərinə təsir etmək imkanı əldə edildi. Şirkət istehsal proseslərində "dünyanı xilas edən" texnologiya kimi tanınan "Green Technology" texnologiyasını tətbiq edir. Şirkət həmçinin artıq bir neçə ildir ki, SMART texnologiyasının tətbiqi ilə istehsal prosesi tam robotlaşdırılmış fəaliyyət metoduna keçib və bu sahədə öz texnoloji liderliyini möhkəmləndirməkdədir.

2014-cü ildə Azərbaycan Respublikası İqtisadiyyat və Sənaye Nazirliyi tərəfindən "İnşaat Materiallarının İstehsalı sahəsində İnnovativ texnologiyaların tətbiqinə görə" dövlət mükafatının məhz "Mətanət A" şirkətinin layiq görülməsi şirkətin innovasiya və texnoloji liderlik sahəsində gördüyü işlərə verilmiş ən yüksək mükafat idi.

FasNatural

Elxan Bəşirov həm də inşaat sahəsində bir sıra yeniliklərə imza atmış iş adamı, bir neçə ixtiranın müəllifidir. Bu ixtiralardan biri 2010-cu ildə "İlin İxtirası" nominasiyası üzrə Uğur milli mükafatına layiq görülmüş FasNatural məhsuludur.

FasNatural məhsulu aqlay daşını əvəz edən və fasadın yükünü aqlay daş plitəsi ilə müqayisədə 11 dəfəyə qədər azaldan, şaxtalı havada çatlamayan, unikal hidrofob və innovativ bir məhsuldur. FasNatural məhsulu nəinki Azərbaycanda, eləcə də dünyanın bir çox aparıcı ölkələrində patentləşdirilmişdir.

Elxan Bəşirov 2010-cu ildə Azərbaycan Respublikası Standartlaşdirma, Metrologiya və Patent üzrə Dövlət Komitəsi tərəfindən təqdim olunmuş "Fəallaşdırılmış gipsin alınması üsulu" adlı ixtiraya verilmiş patentin sahibidir. O, həmçinin Avrasiya Patent Təşkilatının Avrasiya Patent İdarəsi tərəfindən verilmiş "Quru son qat dekorativ qarışıq" adlı ixtiraya verilmiş Avrasiya patentin sahibidir.

Kəşflərin və ixtiraların Tədqiqi və Tətbiqi Akamediyası (KİTTA)

İnnovativ va texnoloji imkanların elm sahəsinə inteqrasiya edilməsini təmin etmək məqsədi ilə Elxan Bəşirov Kəşflərin və ixtiraların Tədqiqi və Tətbiqi Akamediyasını (KİTTA) təsis etdi. Hal hazırda da rəhbərlik etdiyi KİTTA-nın əsas məqsədi inşaat sektorunda yenilikləri araşdırmaq, innovativ kəşflər etmək, istehsal prosesinə yeni vasitəlǝr, həll yolları gətirməkdir. KİTTA bir sıra məşhur, elmə böyük töhfələr vermiş akademik və professorlarla əməkdaşlıq edir. KİTTA həmçinin dünyanın elmi tədqiqat mərkəzləri ilə də geniş və sıx əlaqələr qurur və bu təcrübəni uğurla yerli istehsalat sahəsində tətbiq edir.

E. Bəşirov müntəzəm olaraq Qarabağ müharibəsi iştirakçılarına, məcburi köçkünlərə, kimsəsiz və xəstə uşaqlara, yaşlılara, əlillərə, aztəminatlı ailələrə, ehtiyacı olanlara maddi-mənəvi dəstəyi korporativ vətəndaşlıq borcu hesab edir.

Təsisçisi olduğu "Mətanət A" şirkəti müxtəlif təşkilatlarla – "Qızıl Aypara Cəmiyyəti"-nin Abşeron rayon komitəsi, "Əlil Uşaq və Gənclərlə İş" mərkəzi, "Əlil Qadınlar" cəmiyyəti, "Qarabağ müharibəsi əlilləri, veteranları və şəhid ailələri" ictimai birliyi, "Xəstə uşaqlara yardım cəmiyyəti" və bu kimi digər cəmiyyətlərlə ehtiyacı olanların maddi və mənəvi problemlərinin həllinə yaxından dəstək göstərmişdir.

E. Bəşirov həmçinin gənc nəsilə, təhsilə çox yüksək dəyər verən şəxsdir. "Mətanət A" şirkəti Azərbaycan Memarlıq və İnşaat Universiteti, Azərbaycan Texniki Universiteti, Azərbaycan Dövlət Neft və Sənaye Universiteti, Bakı Mühəndislik Universiteti ilə sıx əməkdaşlıq edir, mütəmadi olaraq tələbələrə istehsal təcrübə proqramları çərçivəsində təcrübə imkanını yaradır.

Eyni zamanda şirkət kimsəsiz və xəstə uşaqlar üçün silsilə xeyriyyə tədbirləri də təşkil etməktədir. Bu cür tədbirlər 2018-ci ildə Tovuz rayonunda valideyn himayəsindən məhrum olumuş uşaqlara, 2018-ci ildə isə Autist Uşaqların Reablitasiyası mərkəzinin yeni korpusunun tikintisi üçün tikinti materialları yardımı ilə əlamətdar olmuşdur.

Bundan başqa "Qan ver, xilas et!" şüarı ilə mütəmadi olaraq qanvermə aksiyası təşkil edən "Mətanət A" şirkəti talassemiya və hemofiliya irsi qan xəstəliklərindən əziyyət çəkən həmvətənlərimizə təmənnasız şəkildə davamlı olaraq dəstək göstərir.

2019-cu ildə "Mətanət A" şirkəti "Böyük Qayıdış" layihəsi çərçivəsində Cocuq Mərcanlıda aparılan tikinti-quruculuq, yeni istehsal sahələrinin yaradılması, istixanaların qurulması, kənd təsərrüfatının müxtəlif sahələrinin təkmilləşdirilməsi işlərinə istehsal etdiyi məhsullarla dəstək göstərmişdir.

2020-ci ildə Elxan Bəşirov Silahlı Qüvvələrə Yardım Fonduna 100 min manat vəsait köçürüb.

Elxan Bəşirov Azərbaycan Respublikasi Prezidentinin 2020-ci il 19 mart tarixli Fərmanına əsasən yaradılan Koronavirusla Mübarizəyə Dəstək Fonduna 50 min manat məbləğində vəsait köçürən ilk sahibkar olub.

2021-ci ildə şəhidlərin əziz xatirəsinin yad edilməsi və qəhrəman şəhidlərimizin ictimaiyyətə tanıdılması istiqamətində "Mətanət A" Şirkətlər Qrupunun dəstəyi ilə yazar Xalid Mahmudun "Əbədiyyət Yolçuları" adlı kitabı nəşr edilib. Həm birinci Qarabağ, həm də İkinci Vətən Müharibəsi şəhidlərinin keçdiyi döyüş yolu haqqında məlumatlar əks olunan kitab 7-ci Bakı Beynəlxalq Kitab Sərgisində təqdim olunub.

Mətanət A